Hebrews 2

Gotri nunu ai rataro sumbu ti omwesika naha

O hinga keke do mwanji nu mendiro ti, inaka nuhi tiki ma torosini ma sirinawa nu sirina. Apa o mwanji ni nu mendini nu hanja'aisini nu i hinga. Injelembwa Gotri ensel lei takisopo tiki mwanji fwele sawero ti, o mwanji to kwambu tiki sukwaro. Wosiwani hima leto o mwanji ni wu sawesiya'aisini o wui kapwa sumbu wasa wu tororo. Woroti Gotri apa nunu ri ai ratandau sumbu ti, omwesika naha.

E, ka Gotri sumbu ni gumwa nu siwa apa ri inaka enge a ti hinde hinga nu dikino? Mina, minambwe naha. Metengei naha Apukolaka to nunu ai ri ratano mwanji tini ri bwaro. Wosiwani ele hima ri mwanji ti wu mendiro ti, wunu ka hinga nunu sawero, “Do mwanji mwe naha tumbwa.”
Wosiwani Gotri okwe o wui mwanji ni okularo ti, ba fo ba fo kwambu sumbu ri wosini ele ba fo ba fo hima heini apapanandau tau ri rasini ri inaka tiki kwambu ba fo ba fo ri wosindau Himamwale kipe ti ya wunu humwasi.

Jisas rindombwa nunu rataro hima mwa laka

Apa nu bwandau ti ichai sirano nuwe ako tini nu bwandau. Gotri ensel leto oti ni auli kinani wunu ri ondiyasi nambwe. Mina. Chengi fotiki kaisindau ti, hima fori ete sawero,

“Hima ri hinde na hinga ri dawani rini keke ete mi hambwandau?
E, hima ri che hinde na hinga ri dawani rini keke ete mi wondau?
Mini rini ni mi sawesiwani gisi faiche naha ensel lei tako tokwe ri dau.
Woro rini ni hi omwesika laka ti mi hasiwani hi rihi ti mi rasaisinda.
Wosini ele mwa'ambwe hinga tinda ete ri seke tako tokwe mi owesiwani rindombwa ya ri aulisinda.”
Mwe naha, Gotri ele mwa'ambwe hinga tinda ete hima i seke tako tokwe owesindau. O hinga ti keke mwa'ambwe foti apumbwa apu da nambwe, mina. Woroti apa ele mwa'ambwe hinga tinda ete hima i seke tako tiki dau ti nu heinda nambwe.
Woroti apa Jisas ni nu heindau. Rini imbihumbwa gisi faiche naha ensel tako tokwe ri daro ti, Gotri hima keke wondau sumbu ti amwei ri wosini nuwe pe hima le keke ri ha kinani. Rini nunu keke amwaka omwesika ri ani ri hasiwani Gotri rini ni hi omwesika tinga kwambu tinga ya rini ha.

10 Gotri rindo ele mwa'ambwe mu naha. Rindombwa ele mwa'ambwe ri wosini ri ai aulindau. O Gotri to Jisas ni amwaka omwesika naha ti ri haro ti, o rini esisiwa rindombwa ele hima ai ri ratano hima mwa laka mwe naha ri da ki. Wosiwa kale ri che miyafo naha hewen ko tiki ri rakausiwa Jisas ga funda hi okundau hinga wu da ki. O sumbu hinga Gotri Jisas ni wosiro ti, rinjenga ri sumbu ni diyani ri wosiro. 11 Nu hambwanda, kari hima ele himiyama hurahama ni okulawani ako naha sirandau ti, rini ga wunu ga tinda ete wui yapai funda. Wosiwani o keke, hiparakambwe, wunu ri na kinani huruhumba ri heinda nambwe. 12 Rini ka hinga Gotri chengi ki sawero,

“Hi mihi ti ai hiparakambwe leni amwei a sawekonda.
O to mwe naha, hima miyafo wui mu tiki hi mihi ti a rasaini hukwa ti a rakonda.”
13 Wosini Jisas ai sawe,
“Sembe ti mwe naha rini ani hakonda.”
Wosini ri ai sawe,

“Mi ani heiwani ani ga mi ani haro che lenga do nu da.”

Jisas nunu okula ki hima minde hinga ri siraro

14 Gotri rini haro che le wunu hima minde. O keke Jisas okwe hima minde ri siraro, wosini ri haro ti, apa hima ha sumbu ti aulindau hima ri, Saiten, rini ni yesini ri diki kinani. 15 Himiyama hurahama le wunu hano tini wu akindau. Wondani gisi gisi do nuwe ki wu dawani o aki sumbu to wunu toroni injisindau. Jisas ri haro ti, ele hima ni toroni injisindau aki bomo ni rani rumbwewa lalaunani wu eti ki. 16 Mwe mwe naha, rini ensel leni ri okula kinani do tau hinga ri ra nambwe. Minambwe naha. Rini Epuraham ri anitafenita le keke tau ri raro. 17 Woroti keke ele mwa'ambwe hinga tinda ete ri wosiro ti, ri hiparakambwe le hingambwa ri sirasinimbwa ri wosiro. O sumbu hinga ri wosisinimbwa rini wunu keke puris hima apukolaka hinga ri etiro. Rini wunu keke woni puris tau kipe tumbwa ri rani tape rihi ti angu'omwe hinga Gotri ni ri haro ti, wui kapwa sumbu rani rumbwewa ri sembe enge a ti wahapi kinani. 18 Ele simiyanehei sumbu rini ki sukwawani ele nomo hinga ri randaro. O hinga keke apa simiyanehei sumbu hima leki sukwawa rindombwa o wunu ri okulakonda.

Copyright information for `KWJ