aMalakai 1:2-3
bExodus 33:19
cHosia 2:23
dHosia 1:10
eAisaia 10:22-23
fAisaia 1:9
gAisaia 8:14; 28:16

Romans 9

Giginam dalap a Paulo migat maime inamaniap onim Israel

Tie, turuo migana ang Karisito. Are ratmat ga tulo migat. Tale tokarabi. Ga Muranama Ila Babai gat la ume mangangas dalap tuo na tara la tume ties. Urio ties la are ro: Dalap tuo la kadikmeng migat ga osaintung ngitngit busit ula kiro. Muana, narit narit migana la mait Iudaiap la naganmeng ira Iesu, irie i migana la muo ga ina malagiong. La are ro: Narung migat aime Morowa meba ina malagiang inamaniap tuam, mirie a olabuan tuo, gar onim Israel. Leba ame ba alang gare ba tiruo, temaieng eba tovugutara Karisito ga eba saiktang na iou meba maagaralie inamaniap onim Israel meba naganmeng ira Iesu Karisito. Migat, mirie gar onim Israel la makosarong mirie lop am Morowa. Ogimameng lalabie ga kukunim ang Morowa gat. Omela mida ula kanu ga maimai ang Moses bo kavinama Sinai. Ga amela tavuk gat o lotu, ga omela mida ang Morowa a migana la eba ina muong malagiang. Abraham, Aisak, ga Iakop mirie eap maiam. Ga na gar gat maiang Israel, Karisito la betong. Irie Ila Kakani ga ume uale bo mirier pagap ganam. Irie Morowa migat ga puoieng meba man ovienbuong bonim a busit. Amen.

Tiesong Paulo a tavuk la akosarong Morowa ira ma Israelip

Tie, papaluaip ma inamaniap onim Israel la tale naganmeng ira Karisito. Pa iruo paga la tale businguala are Morowa la tale ouluan ties o mida ang tinan la ualo aun Abraham. Karuk. Memani? Muana, inamaniap la betmeng na gar maiang Israelip, tale mirie ganam la betmeng na gar ang Morowa. Karuk. Non it ma la am Morowa, mirie Israelip migat. Are ratmat ga buat tiesbuong gare tiruo, “Mirie olabuan a Abraham, gare tiruo ga mirie ganam la mirie lop am migat.” Karuk. Memani, tinan la tiesong Morowa gare ro, “Na gar ang it Aisak la eba omela bonim na gar nuang.” Muana o uro ties la are ro: Lop la betmeng na agat maiong teip, miruo lop la tale lop am Morowa. Karuk. Pa lop la betmeng me mida ula kanu ang Morowa, miruo lop la tale lop am Morowa. Miruot mi la ame bonim na gar ang Abraham. Muana, mirie la ame narit nagan gare Abraham. Memani, urio ties o mida la okosarong Morowa la are ro: “Na iruo tara la avuvuorung ara, eba ina terigiang ga Sera la eba avarangeieng kulot ba ila migana.”

10 Pa talet urie. Pa narain lopien iangan Rebeka la limaning it narit mamo, irie Aisak, ea buang. 11 Pa Morowa la auluan kan tavuk ang la busit ume auluan ga ume aite migana na agat ang kan: Tale ka levarangeieng Rebeka lopien iangan ga tale kan akosarliong tavuk ila muri o tavuk ila kire. Karuk. Pa Morowa la oulo Rebeka gare ro, “Tubiat la eba iat levarangenang kulen”, pa natauan papa la eba betang migana o ubi ang lama narain papa ang ga ouluan ties ang. 13 Ga urio ties la betieng gare unuli Malakai la tiesong o:

Ugama Morowa, “Narung maset aime Iakop, pa kikistung aime Iso.” a 
14 Are ratmat ga eba buaramang gare mani? Atabo tale akosarong Morowa tavuk ila puvuvui na tara la mavuvuoong inamaniap na agat ang, a? Karuk. 15 Tinan, Moses la amarikong Morowa meba maboaving inamaniap ganam onim Israel, pa ties ong Morowa gare ro,

“Leba tama kadiktang aime migana ba, eba kadiktang aime. Ga leba tama aboraving migana ba, eba aboraving.” b 
16 Are ratmat ga na tara la mavuvuoong Morowa teip meba mirie ba lop am, tale mavuvuoong iro agat maiong inamaniap o iro kukunim la okosarmeng meba mumurum ba. Karuk. Pa agat ang kan ga ume kadik maime inamaniap. 17 Migat, Babam ula puaru la tiesieng me Morowa la aulo orong onim Isip la pringesngesong ga oguekong ties ang gare ro,

“Nokosartung ga betnung gare orong, meba nosingtala o ngangas tung ula kakanu me nulam ga teip ga magaulap eba puomeng la eba ovaikmeng bonim tuo ula kanu na mirie napup o kimanam gano.”
18 Are ratmat ga abit, leba naang Morowa meba kadikang maime inamaniap, eva ume kadik. Ga leba naang meba makosarang inamaniap meba gat pringesngesmeng ga oguekmeng ties ang, eba okosarang gare rie iro kan na ang.

