Mark 4

Walovegevegedi patu vehabana

(Madiu 13:1-9; Luke 8:4-8)

Mulitai hinage Yeisu iwuyoma Galili leꞌawanai habi guguya na boda mwalaꞌina hitauꞌahaiyama ainai, eeta ehebo waga iꞌavaꞌavai ainai igelu ta imimiyane na bodaone leꞌawai hitowotowolo. Na Yeisu walovegevegedi bahudi aidiyena iveꞌita tomowa aidiyai na iwalo, ‘Ambenalei! Taupaihowa ehebo yana tanoviyai ilau ta holanai patu ivevehuludine, na tupwana patuwone amwahai hibeꞌu, eeta lowolowo hiꞌitadi ta hiꞌaitulu hiꞌaꞌaidine. Tupwadi hibeꞌu toputopu malagaigaimana ainai ta hiꞌini mwayamwayau, wuwuna toputopu habuluna bada, na mahana iꞌalahidi ta hiwelai wuwuna patune lamlamdine nigele toputopune gwagwamanane hiyalobai. Na tupwana haihaili womawomalidi aidiyai hibeꞌu ta hiꞌini mwalomwalowoi, ta nigele howahowana yo hiꞌaino, wuwuna haihaili womawomalidi hiwahiyala ta hipaiye mwalowoidine. Eena tupwadi patu toputopu namwanamwana ainai hibebeꞌune, na hiꞌini na himwalaꞌi ta hiꞌaino, eeta tupwadi ainodi hibagibagili alili, na tupwadi ahipuwai, na tupwadi nigele hiyaꞌaino iliꞌilimani.’

Ta Yeisu aidiyai iwalo, ‘Ebe matalinamiu walo teina ambenalei’.

Hava vehabana Yeisu iwalo vegevegedine

10 Mulitai bodaone hiloꞌuhagwali na Yeisu ibom imiyamiya, ta tupwadi tomowa na ana taumulitaowowa hitau tuwelo wone baidadiyao hilaoma ta Yeisu ainai hipanivila, hiwalo, ‘Yam walovegevegediwone hava adi masele?’

11 Na Yeisu iwalo, ‘Omiu bada Yaubada hanapu imohegomiuꞌo yo yana loina holadi amhanahanapuidi, na hesi tomowa bagibagilidi nigele. 12 Hiya walovegevegedi hibenalei na ana nuwamasele nigele hiyahanapui, na hinage ana hanapu hibehabeha na nigele howahowadi hilobai. Eeta hinage nigele howahowana yadi pwanoliwone aidiyena hinuwabui na Yaubada inuwahamuidi.’

Walovegevegedi patu vehabana ana livahi

(Madiu 13:18-23; Luke 8:11-15)

13 Ta Yeisu aidiyai iwalo, ‘Vedova yagu walovegevegedi teina nigele amyanuwamasele awa? Yede vedova mata tupwana walovegevegedi teina dova amnuwamaseleine?

14 ‘Taupaihowane Yaubada yana walo ivehulu budebudeyanaei. 15 Tupwadi patuwa hibeꞌu amwahai dova tomowa hiya Yaubada yana walo hibenalei na Tomodulele ilaoma aidiyena ivaivehuludi.

16 ‘Hinage dova patuwone malagaigaima ainai hibeꞌubeꞌu, ebeha tomowadine Yaubada yana walo hibenalei mayadi yaliyaya hitatalamne, 17 na nigele lamdine iyayaiyai yo iyaꞌabidobi, eeta hauga habuluna ainai himiyamiya, yo ebe aiteya hauga ainai Yaubada yana walo ana yemidi vehabana vitai nuwana alehao hilobai mata hibeꞌu mwayamwayau.

18 ‘Na patuwa haihaili womawomalidi aidiyai hibebeꞌuwa dova tomowaowa hiya Yaubada yana walo hibenalei, 19 na wasawasa yo baleꞌu yana paulao adi nuwatuwu aidiyena Yaubada yana walo hinuwapwanopwanowei eeta nigele howahowana hiꞌaino.

20 ‘Na patuwa toputopu namwanamwana ainai hibebeꞌuwa dova tomowaowa hiya mayadi atetalam Yaubada yana walo hibenalei, ta ainodi namwanamwadi. Tupwadi ainodi bagibagili alilidi, na tupwadi ahipuwai na tupwadi nigele hiyaꞌaino iliꞌilimani.’

