2 Corinthians 13

Paulo yana walo gudugudu

Teina yagu hauga tonugana yalalaowa alimiyai. Dova loina teya iwalo, ‘Ebe tauwalo moiha bwau bo tonuga veꞌewa hava ainai yadi walo ana benali ehebo abo mata ammulitaei’. Omiu yaiyadiwo mwalona yababa ampaipaihowaidi yo omiu nigele amyapaipaihowaidi ebeha yawalo guduguduigomiu maudoimiu. Mwalona yagu laowa bwauna ainai yawalowei na teina yau lovai ta mata yawaloweuyoi, haugana yalalau gwaipileuyowa tauyababa maudoidi lauvetala mata hiveꞌalo. Yami venuwa ebeha amhanapui neta Besinana aliguwena iꞌauꞌaubabada eeta ana moiha mata yaꞌabiye mahalava. Iya yana paihowa alimiyai nigele iyatapiya na hesi alomiyai iwahiyala alili. Bwagana Yeisu tapiya holanai hiveꞌabahi na hesi Yaubada yana alaꞌalawowoliyena mayawahina. Dova itatapiyane ai hinage atapitapiya na yama paihowa alimiyai neta Yaubada yana alaꞌalawowoliyena mata iya baidamai amiya.

Amꞌitauyoigomiu yemidi amwahanaena amlaulau bo nigele. Yami mumuga amꞌita lobaiyaꞌo ebeha Yeisu Besinana alimiyai imiyamiya. Ehe, iya alimiyai imiyamiya. Na ebe ginauli yababadi ampaipaihowaidi na ambeꞌu neta nigele. Na yayemidi neta mata amꞌitagai ebeha nigele ayabeꞌu. Na Yaubada ainai aꞌawanoi ta mata ihaguigomiu yo havena yababa ampaipaihowaidi. Nigele ebeha ama ita aꞌabiye mahalava ta tomowa hiwalo yama paihowa idumwalu, na omiu ebeha yami mumuga maudoidi hidumwalu. Bwagana ama ita dova nigele taupaihowai namwanamwamai na hesi nuwanuwamai ebeha yami mumuga maudoidi hidumwadumwalu. Wuwuna ai nigele howahowamai ta walo moihana agudui. Hesi howahowamai ta walo moihana vehabana apaihowa. Mata ayaliyaya ebe atapiya na amwahiyala. Na aꞌawanoi ebeha Yaubada ihaguigomiu ta yami mumuga hinamwanamwa moiha. 10 Yau lovai na teina yalaulele ebeha yalalaowa ta nigele ebeha abiye dumwalugomiu vehabana yagu walo yo yagu mumuga hivita moiha. Na yagu loina neta Bada imohegau ebeha yami yemidi yaꞌabiye wahiyaladi na nigele ebeha yagoha loeꞌeloꞌedi.

Paulo yana awayauwedo

11 Tahiguwao, teina yagu walo ana higa. Kaiyoni! Amꞌaipate wahiwahiyala ta ebe yami mumuga hinamwanamwa moiha. Yagu guguya ambenaledi ta maudoimiu nuwamiu ehebo yo nuwahegoyaena ammiyamiya. Na velau yo nuwadaumwali ana Yaubada mata omiu baidamiu ammiyamiya.

12 Ainihoniho veꞌaveꞌahihina ainaena amꞌawa yauwedoweuyoigomiu. Yaubada ana tauveꞌahihiwo maudoidi hiꞌawa yauwedowegomiu.

13 Bada Yeisu Besinana yana veꞌiꞌila yo Yaubada yana velau yo Aluꞌaluwa Veꞌahihi yana veꞌawaꞌauꞌaugelu maudoimiu alimiyai imiya vahaligomiu.

Copyright information for `KUD