Revelation of John 15

Angelo 7 ye taragl kinde kaima 7 ake meglkwa

Te na kaniga kamun mitna diu gaglebogl plau dungo na sipuglo dinga. I angelo 7 ye yomba erekinde eraglkwa pre taragl kinde kaima 7 ake meglkwa. Ana taragl 7 i mina God dem kumbrukwa ere, pradinan ana okuwo taragl yumbun ta plau dikrambuka. Te na taragl ta kaninga, i mundi nigl kande i glas mereyegl endi donga bogl sikuglmagl endigo potndi yongwa. Ana yomba kambu are ya te ye kuiyamo te kangiye nambamo engre atne endingwa i keunde mundi nigl glas mereyegl potndi yomara bina ye andigl meglkwa.
15:2Numa i mina ka merkinde, Moses kamo boglo pamere siye kuno pangwa. Moses okuna kimagl mere ertre Isip yomba ere kinde orkwa. Ana God mundi nigl gogl poimsi i koglkoglo endungo ana Israel yomba makandle suna ende pi Isip kondo ana mundi nigl bina andigl meglkwa. Ana Moses ya Israel wagle giglange suwarata di Yaglkande teingwa. Ka ta Kisim Bek numa 15 mina kano.
Ye God gitamo tongo akindre,
ana God kongunmo yomba Moses giglangemo dindre te Sipsip Nangigle giglangemo dingwa:

“O God, Yaglkande, ene
yombutn kande kaima
pangwa. Ene kongun prapra
etnga, i kande kaima pangwa,
no kandre ana pirpogl
sinamga mere manga! Ene
yomba prapra kingno motnga,
ene mambunon du-yene
pandre te kaima keunde pangwa!
O Yaglkande, ene suwara

kaima holi motnga. Ipre
yomba ira ene kundutn gogl
tekrambe? Te yomba ira ene
kangin di mitna ende
tekrambe? Tamanga. Makan
koglkoglo yomba prapra wu
ene dembin karaugl
eretenaglkwa. Sraglpre, ene
mambuno du-yene etnga i
ombunodi wu pene pi kondungwa.”
Yegl di kendingo okuwo na kaninga kamun mitna yungugl kra God holi yungumo sel dra yauro yongwa i ka kaima dipene endungwa. Ana angelo 7 ikra taragl 7 kinde kaima yomba erekinde eraglkwa ake indre ana God holi yungumo mina kondo ende menda wingwa. Ye gagl suna wakai-yene pesungwa ende pandigl te gol kumagl piutno mina dengwa. Te taragl 4 kor-meglkwa mina suwarata gol dis 7 God kor aimande aimande moglkwa dem kumbrukwa i kausi moglko indre ana angelo 7 wagle tongwa. Ana God ambuglangemo ya yombuglomo mina endi inge wu God holi yungumo mina kau sungo ana yomba ta ende yungugl enaglkwa kuno erekrukwa. Tamanga. Yomba yungugl pikre sugl mogl-embi ana angelo 7 wagle taragl kinde 7 ikra kongunmo ere kondinaglkwa.

Copyright information for `KUE