1 Corinthians 9

Pol Jisas himache hinga ri etisini Gotri tau ri randau keke ya ri toro nambwe.

Gotri miya ki chikindau sumbu foti ai okokona numbwa a sirinani a wosi hinga'a? E, ani Jisas himache hinga ani eti nambwe'e? Woro ani nui Apukolaka Jisas rini ani hei nambwe'e? Apukolaka tau a randawani sembe ku haro ti keke kunu ai tau ki sukwaro ahirahi nambwe'e? Wosiwani hima fwele ete wu hambwandau, ani Jisas himache mina. Woro o hinga mina, kunu ku hambwandau, ani kunu ani okularo keke Jisas himache. Ani Apukolaka himache hinga mwe naha a dau sumbu ni amwei sawendau ahirahi mwe ti kunu sa to.

Hima fwele a randau tau tini wu ani kilindawani mwanji wasa ka hinga wunu a sawendau: Wo nui Gotri tau ki sukwaro ya ki ahirahi ga uku sumbwe ga nui okokona numbwa nu sirinani nu rani nu a hinga'a? Nu ano. Woro o numbo ni nu sirinanda nambwe. E, nui okokona numbwa nu sirinani sembe haro humwe ga funda nu ichi'uchawa nunu wu yakwa hinga'a, kale Jisas Himache fwele, Apukolaka ri hipache fwele, e, Pita okwe, wu wosiro hinga? Ele Jisas himache lei nindo ki ka ani ga Banapas ga sindombwa si okokona numbwa si sirinani ahirahi si rani si ano ya tau sihi ti si hanja'ai hinga'a? Si hanja'aino. Woro o numbo ni si sirinanda nambwe. Hima fori au anaye hima hinga ri dau ti, rini rinjenga ahirahi le ri wakindau'u? Hinde na hima to ahirahi le rupwa ki ri kisini ri ahirahi le ri anda nambwe? Hinde na hima to ele omwe ni ri aulindani rinjenga ele omwe muku ti ri anda nambwe? Woro, nunu o sumbu hinga nu hanja'airo. Do mwanji hinga a bwandau ti, hima lei inaka tunumbwa a sirinani a bwandau'u? Ka mwanji hinga ti, Moses kairo Gotri lo mwanji ti okwe sawenda nambwe'e? Mina. Moses kaisiro Gotri lo mwanji ki ka hinga sawero: “Bulumakau fori witi fweleni yitindawa apa takisopo rihi ti kupu tiki rini injisi kei.” Ka mwanji bulumakau numbwa ri hambwasini ri bwaro'o? 10 Mina, nunu hima le okwe nunu keke ri wondau. Mwe naha, do Gotri mwanji nunu ni ri hambwasini ri sawero. Woro ka sumbu ni ma nu hambwa: Tau tiki nuwe wunda hima ri, e, ahirahi mwe iwani eindau hima ri, rini ahirahi tipa fwele ri ra'ai kinani ri hambwasini o tau ri randau. 11 Nunu himamwale tini kui sembe we ki ahirahi wapa hinga nu siro ti nawa, sembe tupu nuhi tini okulano ahirahi mwa'ambwe le kunu ki sukwaro fwele nu rano sumbu hinga ti, kapwa'a? 12 E, hima fwele Gotri wunu ohounawani wui okokona ki kunu ki ya mwa'ambwe wu torosindau ti nawa, nunu okwe kunu ki o hingambwa nu toro kinapo wunu ni funda nu dikisini ya torono kwambu metengei naha nunu ku hakoro. Woro, ya mwa'ambwe kunu ki nu torono numbo ti nu hanja'airo. Hinde wowani, nui okokona ti, Kurais ri mwanji kipe ni nu bwawa hima le mendino numbo tini nu ichakino keke o sumbu hinga nu wosiro. O keke ele nomo hinga nu randau. 13 Woro ka sumbu ni ku hambwanda nambwe'e? Gotri aka ki tau randau hima le, wunu Gotri aka tau wuhi kumbwa ahirahi wu rani wu andau. Gotri ni angu'omwe handau tei ki tau randau puris hima le, wunu o tei ki tundau omwe tipa leni wu andau. 14 Woro hingambwa Apukolaka ka lo mwanji ni ri owero: Gotri mwanji bwani indau hima le, Gotri mwanji wu bwawani mendindau hima leto hima tape wuhi wunu okulano mwa'ambwe le sa wu ha.

