Matthew 4

Satan eremogl Yesus yange sinambedi bagl nusungwa

(Mak 1:12-13 te Luk 4:1-13)

Okuwo Holi Spirit eremogl Yesus auro yendpi dumo waule yomara ongwa, i Satan di nusinambuka pre auro yongwa. Igle Yesus ermine 40 ya te enduwer 40 kaiya mawagl ere nekre mogl kindan goglkwa. Ana bagl nusinambuka yaglmo ye moglmara undre yegl ditongwa, “Ene God Wam kaima motnga panan kombuglo moglkwa imer dimin wu bret yeingwa no.”

Ba embi Yesus yegl di ikine endungwa, “Kamambuno pepa mina muno beglkwa pangwa, ‘Yomba bret keunde ta nendre kor aimande moglkraglkwa. God dra mina ka prapra ungwa i engenge pir sikasi moglpai eraglkwa.’”
4:4Lo 8:3


Satan aglke Yesus yendpi Jerusalem siti holi pindre ana God holi yungumo mina bolamugl punduno kaima endungwa andigl moglko. Yegl ditongwa, “Ene God Wam kaima motnga panan ene puglodi ende atne po. Kamambuno pepa mina muno yegl beglkwa pangwa:

“‘God angelomo ene pre
diendinan ye wu onguno
mina ene boglo ere mitna
endimbi, ene yange
kombuglo suwarata katn boglkrambuka.’”
4:6Buk Song 91:11,12

Ana Yesus yegl di ikine endungwa, “Ka ta ombugl yegl muno beglko pangwa, ‘Yaglkande ene Godnen ye ta eran kanagledi bakagl tekro.’
4:7Lo 6:16


Ba Satan aglke kordagl Yesus yendpi kamun muglo oltokuri kaima ta yomara endungwa moglko ana makan koglkoglo taragl prapra ya dumo kande koglkoglo yombuglomo ya bumbuno orkwa i prapra ombuno dite, yegl dungwa, “Taragl prapra kanga i na ene mundu tekondinaglka. Erme ene goglkun bondugl na dembina karaugl ere naro.”

10 Dungo Yesus yegl di ikine endungwa, “Satan, ene ende eglke po. Kamambuno pepa yegl muno beglko pangwa, ‘Yaglkande ene Godnen suwara dembiye karaugl ere tendre ana ye suwara kongunmo eratnga.’”
4:10Lo 6:13


11 Yegl dungo Satan eremogl Yesus kindekondo endongo ana angelo wu Yesus akeple dingwa.

Galili kamun Yesus kongun mambuno bogl orkwa

(Mak 1:14-15 te Luk 4:14-15)

12 Yesus prukwa Jon kane sime digo ana ye ende ikine Galili ongwa. 13 Ye Nasaret kamun kindekondo endpi Kaperneam kamun Galili niglmong bina moglpai orkwa, iwe Sebulun ya te Naptali yomba makanomugl.
4:13Okuna Israel yungu ombuno mina i epigl suwo Sebulun ya Naptali, ye Galili niglmong mangigl keipai meglkwa. Yesus wanmoglkwa enge, ye makano i Galili distrik makanmo ikine yongwa.
14 Sragl yegl orkwa i propet Aisaia ka dungwa pamara i kaima paiyungwa:

15 “Sebulun makan ya te

Naptali makan, konbo endpi
mundi nigl kande ongwa,
Jodan Nigle bina Galili
kamun igle Yomba Bina meglmara.
16 Igle yomba mim mina
meglkwa, erme ambuglange
kande sungwa kanigwa,
ye geglkwa mambuno pamara
wanmeglko, ambuglangesi
i-pene ende tongwa.”
4:16Aisaia 9:1,2

17 Enge igle Yesus mambuno bogl God kamo di pene endungwa, “Ene nomano yake teiyo. Sraglpre God kingdomo ene mina mangigl ungwa.”

Yesus disaipel 4 aglendi yungwa

(Mak 1:16-20 te Luk 5:1-11)

18 Galili Nigle bina igle Yesus wan pi kango angigle angigle suwo miurka. Saimon kangiye ta Pita we dingwa, te angigle Andru, ye fis ere simbrika yomba, yeglpre ye fis ere singwa gagl ende nigle ende miurka. 19 Yesus yegl ditongwa, “Ene na mokonamugl wiro, na beke teimbo ene yomba ere-inambrika.” 20 Ana tambre kana fis ere simbrika gatno kindekondo ana omara embrika.

21 Ye kurita ende inde pindre kango, Sebedi wam suwo Jems ya te angigle Jon neno Sebedi bogl fis gagl bot mina ake kuno ere meglko ana Yesus yagl suwo agle dungwa. 22 Ana tambre kana ye suwo neno ya te bot kindekondo ana Yesus omara mokomugl embrika.

Yesus kamambuno di yomba tendre ana yomba kinde singwa erewakai orkwa

(Luk 6:17-19)

23 Yesus Galili kamun prapra wu ikine ikine pi, makai yungu merkinde yomara pi God kingdomo ka wakai dipene endindre ana kinde imbo kanekane ere ende, te kinde singwa ere ikor ende tongwa. 24 Ye taragl orkwa i yomba diwai digo Siria makan prapra pirkondingwa. Ana yomba kinde kanekane sungwa i-wingwa. Nangino giugl singwa ya te spirit kinde bogl meglkwa ya te kuakiku singwa ya te mau singwa i prapra i-wingo, ana ye erewakai ere tongwa. 25 Ana Galili yomba merkinde kaima wingwa, te Dikapolis yomba ya te Jerusalem yomba ya te Judia dumo kande bina yei ende wu Jodan Nigle yomara koglo imbo i prapra Yesus omara mokomugl eingwa.

Copyright information for `KUE