Revelation of John 7

Israel añarab poriz ñetiv

Pot tahan ne am etet hehon enzolihol 4 hamar sa garë hat em garë hat hezaek, terï 4 poñik rouvat het teptepiñ natihanañ natihanañ uramah-poñ bagaa batahan, hamarar iv haveñir pulorizaroh teptep nao naur, ma zir bi do do nat heh. Tahan ne etehon enzol modap gitap berevamahaekanañ berevat, God pohao het hezapuz giriv bat heh. Met girï pov pim añarab au hahan hezariz heriñik zelit naih tamegivoz zut mevizapanezao bat, het enzol modari teptepiñ bagaa batat hehaek, hamarar iv haveñ bahorï batapanez mañahan heh-porin ñeo ñarah epat mañah, “Ae, ari am gaa tepeken ne garos Godiz añaraboz taevañik redeo mevizomanahoh, ari hamarar iv haveñir zir bi bahorï batepek.” Pot hahapuh pi aban Israel popuz rohol 12 poriz iz mimiholoz toguñ 12 ravat heh-añarab poriz taevañik girï pov mevizahapuh rekö hahan 1 andet 44 tausen pot ravah. Met Israel togü poñiz abatañ ev.

Met Zuda popuz togutakanañ nari 12 tausen porih memevizah.

Met Ruben popuz togutakanañ nari 12 tausen porih memevizah.

Met Gat popuz togutakanañ nari 12 tausen porih memevizah.

Met Asa popuz togutakanañ nari 12 tausen porih memevizah.

Met Naptalai popuz togutakanañ nari 12 tausen porih memevizah.

Met Manasa popuz togutakanañ nari 12 tausen porih memevizah.

Met Simion popuz togutakanañ nari 12 tausen porih memevizah.

Met Livai popuz togutakanañ nari 12 tausen porih memevizah.

Met Isaka popuz togutakanañ nari 12 tausen porih memevizah.

Met Sebiulan popuz togutakanañ nari 12 tausen porih memevizah.

Met Zosep popuz togutakanañ nari 12 tausen porih memevizah.

Met Benzamen popuz togutakanañ nari 12 tausen porih memevizah.

Map poriz God au hahan hehaek parum taevañik pim redeo girivonañ memevizahan ne eteohö.

Añarab ahovokaro het hah

Met ne maot etehon añarab ahovokaro map poek heh, met napuhö rekot paru poriz rekö nakaotü. Met pori zeir ham maporezaroh herï nañir nañinañ het ñe navor nao haoharihanañ narizaro emat poek map togü manat heh-pori, paru dim aerahol meehapuh tek tinatak toutat heh-popur sipsip ropuz havasik het parum marañik ramï taeñ bat balei hat het, 10 ñeo ñarah epat hah,

“Met God ni tek tinatak toutat hezapur sipsip rop aripimauhö dei horï hegiek aripimeri maot ba avategin tin hez.”
11 Pot hahan enzol mapori tek tinatar gogotaz korav añavairir pei birirï hehariz okat epat hehaek, paru Godiz nakoe rariñ rez bareñat tok rizat pim abatao bat hel batat, 12 epat mañah,
“Rotap ok hah. Ni deim alizavonañ ahop ev, hodad tinavor kezavoz maup, tin etameñivoz niin biñ nañameg. Ni nenap añaraboz abat ahovonañ koravop ravat hez, povoz pohao nimaz biñ nañovai sohok. Nen rotap.”
Pot enzolihol hah.

13 Pot hahan gogotaz korav añavairi 24 porihanañ nap neen epat at nañah, “Met dim aerahol meet hez-okori paru tairari, ma taekanañ ev emat hez?” 14 Pot at nañahan ne epat mañoh, “Nem ahop, ne unun, oñ ni hodad. Povoz neen bar nañ.” Pot mañohon pi epat hah, “Met sipsip rop añaraboz horï toohavoz hañiv bat ñomahapuh paru okori hamarah heharah pim uvevok parum horï tooh-poñ ba olah. Tahan modari honoñai povor kao ahoam metoohan paru kaev narav, oñ rez kek tat tooh, povoz ev emat het dim aer tin okori meet ok hez. 15 Tat paru orah rezah Godiz zei ahomakeh pi tek tinatak toutat hezapuz nakoe het, pimaz biñ ravat pim asit metamahan piuhö kumbai metat hezan, paru pim irih tinaharam hez. 16 Met sipsip rop tek tinataz lopotak hezap parumaz korav ahop ravat hezaek, bavizat sohot pohao tin het hepanez iv tin porin mañairat meñepanen nohot pohao tin het poek hepan. Povoz paru gipizor ivovoz maot gin nañomotü, ma gitapur itiñadek maot itete natotü, oñ God parum garos iñir zakep tooh-pov bavon batapanen tinaharam hepan.” Pot korav añavai pop hahan ne hateveteohö.

Copyright information for `KUP