Hebrews 3

Yesus kangiye kande kaima pai mitna ende Moses kangiye engre tongwa

Angrima holi wagle, God heven suna mogltre ene ama agle diyungwa. Ene Yesus pre poglodi pir kuno eraglkwa, i ye aposel mogltre te pris kande moglkwa i nono pirngi dindre kangiye dinongugl endumga. God kongun ta Yesus erambedi tongwa i prapra ere kondungwa. Ana okuna Moses eremogl God dumere ere God yombamo mina ye God yungumo mereyegl meglko, ye God kamo prapra dumere yeglkra Yesus ama orkwa. Ana yomba ta yungu keingwa yagle i kangiye kande pai mitna ende yungumo yoko i tenambuka. Te kuno yegl keunde, Yesus kangiye kande pai mitna ende Moses tongwa. Ipre yungu prapra yongwa i yomba suwarata keinambuka, ba God keingwa yagle moglkwa ye taragl prapra beke yongwa. God kongunmo yomba Moses mogltre, ana God kamo dumere ere ana God yungumo mundu yene kongun orkwa. Te God okuwo ka ta dipene endinambuka ipre Moses kamo dungwa. Ana Yesus Krais God wam moglkwa pre yomba prapra God yungumo mereyegl meglkwa i sutno morambuka. Te nono ka ake giglendi norambedi pre sugl kan moun. Ana nono God yungunmo mounga.

God kamo sendingwa yomba wakai ta moglkrikwa

Yeglpre, Holi Spirit ka ta dungwa i:

“Erme ene ye nungo embriye pirimbi,
ana ene nomane gigle
dikriko, te okuna ene kowano
awano wagle God dumere
erekriko, te makan waule na
ta erimbo ene kanamedi pre erikura.
Igle ene kowano awano
wagle na ta erimbo
kanamnedi pre kanekane
erikwa, ana buglayungu 40
na sragl taragl erika i ye kaningwa.
10 Ana mambuno yegl mina
na dena kumburo yomba epigl
i tendre, dinga, ‘Ye nomano
na narekre ende pere pindre,
te na konbauna i ye kanpogl
sikrikwa. Te na kana pamere erekrikwa.’
11 Ana na dena kumbruko
ka giglendi yegl dipandiglka,
‘Yombamo i ta ende suna
undre mogl argan ere pikraglkwa.’”
3:11Buk Song 95:7-11

12 Na angrima wagle, ene kanpogl siyo, ene meglmara suna igle yomba tau nomano kinde panan ya te pirngi dikraglkwa, God kor aimande nem moglmara i ye mokono tenaglkwa. 13 Ba ande enge suwara suwarandi ene erme we dingwa. Yeglpre engenge ene suwara suwarandi kamambuno di angro ambaro ta akegiglendi tenaglkwa. Aglau eran tandaglme mambuno i angro ambaro ta bakagl tendre deno munduno sigegl dite dinambiwo. 14 Nono okuna kamambuno punga enge, Krais bogl giglendi bengane yomgra, komnaiye oun ere yegl keme ere mogl omun engeno dundinambuka. 15 Kamambuno pepa mina yegl muno beglko pangwa i:

“Ene erme God ye nungo
embriye pirimbi ana ene
nomane akegigle dikriyo,
okuna ene kowano awano
God dumere erekre kamo sendingwa.”
3:15Buk Song 95:7,8

16 Okuna yomba iramere God ka dungo nungo embriye pirkwa ba dumere erekre kamo sendune? Yombamo i okuna Moses eremogl Isip kamun auro yend menda pikrutuno? 17 Ana yomba ira mere God buglayungu 40 dem kumbro tome dine? Ana tandaglme erikwa yomba God dem kumbro tongo ye makan waule yangesi geglkwa. 18 Yomba ira pre God ka gidi dindre na mogl ir singwa dumo ta ye ende suna ukraglme dume? Ye kamo sendingura yomba pre dungwa. 19 Yeglpre nono pirkan ounga ye ende suna enamunedi erikwa ba manga, sraglpre ye pirngi dingwa paikrukwa.

Copyright information for `KUE