2 Timothy 3

Hauga yana abaꞌovi vehabana

Nuwanuwagu na nuwam imasele hauga yana abaꞌovi ilalaoma vehabana, neta hauganane ainai vitai maudoidi himahalava. Hauganane ainai tomowa hinuwatuwuyoidi na hibom vehabadi hinuwanuwatuwu, na wasawasa nuwaleledi iꞌoiye mwaudi, na hinuwahaehae yo hinoꞌonoꞌoweuyoidi na tomowa hiꞌabituluha yaiyaiyedi. Na hinadiyao yo tamadiyao yadi walo hiwalo tauꞌwataedi, na vali tomowa yadi abiꞌiliꞌilimani vehabana mata nigele hiyaꞌawa yauwedo aidiyai. Guguyou mumugana ainai himiyamiya. Ainaena mata nigele tomowa hiyaꞌateꞌatemuyamuyaedi, yo hiyanuwatuwu avivinidi, hesi mata hivetalapiliyedi. Na tomowa mata hiꞌabituluha yaiyaiyedi na himodiꞌini ta mumuga namwanamwana hitaꞌwataꞌwataei. Mata adi geluwo hinuwapwanopwanowedi na higagasa awaꞌawawa na hiwalo haehae moiha na Yaubada mata nigele hiyavelauwei na hibom yadi yaliyaya ainai mata hinuwanuwatuwu. Tomowaone hitapwalolo, na Yaubada yana wahiyala nigele hiyayemidiyei, ainaena yadi tapwalolone ginauli awaꞌawawa. Eeta tomowaone adi boda havena ainai uluwuluwu. Wuwuna tupwana aidiyena vadai hiluwuluwu na waiwaihiuwone yadi nuwatuwu tapitapiyadi, hiꞌoyaꞌoyamaedi, na waiwaihiuwone hihanapui neta hiya tauyababa, na vali lautowoi na vali lautowoi holadiyai himulimulitaedi, veꞌita vagana na vagana ana taubenaliwo, ta nigele howahowana na veꞌita moiha hihanapui.

Walo moiha, tomowaone veꞌita moiha hiveꞌalehaei, dova mwalona hiya Yanesi yo Yamebelisi Mosese hiveꞌalehaeine. Na hiya adi ita dova tauyemidi, na hesi holadiyai oyama yo nuwatuwu yababa himiyamiya. Eeta howola abo teina ginaulidine himahalava, na vali tomowa hiꞌitadi. Dova mwalona Yunesi yo Yamebelisi yadi oyama iyemahalavaei na tomowa hiꞌiꞌitane.

Timoti ana venawamwau

10 Na owa Timoti bada uhanapuigaꞌo yagu veꞌita, yo yagu mumuga yo yagu amwaha, na yagu yemidi, yo yagu alamaꞌiꞌita, yo yagu velau, yo yagu towolo wahiyala. 11 Na dalavaone Anitiyoki yo Aikoniyom na Lisitila aidiyai yagu miya vitaidi yo yagu muyamuya tomowa aidiyena yalobalobaidi bada uhanapuidiꞌo. Tupwadi aidiyai yamiya vitai alili, na vitaine maudoidi aidiyena yada Bada ihahaloigaune.

12 Walo moiha, ebe ita Yeisu Besinana tayemidiyei, na tatalamwegita yana amwaha namwanamwana ainai, mata vitai talaobai tomowa aidiyena. 13 Na hiya tauyababa yo tomowa adi tauꞌoyamao mata yadi yababa himwalaꞌi moiha, wuwuna Tomodulele bada iꞌoyamaediꞌo.

14 Owa hesi veꞌita bada uvaiyaꞌo na uyemidiyediꞌo na uhanapuidiꞌo, ta aidiyena ulaulau, na ai amtauveꞌitao uhanapui ebeha yama veꞌitaone hinage ammulimulitaedi. 15 Owa yam hauga heda ainai ta ana higa wau Yaubada yana Buki Veꞌahihi uhanapuiyaꞌo eeta utowolo wahiyala wuwuna Bukine ainaena Yeisu Besinana uyemidiyei ta iya ilauyeyawahaigone. 16 Wuwuna Yaubada yana Buki walodi maudoidi Yaubada yawahina ainaena hilalaomane, na walodine aidiyena iveꞌiveꞌitagita ta yada yababao himiyamiya mahalava yo ada venuwamwau namwanamwana talobalobai ta yada miya hidumwalu. 17 Ainaena ita taumulitao paihowa namwanamwadi maudoidi tapaihowaidi.

Copyright information for `KUD