Revelation of John 17

Waihiu mehemeheꞌayona

Tausagenawasao 7 mayadi vedi 7 Yaubada ainaena, ehebo aidiyena ilaoma na iwalo aliguwai, ‘Ulaoma yaveꞌitago Yaubada yana lauvetala waihiu ainai yana meheꞌayo vehabana, na taumeheꞌayone ana nuwamasele neta dalava mwalaꞌina weꞌaha bagibagilidi ewadiyai imiyamiya, na baleꞌu ana tauwasawasao pwanoli ainai hiwahiyala taumeheꞌayone baidadi, na ainaena taumiya baleꞌu maudoidi lauhapuli mumuganane hinuma na hiyauyaulene.’

Na Aluꞌaluwa Veꞌahihi ainaena yalautowoi dova tausagenawasawa ilauvaigau tupwa balabala awawai, na waihiu ehebo yaꞌita lagulagu hawahawawalina ainai igelu, na lagulagunane tauna maudoina ainai yeha yababadi hileledi, na uluꞌuluna ana bagibagili 7, na waꞌiyanao ana bagibagili 10.

Na waihiune ana aleꞌo hawahawawalina dova wasawasao adi aleꞌo, na ana pasao goula yo gaima wasawasa yo epo, na nimanai vedi goula iꞌabi avivini, bada iꞌoiye mwauyaꞌo mumuga yababana ainaena, pwanoli vehabana. Na uluꞌulunai yehana hilele, na ana nuwamaselese dawadawanina iwalo, ‘Babiloni mwalaꞌina, neta taumeheꞌayo yo taupwanoli yababadi hinadi’.

Na waihiunane yaꞌitayaꞌo, Yaubada yana tomowao yo Yeisu ana tauwalo moihao yadi mwalowoiyena ꞌwahinadi inumadiꞌo, na ainaena iyauyaule ta nuwagu ipwanopwano waihiunane ana ita vehabana.

Eeta tausagenawasane iwalo auligau, iwalo, ‘Havena nuwam ipwanopwano, mata yalivahi alimwai hava waihiune na lagulagune ainai igegelune iya uluꞌuluna 7 na waꞌiyanao 10 adi nuwamasele. Lagulagune uꞌitaꞌitane mwalona mayawahina na bada imwalowoiꞌo, howola abo imahalava guda mwalaꞌina ainaena ta ilau, na mata hiveyababa moiha. Na tomowa taumiya baleꞌu, yaiyadiwo hiya yehadi Yaubada nigele iyaleledi yawahi bukina holanai, haugana baleꞌu ana yemasele mugai ainai, hiya lagulagunane mata hiꞌita na nuwadi ipwanopwano, wuwuna mwalona mayawahina na teina hauga imwalowoiꞌo, na howola abo imahalavauyoma.

‘Ebe nuwamasele alimwai, uhanapu ebeha uluꞌulunane 7, neta oya adi bagibagili 7, na aidiyai waihiunane imiyamiya, na ana nuwamasele hinage tauwasawasao hitau 7, 10 na 5 aidiyena bada hibeꞌuꞌo, na ehebo teina taꞌi howola iloiloina, na ehebo howola nigele iyamahalava, na haugana imahalava mata hauga ubwaꞌubwana imiyamiya.

11 ‘Na tauwasawasaone 7 yadi loina mata iꞌovi, na tauwasawasa teya yadi bodane ainaena neta lagulaguwa mwalona mayawahina ta imwamwalowoiwa mata adi boda iyemutulai na hesi mata ilau ta imwalowoi na abo hilobai.

12 ‘Na waꞌiyanao 10 uꞌitadiꞌo neta tauwasawasa adi bagibagili 10, hiya nigele hiyavetuwuni na hiloina, na howola abo hiloina, hauga ubwaꞌubwana taꞌi ainai lagulagunane baidadi.

13 ‘Hiya hitau 10 yadi nuwatuwu ehebo, neta nuwanuwadi yadi wahiyala na yadi loina hitalamwedi lagulagune ainai. 14 Eena mata Lami ainai hiꞌaleha, ta Laminane iwahiyala alili, wuwuna iya babadao yadi Taubada, na tauwasawasao yadi Tauwasawasa, na hinage iya yana vesinuwaena iyogaedima ana taumulita moiha baidanao.’

15 Na tausagenawasa aliguwai hinage iwalo, ‘Weꞌahaone bada uꞌitadiꞌo, aidiyai waihiune taumeheꞌayone imiyamiyane, adi nuwamaselewo neta bodao yo huhuwo yo alinao. 16 Na waꞌiyanao 10 yo lagulagune hiya uꞌitaꞌitadine mata howola abo taumeheꞌayone hiveꞌalehaei, yo hiveyababa moiha ta mabumabugewana imiyamiya, yo hinage bunumana hiꞌai, na hilihiliyana aiwaena higabu. 17 Wuwuna Yaubada bada atediyai ivenuwamwauwediꞌo ta yana nuwatuwu hipaihowai, neta yadi paihowa eheꞌehebona yo yadi wahiyala na yadi loina lagulagune himohei, na iya iloina ana higa Yaubada yana walowone ipaihowaidi.

18 ‘Na waihiune uꞌitaꞌitane, iya dalava mwalaꞌina, na iloiloina baleꞌu ana tauwasawasa maudoidi aidiyai.’

Copyright information for `KUD