2 Peter 1

Awayauwedo

Yau Saimoni Pita Yeisu Besinana yana taupaihowa, na ana tauyewasa, leta teina yaleleyawa alimiyai omiu na yau yada Yaubada yo ada Taulivahi Yeisu Besinana yadi dumwalu ainaena mayada yemidi talobalobai. Yaubada na yada Bada Yeisu amhanapuidiꞌo, eeta mata yadi veꞌiꞌila na yadi nuwadaumwali imwalaꞌi alili alimiyai.

Miya namwanamwa mumugana

Yaubada iya yana wahiyalaena ihaguhaguigita, ainaena yana nuwatuwu maudoidi ta mulita iliꞌilimanidi Yaubada yana nuwatuwu hanapu ainaena. Eeta iyogaegita ebeha yana wasawasa yo yana mumuga namwanamwadi iveꞌitagita. Iya yana waloyemidi hinamwanamwa alili eeta yana alaꞌalawowoli aidiyena mumuga baleꞌu ana nuwatuwu dawaniwo yababadi tadena gabaediꞌo, ta Yaubada ana lautowoi namwanamwana ta lobaiyaꞌo.

Neta vehabana na amtowoi wahiyala ta yami yemidi amyemutulaidi mumuga namwanamwana ainaena, mumuga namwanamwana ewanai hanapu. Hanapu ewanai veꞌao iliꞌilimani, veꞌao iliꞌilimani ewanai towolo wahiyala, towolo wahiyala ewanai Yaubada yana miyamiya, na ewanai veꞌauꞌaugelu, na yana abaꞌovi neta tahida tavelauwei. Ainaena ebe mumugaone teina aidiyai amwahiyala mata yada Bada Yeisu Besinana ana hanapu alimiyai imiya alili, ta yami paihowa yo yamo lauꞌaino mata nigele hiyatautowolo. Na ebe mumuga teina nigele alimiyai hiyamiyamiya ana ita dova mehe gibugibumiu, wuwuna yami pwanoliwo miyamiyadi Taunuwahamuina bada amnuwapwanopwanowenaꞌo.

10 Ainaena tahiguwao, amtowoi wahiyala ta Yaubada yana boda vesivesinuwada ainai ammiyamiya na havena aidiyena ammiyamiya mahalava. Na ebe yagu walo teina amꞌawa abiyedi mata nigele amyabeꞌu. 11 Hauga mehedai moiha mata iꞌabiye yaliyayagomiu ta amluwu yada Bada ada Taulivahi Yeisu Besinana yana abaloina miyamiyavateyaina ainai.

12 Eeta nuwanuwagu yo yaguguyaigomiu ebeha ginauli teina amnuwatuwu avivinidi, wuwuna bada amhanapuidiꞌo yo walomoiha amꞌawa abiyediꞌo. 13 Na hauga teina baleꞌuwai mayawahigu yamiyamiya, na yaꞌabiye nuwatuwu avivinigomiu ta amꞌaipate mumuga namwanamwa vehabana. 14 Wuwuna yada Bada Yeisu Besinana bada iveꞌitagauꞌo ta muhamuhana na yawahigu yalaugabaei teina baleꞌuwai. 15 Ainaena yatowotowoi wahiyala ta ebe yagu mwalowoi tuluhanai veꞌitaone havena amnuwanuwa pwanopwanowedi.

Besinana yana wasawasa aꞌitayaꞌo.

16 Mwalona yada Bada Yeisu Besinana yana wahiyala yo yana laoma awalo mahalavaediꞌo alimiyai, na yama walomahalavao nigele tomowa yadi aubabadao aidiyena, na hesi mehemaiyena yana wasawasa aꞌitayaꞌo. 17 Na haugana mwalona baidamai oya veꞌaveꞌahihina ewanai amiyamiya na Yaubada alinana galewaena abenalei iwalo, ‘Teina Natugu yavelauwei na iya vehabana yayaliyaya mwalaꞌina’. Na alinane teina neta Tamana yana wasawasa maselenaena ilalaomane, ta oyanane ewanai Yaubada walo vetuvehaenana ta yana wasawasa Natuna imohegeyoꞌawaheine.

19 Ainaena tahanapuiyaꞌo ebeha tauwalo mahalavao mugai yadi walo aidiyena Besinana hiwalo mahalava mugaiyei neta moiha. Eeta tauwalo mahalavaone yadi walo amnuwatuwu iliꞌilimanidi, wuwuna walowone dova masele tupwa guguyou ainai ihinahinali ana higa mala itomtom ta saelohana atemiyai ihihinaline.

20 Teina ginauli mwalaꞌina eeta amhanapui neta nigele howahowana tabom Yaubada yana walomahalava ainona taꞌita lobai. 21 Wuwuna tauwalo mahalava nigele hiyabom yadi nuwatuwuwena hiyawalowalo mahalava na hesi Aluꞌaluwa Veꞌahihi tauwalo mahalavaone ivenuwamwauwedi ta Yaubada yana walowone hiwalowalowedine.

Copyright information for `KUD