2 Corinthians 6

Nigele ta Yaubada baidamai yama paihowa toyawa holanai aꞌawanoiyegomiu omiu Yaubada yana veꞌiꞌila tauvaina havena yana veꞌiꞌilane amgebegebe awawai. Wuwuna iya iwalowei iwalo,

‘Atemuyamuya ana hauga ainai yami awanoi yabenaledi.
Na livahi ana ahubena ainai yahaguigomiu.’
Walo moiha, teina Yaubada yana atemuyamuya haugana ebeha mata ami livahi amlobai.

Nigele nuwanuwamai ebeha yaiya teya yama paihowa iꞌitaye yababa. Ainaena na ababeꞌu nigele teya yaiya yana amwaha ainai ayamwaumwauwi. Hesi ginauli maudoidi holadiyai apaipaihowaidi ebeha aꞌabiye mahalava neta ai Yaubada yana taupaihowao: Alamaꞌiꞌita moihanaena vitai yo wewelohe yo muya holadiyena atowotowolo momohi. Ama alehao hitalaigai ta vada paipaiyai higuduigai ta himiya gwaigwaipileyegai na hiwalowalo yababaigai. Na apaihowa wahiyala. Na nigele ayaꞌenoꞌeno iliꞌilimani. Na nigele ayaꞌaiꞌai iliꞌilimani. Na yama nuwatuwu masemaselenaena yo nuwatuwu hanahanapuwena yo yama nuwadobiyena yo aiyauyaena yo Aluꞌaluwa Veꞌahihi ainaena yo velau moihanaena aꞌabiye mahalavauyoigai ai Yaubada yana taupaihowao. Na yama walo moiha yo Yaubada yana alaꞌalawowoliyena aꞌabiye mahalavauyoigai ai Yaubada yana taupaihowao. Na mumuga dumwadumwaluna avai ta iya yama abaꞌaleha yo abalauꞌauꞌauhi. Tomowa hiveꞌahihiyegai na tupwadi hiꞌita dobiyegai na hiꞌawa yababaegai na tupwadi hiwalo vetuvehaeyegai. Hiwalo ebeha aꞌoyaꞌoyama na hesi awalowalo moiha, na hinage hiteibabaegai na hesi hihanapuigaiꞌo. Na hipaihowaigai ebeha amwalowoi na hesi mayawahimai. Bwagana hitalaigai na hesi nigele hiyaꞌoiꞌoiye mwalowoigai, 10 yo bwagana hivenuwayababagai na hauga daodaona ayaliyaliyaya. Ama ita dova tauwewelohe na hesi tomowa bagibagilidi aꞌabiꞌabiye tobwatobwadi. Na Ama ita dova nigele teya hava alimaiyai na hesi ginauli maudoidi ai alimaiyai.

11 Ama geluwo omiu Kolinita awalo dumwalu alimiyai neta ginauli maudoidi awalo mahalavaidiꞌo ta atemai ahoꞌe gabaei alimiyai. 12 Ai nigele atemai ayaguduidi alimiyena na omiu yami venuwaena atemiu amguduidi alimaiyai. 13 Eeta teina yawalowalo laowa alimiyai dova omiu natuguwao. Teina yama mumugane amyemaiha ta omiu hinage atemiu amhoꞌe gabaedi alimaiyai.

Ita Yaubada yana vada tapwalolo

14 Yaiyadiwo nigele hiyayemidi havena aidiyai ampatupatu. Wuwuna mumuga dumwadumwaluna na mumuga yababana nigele howahowana na hiveꞌehebo. Na nigele howahowana masele na guguyou himiya gogoi. 15 Nigele howahowana Besinana na Tomodulele yadi nuwatuwu ehebo. Tomowa yemiyemidina na tomowa nigele iyayemidi nigele howahowana yadi nuwatuwu ehebo. 16 Yaubada yana vada tapwalolo nigele howahowana aiwa tagitagi holanai himiya. Na ita Yaubada yana vada tapwalolo dova iya yana Buki holanai iwawaloweine iwalo, ‘Yau mata holadiyai yo gamwagamwadiyai yamiya. Na yau mata yadi Yaubada na hiya mata yagu tomowao.’

17 Na Bada iwalouyo iwalo,
‘Omiu yagu tomowao,
amlaugabaedi yo hiya aidiyena amwaheigomiu.
Hava nigele iyamasele havena ainai amꞌabiꞌabilau,
ta yau mata yayaliyayaigomiu.’
18 ‘Eeta yau mata Tamamiu
na omiu mata natuguwao towatowahomiu yo waiwaihiumiu.’
Teina dova Bada Yaubada Tauwahiyala alili iwawaloweine.
Copyright information for `KUD