Bukbuk ga kadik ang Morowa

19 Tie, are ba rie, atabo eba toalava noba gare ro, “Leba are ba rie, memani Morowa la ume ties kirat maime inamaniap la ame kiribas ga akosarmeng tavuk ila kire? Aga la puoong meba oguekang agat ang?” 20 Tie, are ratmat ga norulo, “Nunuo migana la ame agat gare tiruo, nunuo aga la puonung meba anananala ga avurenang Morowa o ties, a? Nunuo la nokosarong Morowa. Are ratmat ga tuga noralava gare ro, ‘Atabo sospen o kimanam eba tiesang gare ro aime migana la akosarong, memani ga tokosarnung gare tiruo? Tuga betang gare noba paga.’” Karuk. 21 Migana o ukosar ma sospelip eba arang nap ba o kimanam ga eba lekosarang narain ba sospelipien o, non sospen ila muri me ubi ula muru maset, pa non sospen agarit me ubi agarit. Pa atabo urio la tale mumuru, a? Karuk. Mumuru urio.

22 Pa miptang, Morowa gat la ume okosar gare tiruo. Atabo tale mumuru leba ama masingala Morowa inamaniap la tale naganmeng ira a o mukmukanim ang ga tale naong aime tavuk ila kire la mime akosar ga agatong meba osingala kukunim ang meba makakauang? Urie la mumuru. Muana, inamaniap gare sospelip mila kiram la urangameng ara meba kiram ba. Pa uairam Morowa ga uanula me tara maime inamaniap ganam meba makakauang pagap mila mumurum leba alam maun inamaniap la naong maime. Tinan la mavuvuoong ga uairam meba maionang ga irie. Are ratmat ga eba buaramang mani tiro? 24 Eva, bubuot la mirie sospelip. Buvuvuoong it Morowa. Pa talet bubuo gar onim Iudaia. Karuk. Pa mavuvuoong non inamaniap gat la tale onim Israel. 25 Morowa la businguala ga buvuvuoong inamaniap na kan agat ang. Muana, unuli Hosia la omirong ties gare ro,

“Miruo inamaniap la tale onim na garip tuam, eba tevam mirie garip tuam. Pa mirie garip la tale kan narung maime, tubiat eba narang maime migat.” c 
26 Pa na pianam la marulo,
“Tale mimi gar tuam”, pa nat urie pianam la eba tamama “Mimi lop am Morowa la ume unama atatan makin.” d 
27 Pa unuli Aisaia la magatong garip maiam Israelip, ga omirong ties gare ro,

“Uvas ma inamaniap onim Israel la eba betieng gare ba ubiem labinim, pa ebat ina malagiang Morowa namarip it ma garip ma inamaniap.
28 Memani, puoong Ila Kakani meba oitamung ties ang ga eba okiripang ties kakalait ga apulang uniap me maun inamaniap onim na kimanam.” e 
29 Pa tinan la tiesong unuli Aisaia laike gare ro,

“Ila Kakani maiang teip o danunumiap onim na panbinim leba tale airang tatak gar buang ga onang, eva, eba bukirarameng ga betbuong gare taun Sodom ga eba bunang gare taun Gomora.” f 

Gar onim Israel la tale naganmeng ira Karisito ga tale puvuvum

30 Are ratmat ga eba mani le buaramang? Inamaniap la tale onim Iudaia la tale kan mamaranim meba amela tavuk ila puvuvui, pa amela ra tavuk ila puvuvui. Memani, naganmeng ira Iesu Karisito ga amela iruo tavuk ila puvuvui. 31 Pa inamaniap onim Israel la omeuluan maimai meba amela tavuk ila puvuvui iro, la tale kan ovuomeng ubi o maimai ga tale kan betmeng inamaniap mila puvuvum. 32 Memani, tale nameng meba naganmeng ira Karisito meba evam Morowa inamaniap mila puvuvum. Karuk. Agatmeng it meba okosarmeng ubi la tiesieng maimai ang Moses meba betmeng ga puvuvum ba. Iesu irie kan la betong gare non tadas o uvure ma kibap, ga inamaniap onim Israel la melum ira a.

33 Memani, unuli Aisaia la omirong na babam ula puaru gare ro,
“Miptang, tuabua ra non migana Saion are non tadas meba mavureang kibap ma inamaniap. Tuabua non migana are tadas ila kakani, pa inamaniap la tale nameng aime. Pa aga teip ga magaulap la naganmeng ira a, eba tale memaning mulinubap. Karuk. Eba maagaalie Morowa ga eba evam inamaniap mila puvuvum.” g 
Copyright information for `KTO