15 Woro ani Apukolaka ri ani ohounaro sumbu ele ni a sirinani a wosi nambwe. Woro do chengi a kaindau ti, ele sumbu hinga ku ani wosi kinani a kainda nambwe. Mina. Ani hasiwa pwe ku bwe wosi! E, kipe naha ani hambwasini ani eripe'aripeni a sirinandau numbo ahi ti, apa hima fo tani ichaki hinga. Mina. 16 Gotri mwanji a bwandau sumbu ahi keke hima le hi kipe ani na hinga. Mina. Ani numbo ba foni ani hambwa numbwa, o tau numbwa a ra ki Gotri ani ekichasindau. E, Gotri mwanji a bwa nambwe nawa, apa kapwa naha ki a dano. 17 E, ai inaka ki ani hambwasini do tau a toroni a randapo, o tau keke ya mwa'ambwe wasa hinga a torokoro. Do tau a randau ti, Gotri ani ekichasiwani a randau. O keke Gotri to ri ani ondiyasiro tau tumbwa ete a randakonda. 18 O hinga nawa bwele ya hinga tini a torokondau? Ya a torondau ya mwe ti ka: Gotri tau ni randau hima ri, Gotri rini ohounawani ri torondau ya mwa'ambwe hinga ani a toronda nambwe. Woro Gotri mwanji kipe ti ele hima ni nimba wunu a bwani ani indau sumbu hinga to ya ahi.

Pol ele himiyama hurahama wui tau ra himache hinga ri dau

19 Ani Gotri miya ki do nuwe kipe hima fori ri tako tokwe a dasini nindumwasari tau ti a randa nambwe. Woro hima miyafo a rata kinani ai okokona ki ele hima wui tau ra himache hinga a wa'aihiro. 20 O keke Juta hima kupu le wunu a rata kinani Juta hima kupu le wui miyaningisopo ki Juta hima kupu hinga a wa'airo. Ani wui lo mwanji tako ki a da numbwa, woro ele lo mwanji tako ki dau hima le wunu a rata kinani, ele lo mwanji ni sirinandau hima hinga a wa'airo. 21 Gotri lo mwanji torosinda nambwe hima le, wunu a rata kinani, wui miyaningisopo ki Gotri lo mwanji torosinda nambwe hima hinga a wa'airo. Woro Gotri lo mwanji ni ani hanja'ai ki ani hambwanda nambwe. Mina. Kurais lo mwanji ni a sirinandau. 22 Kwambu ki yakinani etinda nambwe hima le wunu a rata kinani wui miyaningisopo ki yakinani etinda nambwe hima hinga a siraro. Ani ele hima wui sumbu ni kipe naha ani hambwasini wunu hinga a siraro. O hinga a wosiro ti, hima fweleni a rata kinani ele numbo hinga tinda ete a simiyaneheiro. 23 Dele tau hinga tinda ete Gotri mwanji kipe keke a randau ti, ichai ele sembe haro hima lenga funda ani etisini Gotri mwanji ki sawesiro mwa'ambwe kipe naha ti ani okwe a toro ki.

Hapa tinga ma nu namani nu ini mwa'ambwe le nu toro

24 Hima le wu anandiki ki wu namandau ti, o ambwe kumbwa wu etisini wu namandau, woro wu namani hima funda ritombwa o ri dikiro mwa'ambwe ri torondau. Woro ka tini ku hambwanda nambwe'e? Kunu okwe hapa tinga ma ku nama, wosini dikino mwa'ambwe ku toro. 25 Anandiki kinani namandau hima le, wunu hima tape wuhi ni norukweni gisi gisi wu aulindau. Kale hima o sumbu hinga wu wosini wu dikiwa do nuwe ki kapwa wokondau mwa'ambwe kipe fweleni ya wu torou. Woro nundo o tau hinga numbwa nu randau ti, kapwa wonda nambwe mwa'ambwe tini nu toro kinani nu wondau. 26 Ani anjenga a namandau ti, a ma'aika'aini a namanda nambwe. Au ti ani anayendau ti, tapa ahi ti nimba a yeripakonda nambwe. 27 Mina. Hima tape ahi ti ai okokona tini sirina kinani a yeni ani ondiyasindau. Foki hima fweleni Gotri mwanji ti a bwasini anjenga a tikehe ki.

Copyright information for `KWJ