2 Corinthians 4

Yada tapiyao dova walata

Ainaena teina waloyemidi vauvauna yana paihowa Yaubada yana atemuyamuyaena imohegai ta nigele ayatapiya. Mumuga dawadawanidi yo vedebahinihinimayadi amwau gabaediꞌo. Nigele mumuga oyaꞌoyamaena ayamiyamiya yo nigele Yaubada yana walo ayapaipaihowa pwanoli. Na awamoiha maudoina ainaena Yaubada mehenai amiyamiya ebeha tomowa maudoidi yadi nuwanuwatuwu ilimani vehabana amoheuyoigai. Wasa namwanamwana aguguyaei ta ebe italu aidawani mata tomowa tupwadi aidiyai italu aidawani. Hiya nigele hiyayemidi wuwuna Tomodulele baleꞌu ana tauloina yababana yadi nuwatuwu iꞌauhidi. Iya iguduidi ta masele ihinahinalidi nigele howahowana na hiꞌita lobai. Masele neta iya wasa namwanamwana ainaena ilalaomane. Na wasane ainaena Besinana yana vewasawasa iꞌabiye mahalava wuwuna iya Yaubada ana oleya moiha.

Nigele ayabom wasamai aguguguguyaei na Yeisu Besinana iya Bada wasana aguguguguyaeine. Na awalowalo neta ai yami taupaihowa Yeisu vehabana. Mwalona Yaubada iwalo ebeha, ‘Mata guguyou holanai masele ihinali’. Na teina haugane Yaubada ehebonane yana wasawasa tahanapui neta taꞌitaꞌita ihinahinali Besinana maninai.

Hesi ai Yaubada yana wasawasa taumai tapitapiyadi aidiyai himiyamiya ta dova bagi namwanamwana walata miyamiyana alonai. Ai wahiyala mwalaꞌi alilina aꞌabiye mahalava neta ai nigele alimaiyena na hesi Yaubada iya ainaena. Hauga daodaona hiꞌabiye nuwavitaigai na hesi nigele hiyaꞌabiye yababagai. Hauga tupwadi anuwatuwu bwaubwau na hesi nigele ayatapiya. Hauga tupwadi hiꞌabiye muyagai na hesi Yaubada nigele iyanuwapwanopwanowegai. Hauga tupwadi hitalaigai na hesi nigele ayasilahe moiha. 10 Hauga maudoina amwalomwalowoi dova Yeisu ta ebe iya yawahina tomowa hiꞌita holamaiyai. 11 Yama miya ahubena ehebo ehebo alodiyai Yeisu vehabana na mwalowoi awutu vahavahali moiha. Na teina alonai aꞌalamaꞌiꞌita ta ebe Yeisu yawahina tomowa hiꞌita. 12 Eeta moiha mwalowoi holamaiya ipaipaihowa na omiu yawahi amlobalobai.

13 Yaubada yana Buki iwalowei iwalo, ‘Yaꞌaubabada wuwuna yayemidi’. Teina yemidine ehebonane alimaiyai vehabana na aꞌaubabadaei wuwuna ayemidi. 14 Tahanapuiyaꞌo neta iya Yaubadane ehebonane Bada Yeisu mwalowoiyena iꞌabiye towolouyoiyaꞌo na hinage mata omiu na ai iꞌabiye towolouyoigita. Yeisu baidada na ilau ahaigita ta talau iya mehenai. 15 Teina maudoina neta omiu vehabamiu. Na Yaubada yana veꞌiꞌila idabalala boda ta boda aidiyai ta mata Yaubada yana vewasawasa ana awayauwedo imwalaꞌi.

Yemidiyena tamiyamiya

16 Eeta mata nigele ayatapiya. Moiha taumai hitapitapiya na hesi aluꞌaluwamai ahubena ehebo ehebo iꞌabiꞌabiye vauvauyoi. 17 Na teina vitaiwone habuludi hauga ahuꞌahubalina alonai aveveꞌalodine, mata vewasawasa mwalaꞌina yo miyamiya vateyaina ilawelawenama, teina vitaiwone mata imwalaꞌi gabaedi. 18 Hava ta itaꞌitadine nigele aidiyai ayanuwanuwatuwu alili. Na hava nigele tayaꞌitaꞌitadine hiya aidiyai anuwanuwatuwu moiha. Wuwuna hava ta itaꞌitadine neta hauga ahuꞌahubalina vehabana na hava nigele tayaꞌitaꞌitadine neta hauga miyamiyavateyaina vehabana.

Copyright information for `KUD