2 Corinthians 9

Gotri himiyama hurahama leni okulandau tau

Kunu Gotri himiyama hurahama leni okulandau do tau sumbu ti ku hambwasindau. Apa bwele keke mwanji fwele a kaini kunu a humbweno? Ani kui sembe ti o tau ni ku ra ki au miyafo naha kunu saindau sumbu tini ani hambwasini Masetoniya lei wui miyaningisopo ki hi kuhi tini a rasaindau. Wondani ka hinga wunu a sawendau: “Do tau hinga o kwai iro asama tiki Girik leto wu ra kinani wu otokunaro.” Wowani wu mendiwani au kunu sairo sumbu o tito Masetoniya lei inaka tini yeni rasaiwani wunu okwe o tau ni wu ra ki ya wu hambwa. Mwase kunu a sawewani ku otokunaro hingambwa ku ai otokunasini ku da kinani hiparakambwe fwele a humbwewani kunu tambwa ele wu ikonda, wosini kunu wu okulawa, do ku rasairo tau keke hi kuhi ti nu rasaindau tini foki bwelefo kalefo ku na ki. Woro kunu o hinga ku da nambwe nawa, ani ga Masetoniya kipe hima fwelenga kunu tambwa nu tani nu heiwa ku otokuna nambwe nawa, kundombwa huruhumba hinde ku hei kumbwa, nunu okwe huruhumba nu heikonda. Hinde wowani, nunu sembe omwesika naha kunu numbwa nu haro ti keke. O hinga ani hambwafuni ka hinga ani hambwa, kale hiparakambwe ni a humbwewa sa wu mwaseni wu ini sa kunu sawewa, ka ku humbwewa ta kinani ku bwasiro mwa'ambwe ti ma ku otokunanda. O hinga ku wosiwa kunu tambwa a tani sumbumari ki ku haro mwa'ambwe hinga mina, kui inaka ki au saini ku haro mwa'ambwe hinga a toro ki.

Kunu ka naha ni ku hambwafwa'aisini ma ku da: E, hima fori aku ti fisichepi ri kiwa ichai o aku o hingambwa fisichepi ri eino. Woro hima fori, aku miyafo naha ri kiwa ichai miyafo naha ri ai ri eikondau. Woro kunu tinda kui inaka tiki ku kilini ku hambwaro hingambwa ele kui mwa'ambwe o hingambwa ma ku ha. Apa foki hima fori ri mwa'ambwe ti keke sembe amwaka ti ri andani, hima lei mwanji ti keke sumbumari tiki ri ha ki. O hinga ti mina, hinde wowani, Gotri eripe'aripendani mwa'ambwe handau hima keke ri wondau. Gotri ete da ete da kwambu rihi ki ele sumbu kipe hinga kunu ri wosino. O hinga kunu ri okulasiwa ele ku heifundau mwa'ambwe hinga tinda ete gisi gisi ku torosini ele mwa'ambwe ki tau kipe tumbwa o ku randakonda. Woro Gotri chengi ki o sumbu ni ka hinga sawero:

“O wai wondau hima ri bwarichape hima leni mwa'ambwe miyafo ri handau. Wondawa sumbu kipe rihi ti ete dakonda.”
10 Gotri ahirahi wapa sindau hima leni wapa tinga wu ano ahirahi lenga wunu ri handau. Woro o Gotri tombwa ku si ki ku okokonandau ele ahirahi wapa tinda ete o kunu ri handa. Wondawa sumbu kipe kuhi ti omwesika naha ikondau, hima leto ahirahi wapa tini sisiwani mwe miyafo naha wandau hinga. 11 Wosiwa kunu ki mwa'ambwe miyafo naha talesiwa, ele mwa'ambwe ni wai o ku wondakonda. Wondawa ele mwa'ambwe ni nu ha'i hatandawa wunu ele ni wu toro toro Gotri ni ya wu wese'andakonda. 12 Kunu o sumbu hinga ki Gotri himiyama hurahama leni ku okulandau ti, mwa'ambwe heifundau hima leni ku ai yando'i yandotandau tumbwa, mina, o sumbu hinga wunu ku wosindawani wunu Gotri ni wese'a omwesika naha ki ya wu wese'anda. 13 kale hiparakambwe ni ku okulandau sumbu kuhi ti, amwei naha sirakondau. Hinde wowani, mwa'ambwe wunu ku haro hiparakambwe ele to ka hinga ya wu hambwakonda: Kunu Kurais ni ku sirinandau ti, Gotri mwanji tumbwa ku bwanda nambwe, mina, kunu kui mwa'ambwe ni wunu ni, e, hima ba fwele okwe ku handani sumbu mwe tini ku mekundau. Wokoni wunu Gotri hi tini ya wu rasaikonda. 14 Wondani kunu keke omwesika wu wokoni Gotri ni ya wu uchahambwakonda. Hinde wowani, Gotri hima keke wo sumbu ti omwesika naha ki kunu ri mekuro keke. 15 Gotri do peresen nunu haro ti omwesika naha, hinde apa nu gendi kumbwa. O keke ma rini nu wese'a.

Copyright information for `KWJ