Walovegevegedi lampa vehabana

(Luke 8:16-18)

21 Yeisu hinage alidiyai iwalo, ‘Havena lampa alaꞌalahina walata yo halabi ainaena taꞌoiꞌoihamui, na hesi maseleyai tamwauwi ta imasele. 22 Ta ebe ginauliwo dawadawanidi abo mata maselenane iꞌabiye mahalavaedi yo taꞌitadi. 23 Ebe matalinamiu walo teina ambenalei.’

24 Na hinage, ‘Amnuwatuwu avivini yo walo ambenali iliꞌilimanidi, wuwuna ebe omiu hava amꞌaiyauya mata dova ana maiha amvai na hesi maꞌana yemutulai. 25 Wuwuna ebe yaiya ainai Yaubada yana tobwatobwa, mata tobwatobwanane ilauhepoiyei. Na ebe yaiya ainai nigele Yaubada yana tobwatobwa, mata hava namwanamwana ainai imiyamiya Yaubada ainaena ivaivehuludi.’

Walovegevegedi venuvenu vehabana

26 Yeisu hinage iwalo, ‘Yaubada yana paihowa nuwana yana loina tomowa aidiyai dova hinage venuvenu towaho yana tanoviyai iꞌumaidi, 27 na towahonane boniyai ehebo ehebo iꞌeno na iꞌahubena itowolo, na venuvenuwone hiꞌiniꞌini yo hihaihaili, na hesi yadi ini wuwuna nigele iyahanapui. 28 Wuwuna toputopu iya iloina yadi ini yo yadi aino vehabana, 29 na mulitai abo ainona ihuna tauꞌabi tanoviwa ivetuwuni yo ilauꞌeli.’

Walovegevegedi patu habuluna vehabana

30 Yeisu hinage iwalo aulidi iwalo, ‘Vedova Yaubada yana Abaloina walovegevegediyena yaꞌabiye masele alimiyai? 31 Nuwana teina dova ehebo aiwa patuna ainai yawalo yepatu neta magimagi vehabana. Magimagi patuna habuluna, 32 na ebe taꞌumai na iꞌini yo iveꞌaiwa mwalaꞌi, mata lagalaganao mwalaꞌidi imwauwidi, ta lagalaganao logulogudiyai lowolowo yadi abatowa.’

Yeisu yana walovegevegedi bagibagilidi

(Madi 13:34-36)

33 Yeisu yana guguya aidiyai walovegevegedi bagibagilidi aidiyena iveꞌiveꞌita, yo ebe tomowa aidiyena howahowana hihanapui. 34 Iya hauga bagibagilidi walovegevegediyena iguguya bodao aidiyai, na yana hevahevaliwone hibom aidiyai walovegevegediwone ilivalivahidi.

Yeisu yaumai yo bagodu iloinaedi

(Madiu 8:23-27; Luke 8:22-25)

35 Lavilaviyai Yeisu yana guguya wagaena iveꞌovi ta ana taumulitaone aidiyai iwalo, ‘Amgeluma yo ta geyoꞌawa vali tupwai’.

36 Higelu na boda leꞌawai hilaugabaidi, na tupwana waga hinage baidadiyao, 37 na ꞌwavilivili mwalaꞌina itowama, ta bagodu wagai ihiwadoꞌodoꞌowei ta muhamuhana hihanene. 38 Na Yeisu waga aiyiuwai ana uludai bada imwauwiyaꞌo ta iꞌeno iꞌiwahiꞌo, na ana taumulitaone hivavanoine ta hiwalo, ‘Taubada, utowolo ta uhaguigita mata dova ta tamwalowoi’.

39 Eeta Yeisu itowolo ta yaumai yo bagodu iloinaedi, iwalo, ‘Badagi ulaumwau yo udaumwali!’ Eeta yaumai itowalaumwau, na niꞌu maudoina idadaumwaline. 40 Na ana taumulitaone aidiyai iwalo, ‘Hava vehabana ammemeheuhine? Vedova nigele amyayemidiyegau?’

41 Na nuwadi hipwanopwano na himeheuhi, ta hibom aidiyai hiwalo, ‘Towaho havahava teina ta yaumai yo bagodu alinana hibenalei yo himumulitaeine?’

Copyright information for `KUD