Romans 2

Yaubada yana lauvetala

Augeluwo havena ami geluwo yadi mumuga vehabana amꞌawa yababaedi, wuwuna ebe amꞌawa yababaedi na omiu hinage mumuga ehebonane ampaipaihowai neta, ambom amꞌawaꞌawa yababaegomiu. Na tahanapuiyaꞌo ebeha Yaubada ibom ilowoinanei na taupaihowa yababaone ana dumwaluwena ilauvetalaedi. Ainaena augeluwo omiu, ebe vali tomowa amꞌawaꞌawa yababaedi havena amnuwanuwatuwu ebeha Yaubada yana lauvetala mata nigele amyalobai. Nigele! Mata iloinaegomiu hinage, wuwuna mumugane omiu dova ampaipaihowaidi. Na havena Yaubada yana velau amꞌawaꞌawa ginauli yabayababaedi, wuwuna iꞌatemuyamuyaegomiu na vehabamiu iꞌalama iꞌita ta ebeha yami yababa ainaena iꞌabiye buigomiu ainai.

Ta omiu yami talinatui yo yami tuluhayaiyai vehabana ami maiha yababana amhiwahiwai ewanai. Eeta haugana Yaubada yana modiꞌini yo yana lauvetala dumwadumwaluna iꞌabiye mahalava ana ahubena ainai ami maiha mata imwalaꞌi alili. Wuwuna maudoida mata ehebo ehebo alidai iyemaiha, hava yada paihowa dova. Tomowa tupwadi amwaha namwanamwana hipaihowai alaꞌalabiliyei ta ebeha Yaubada yana vewasawasa yo veꞌahihi yo velau miyamiya vateyaina hibehaei, ta hiya mata Yaubada yawahi vateyai imohedi. Na hesi tupwadi tomowa hiꞌuluꞌuluyaiyai alili ta mumuga namwanamwana hitaꞌwataꞌwataei, na mumuga yababana himulimulitaei, ainaena ebe Yaubada imodiꞌiniyedi mata iloinaedi. Eeta yaiyaidiwo mumuga yababana ana taupaihowao mata loina vitaina yo muyamuya mwalaꞌina hilobai, mugai Yudeyao na mulitai abo nigele Yudeyao. 10 Na taumumuga dumwalu maudoida mata Yaubada yana vewasawasa yo veꞌahihi yo nuwadaumwali imohegita. Ita Yudeya Yaubada mata iyemaiha mugaiyegita na abo hinage nigele Yudeya. 11 Yaubada mata maudoida iloinaetoyatoyawaegita.

12 Na yaiyadiwo howola Mosese yana loina nigele hiyabenalei na mumuga yababana hipaipaihowai mata nigele iyalauvetalaedi yadi yababa vehabana ta maudoidi mata himwalowoi. Dova hinage Yudeyaone hiya bada Mosese yana loina hihanapuiyaꞌo na ebe hilauhapuli mata ilauvetalaedi Mosese yana loinao aidiyena. 13 Wuwuna nigele loina ana benali aꞌava ainaena Yaubada iyamwau yedumwalugita na hesi yana loina ana paihowa ainaena. 14 Hiya nigele Yudeyaone loinane Mosese ainaenane nigele aidiyai, na hesi hiya yadi nuwatuwuwena hipaihowa hava namwanamwana, neta bada hiya yadi loina. 15 Ainaena yadi paihowa aidiyena tahanapui ebeha atediyai loina namwanamwana imiyamiya dova Mosese yana loina, ta hiya yadi mumuga hihanapuidiꞌo neta aiteya yababana na aiteya namwanamwana. 16 Wasana namwanamwana, bada yaguguyaenaꞌo alimiyai ta mata lauvetala ana hauga ainai Yaubada Yeisu Besinana iloinaei ta ibom tomowa yada nuwatuwu dawadawanidi vehabadi ilauvetalaegita.

Yudeya vehabadi

17 Na omiu vedova? Ta ambom amꞌabiꞌabihihiyoigomiune na amwalo, ‘Ai Yudeya Yaubada ihaguhagugai na yana loina imohegai Mosese ainaena’. 18 Eeta Yaubada yana nuwatuwu bada ahanapuiyaꞌo wuwuna loinanane bada iveꞌitagomiuꞌo, mumuga namwanamwa alilina vehabana. 19 Eena ambom amꞌawa hanapuwegomiu ebeha tomowa mehegibugibudi adi taumugaiwo, yo hiya mumuga guguyou ana taumiyao, amꞌabiye maseledi. 20 Na yauyauledi yo hedaheda aidiyai amvetauveꞌita, ebeha omiu Mosese yana loina ainaena nuwamasele na walomoiha amvaiyaꞌo. 21 Owa uveꞌiveꞌita tomowa aidiyai, na vedova owa? Ebe aidiyai uwalo, ‘Havena aivavali’, na owa, uꞌaiꞌaivavali? 22 Na hinage ebe uwalo, ‘Havena ampwanopwanoli’, na owa upwanopwanoli. Na ebe uwalo yau yaubada oyaꞌoyama yataꞌwataꞌwataenaꞌo, na owa yaubada oyaꞌoyamane yana vada tapwalolowai uꞌaiꞌaivavali? 23 Omiu amwalo haehae alili amwalo, ‘Mosese yana loina alimaiyai imiyamiya’, na hesi loinanane nigele amyamulitaedi, ainaena yada Yaubada ammwaumwau dobiyei. 24 Dova Buki yana walomahalava, iwalo, ‘Omiu Yudeya yami mumuga ainaena nigele Yudeya Yaubada hiꞌawa yabayababaei’.

25 Na moiha omiu Yudeya Abelaham yana ilaꞌilala hapi taumiyai imiyamiya. Na ebe Mosese yana loinaone ammulitaedi, ilaꞌilalawa hapine ginauli namwanamwana alimiyai, na hesi ebe loinanane nigele amyamulitaedi moiha ilaꞌilalanane alimiyai ginauli awaꞌawawa. 26 Na hesi nigele Yudeya Abelaham yana veꞌiveꞌilalane nigele taudiyai iyamiyamiya, na ebe loinadine hiꞌawa abiyedi hiya adi oleya dova ilaꞌilalanane aidiyai imiyamiya. 27 Ainaena omiu Yudeya howola abo nigele Yudeya hiwalo meheigomiu, wuwuna Mosese yana loina yo Abelaham yana ilaꞌilalane alimiyai imiyamiya, na nigele loinadine amyamulimulitaedi, na hesi nigele Yudeya bwagana nigele Abelaham yana ilaꞌilalane taudi ainai, Mosese yana loina himulimulitaedi.

28 Eeta aiteya tomowa ana veꞌiveꞌilala tauna hapi tomowa nimadiyena hipaipaihowai, neta iya nigele Yudeya moiha. 29 Hesi Yudeya tomowana moihana neta atenai veꞌiveꞌilalane. Nigele loina lelelelena yana paihowaena na Yaubada Aluꞌaluwana yana paihowaena. Nuwana tomowa teina dova mata nigele tomowa hiyanoꞌowedi, na hesi Yaubada mata inoꞌowedi.

Copyright information for `KUD