Revelation of John 10

Tausagenawasa ehebo mayana peipa habuluna youyouna

Ehebo hinage tausagenawasa wahiwahiyalana galewaena iꞌaiꞌaituluma yaꞌita yaloviyena ihumauyoi, na uluꞌulunai hulele itowolo taꞌiꞌiliyei, na manina dova mahana, na aena dova aiwa alaꞌalahina. Tausagenawasanane nimanai peipa youyouna habuluna iꞌabi avivini na alaꞌalavateyaina, na iꞌaituluma ae tautuwana niꞌuwai iwutuwei, na ae ehaꞌehana baleꞌuwai. Na alinana mwalaꞌina iyoga ana benali dova laiyoni iyogayoga. Eeta yana yoga iꞌovi na tutu adi bagibagili 7 yana yoga hiyeyemaihane. Tutuwone alinadi yabenaledi ta ebeha yaleledi, na galewaena alina yabenalei iwalo, ‘Tutu alinadi hitau 7 bada ubenalediꞌo udawanidi, na havena uleleleledi’.

Eeta tausagenawasane ibom yaꞌiꞌitawa niꞌu yo baleꞌu aidiyai itowotowolowa, nima tautuwana iꞌabihini galewai, na iꞌawa Tamada Yaubada yehanaena iya miyamiya vateyaina, na hinage iya galewa maudoina, yo baleꞌu maudoina yo hinage niꞌu yo ginauli maudoidi holadiyai, adi tauyemasele. Na tausagenawasanane iwalo, ‘Bada hauga iꞌahubaliꞌo. Ta mata tausagenawasa sebenina yana yoguli iyuvi na Yaubada yana nuwatuwu dawadawanidi maudoidi iveꞌovidi, hava yana taupaihowao hiya neta tauwalo mahalavao mwalona aidiyai iwalo mahalavaediꞌo’.

Na alinawa galewaena yabenale mugaiyeiwa hinage aliguwai iwalo, “Ulau peipa youyouna alaꞌalana tausagenawasane itowotowolo niꞌuwai yo baleꞌuwai nimanaena uvai.” Eeta yalau tausagenawasane ainai peipa youyouna habuluna yaꞌawa noiyeine. Ta peipa youyouna habuluna imohegau na aliguwai iwalo, ‘Inamwanamwa, uvai, uꞌai. Na haugana utonoli, howola ana abele diyamwai ulautowoi, na hesi awamwai ana amna gawawalina, dova mwagagau’. 10 Eeta peipa youyouna habuluna yavai yaꞌai, na awaguwai ana amna igawawali, dova mwagagau, na hesi yatonoli na diyaguwai yalautowoi iꞌabele alili.

11 Na hinage aliguwai iwalo, ‘Owa mata Yaubada yana walowone bodao yo abaloinao yo alinao yo tauwasawasao vehabadi uwalo mahalavauyowedi’.

Copyright information for `KUD