Hebrews 2

God nono ikine endinagledi kongun orkwa i taragl kande kaima pangwa

Yeglpre nono ka kaima punga i wakai ere akegidi i-wan moramga pangwa, ana ka i nono mina ta torwa sikrambuka. Okuna angelo wagle God kamo wakai ta iyu nono kowano wagle teingwa i ka kaima yene. Te yomba tau kamo i sende duglo boglkrikwa, ye yumbun ingwa.
2:2Epigl i God lo Moses tongwa ipre dungwa. Kisim Bek numa 19 endpi 20 kanamga. Ka Kisim Bek mina pangwa i angelo pre ta dikrukwa. Ba Juda yomba pir mendiglkwa i God Moses lo tongwa i angelo onguno mina yu teimedi pirkwa. Te Lo 33:2 ya Aposel 7:38 ya 7:53 ya te Galesia 3:19 ama kanamga.
Te nono God no ere-inambuka kamo dingwa i ta pirkun, ana nono sraglmere teke enamune? Ana yomba ere-yungwa mambuno i okuna Yaglkande yene dipene endungwa pirkwa yomba, kamo yu nono dinorkwa i ka kaima pangwa. Te God kamo ikra igle mina dipene endungwa i taragl teke pangwa ombuno dindre te diu ertre, te kimagl tau orkwa, ana Holi Spirit, kongun yumbusi tongwa i God prumere orkwa.

Yesus suwara yomba prapra no ikine endungwa

Dumo makan koragle God ere yenambuka ipre nono erme kamo di mounga i angelo wagle ta ditenan sugl moglkrikwa. Ba kamambuno pepa mina muno yegl ta beglko pangwa,

“Ye sragl yomba moglko
ene ye wedi pitne? Te yomba
wam ye sragl yomba moglko
ene ye wedi suglmo wakai motne?
Ene ye ere endingo, enge
sungagle ta angelo endingo
meglmara atne kra mogltre,
ana ene akeple dindre
kangiye kande yei te ana king
bre gaglmo mereyegl ende tenga.
Ene makandle taragl
kanekane ere yenga i ye
prapra sugl morambuka pre
i-wu ye kagle mina yei kondinga.”
2:8Buk Song 8:4-6. Ka Song mina pangwa i, yomba prapra pre dungwa. Ba yomba pepa Hibru mina muno boglkwa i ye eremogl Yesus wu yomba pindre ana yomba prapra angaino yumedi dungwa, yegl ana Buk Song ka du-pamere di Yesus mina taragl plau dungwa i dipene endungwa.

Te taragl kanekane pangwa i ye sugl moglkwa keme paingwa. Ipre taragl suwarata yoko yeikrukwa. Ba no erme ye sragl kanekane i ta sugl moglko kankunga.
Ba Yesus enge sungagle ta angelo meglmara atnekra moglkwa i nono kamga, sraglpre, ye yomba prapra pre goglko, ana God wakaimo i mina yomba akeple dungwa. Te Yesus nangiye giu pond gogltre, ana goglkwa pre God eremogl Yesus king bre gagl ende tendre, te kangiye kande tongo, ana Nem ambuglangemo mina suna moglkwa.

10 God okuna imbo moglko, te taragl prapra i ye mina plau dindre aimande pai mogl ongwa. God nangiglma prapra ere-inagledi prukwa pangwa ipre Yesus endungo ende atne undre giugogl ana goglkwa. Ye yegl ormara i nangiglma merkinde ikine endimbo heven suna wakai moraglmedi pre orkwa. Ana Yesus giugogl goglkwa ipre God ye kangiye kande tongwa. 11 Yomba ta orko yomba wu holi kaima eingwa yagle i ya te wu holi kaima pi kondingwa yomba i prapra bormai suwara meglkwa. Yeglpre Yesus angai ta goglkre na angrima wagle we dungwa. 12 Ye ka kor dagl yegl dungwa,

“Na ene kangin angrima
wagle meglmara dipene ende
tenaglka te ye kamambuno
dinamnedi makaisi moraglmara
suna igle na ene kangin mina
giglange dindre dembinsi
mitna imbo ende tenaglka.”
2:12Buk Song 22:22

13 Ye ka kor dagl yegl dungwa,

“Ana God sragl ta eragle
dungwa i kaima erambuka pre
na sugl kan moglka.”
Te kanno,

“God nangiglma wagle
na narkura i bogl akiye mounga.”
2:13Yesus kamo i Aisaia 8:17-18 mina ungwa. Yomba Hibru pepa muno boglkwa i Yesus eremogl yagl ambu tau meglmere kuno moglmedi ombuno dungwa mereyegl, i ye angiglma ya nangiglma meglkwa. Yomba tau God taragl erambedi sugl kanmeglko te Yesus ama sugl kanmoglkwa.

Yesus, nono akeple dina pre yomba nangino yungwa

14 Ana Yesus gak we dungwa i yagl ambu nangino ya bormai pango erme mounga ipre dungwa. Te Yesus erme ama wu yomba mounere kuno yegl mogltre te geglkwa mambuno i mina ana geglkwa yombuglo Satan ake moglkwa i Yesus ere kinde orkwa. 15 Ana yomba prapra makandle meglkwa, ye geglkwa mambuno ipre kundugl geglkwa i orko kane mereyegl pai meglkwa, ba Yesus undre kane i poko endungwa. 16 Na ka kaima ene diteinga, Yesus kongun prapra orkwa i angelo ta akeple dina pre ta erekrukwa. Tamanga, ba ye orkwa i Abraham gawama akeple dina pre orkwa. 17 Ana taragl yegl kanekane erambuka i mina ye angiglma wagle meglmere yegl kaima kuno ere morambuka. Yegl ere yene pris kande mogl yomba mitno gogl tendre, te God kamo prapra duglo bogl kongunmo orko ana God eremogl yomba prapra tandaglmeno koko ende tongwa. 18 Baglnu kanekane ye mina plau ditongo ye giu goglkwa. Yeglpre yomba ta baglnu kanekane plau ditenan ana ye akepledi tenambuka.

Copyright information for `KUE