Romans 10

Tahiguwao, walo moiha yagu bodaone vehabadi yanuwanuwatuwu mwalaꞌina vedova na livahi hilobai, ainaena hauga bagibagilina vehabadi yaꞌawaꞌawanoi wahiwahiyala Yaubada ainai. Yahanahanapuidi ebeha Yaubada vehabana hiꞌaiꞌaipate wahiyala, na hesi nigele ana amwaha moiha ainaena hiyalau. Amwahanane iyababa, ainaena hiya yadi nuwatuwu himulimulitaedi, ta ebeha ainaena Yaubada iꞌawa dumwaluwaedi, na hitowoi ahaya, wuwuna Yaubada yana nuwatuwune adi awadumwalu vehabadinane nigele hiyatalamyowedi. Eeta Mosese yana loina neta Besinana itomvehuluyaꞌo, ta ebe yaiya Besinana iyemidiyei mata awanamwanamwa ilobai Yaubada ainaena.

Yaubada yana livahi tomowa maudoida vehabada

Mosese yana loina ada awadumwalu vehabana, na ilele, iwalo, ‘Ebe yaiya loina maudoina imulitaedi, mata yawahi ilobai’. Na teina taꞌi ita yada yemidi ebeha Yaubada ibom iꞌabiye dumwalugita, wuwuna ginauli teina vehabana Buki Veꞌahihi yana walomahalava ainai iwalo, ‘Havena teya alimiyena inuwanuwatuwu iwalo, “Yaiya mata ihae galewai?”.’ (Ana nuwamasele ebeha yaiya Besinana ilauvaiyama?) Na hinage havena yaiya alimiyena inuwanuwatuwu iwalo, “Yaiya iꞌaitulu baleꞌu elauhanai?”.’ (Ana nuwamasele ebeha yaiya Besinana iꞌabiye towolouyoi mwalowoiyena?) Na hesi Buki Veꞌahihi yana walomahalava dumwadumwaluna iwalo, ‘Walonane vahalimiyai imiyamiya neta awamiyai yo hinage atemiyai’. Eeta ai yemidi vehabana aguguguguya. Ainaena ebe Yaubada nuwanuwada ilivahigita awadaena tatalam, tawalo, ‘Yagu Bada owa Yeisu’, na atedaena tayemidi moihana neta Yaubada Yeisu mwalowoiyena iꞌabiye towolouyoiyaꞌo. 10 Wuwuna atedaena Yaubada tayemiyemidiyei na imwau yedumwalugita, na awadaena tawalowalo mahalava, ta ilivalivahigita, 11 dova Buki Veꞌahihi iwalo, ‘Ebe yaiyadiwo hiyemidiyei, mata nigele hinimaya hiyalobai’. 12 Eeta nigele teya wahei alidai iyamiyamiya, ai Yudeya na omiu nigele Yudeya ahiꞌahipudai, wuwuna maudoida ita yada Bada. Ainaena ebe ainai taꞌawanoi mata awanamwanamwa mwaumwauna tavai. 13 Dova Buki Veꞌahihi yana walo, ‘Ebe yaiya yehanaena iꞌawanoi, mata ilivahi’.

14 Na moiha, tomowa nigele howahowana na livahi vehabana hiꞌawanoi ainai, ebe nigele hiyayemidiyei. Na ebe nigele hiyayemidiyei mata vedova wasanane hibenaleine. Na nigele howahowana hibenalei ebe nigele yadi tauguguya. 15 Mata vedova wasane namwanamwana higuguyaei ebe tauguguyaone nigele hiyavetamaledi? Dova Buki Veꞌahihi ainai iwalo, ‘Tauguguyaone hiya wasa namwanamwanane higuguyaedi iyawedi inamwanamwa alili’.

16 Na hesi tomowa tupwadi wasa namwanamwana nigele hiyaꞌawa abiyei, dova Aisaya iwalo mahalavaꞌo vehabadi, iwalo, ‘Bada, yam walo teina vehabana nigele hiyayemidiyegau’. 17 Eeta yemidi wasa ainaena ilaolaomane. Na wasana neta Besinana guguyana ainaena ilaolaoma. 18 Na yapanivila Yudeyaone bada yana walone hibenalenaꞌo, bo nigele? Bada hibenalenaꞌo, wuwuna Buki Veꞌahihi ainai iwalo:

“Yadi guguya bada dalava maudoina hibenalenaꞌo,
wuwuna baleꞌu maudoina ainai walonane hiwalo mahalavaenaꞌo”.
19 Na vedova? Walo teina vehabana Isileli hinuwamaseleꞌo bo nigele? Bada hihanapuiyaꞌo, wuwuna Yaubada mwalona Mosese ainai iwalo:

“Omiu Isileli, mata yagu paihowa ainaena vali tomowa amꞌalomagigiliyedi,
yo hinage ammodiꞌiniyedi, nigele Yudeya vehabadi.”
20 Aisaya hinage iwalo wahiyala Yaubada yana walo vehabana iwalo:

“Yaiyadiwo, nigele hiyabehabehaegau hiya hilobaigauꞌo,
na hiya nigele hiyapanipanivila vehabagu,
bada aidiyai yaꞌabiye mahalavauyoigaꞌo”.
21 Hesi Isileliwone vehabadi iwalo:

“Hauga maudoina yayogayoga ebeha hilaoma aliguwai,
na hesi hitaꞌwataꞌwataegau,
wuwuna hiya tauꞌabitauꞌwata”.
Copyright information for `KUD