Matthew 14

Uku yasindau hima Jon haro

Mk 6:14-29; Lu 3:19-20; 9:7-9

Wowani ka gisi ki, Galili mapwa ni aulindaro king apukolaka, Herot, Jisas i mwanji suwa ti ya ri mendi. Wosini ri tau ra himache leni ya ri sawe, “Kari hima uku yasindaro hima, Jon, hasini ai sairo. O hinga keke dele kwambu tinga dau sumbu rini ki do ete sukwanda.”

Mwanji mwe ka hinga: Mwase, Herot, Jon ni toroni ratani seni tiki rini injisini kalapus tiki ya rini rawaru. Bwele keke Jon kalapus tiki ri raruro? Humwe fo hi ti, Herotiyas, Herot i analongo, Filip, to tini hopwero, woro tindo mwanji mu ti ya ti musu. Hinde wowani, injelembwa Jon Herot ni ka hinga ri sawero ti keke, “Do humwe, mi analongo humwe, tini mi ratani mi hopwero ti, kipe mina, kapwa.” Ete wowani Herot Jon ni ri yeni ri si ki ri hambwaro, woro kale himiyama hurahama keke ya ri aki. Hinde wowani, wunu ka hinga wu hambwaro, Jon ori Gotri mwanji bwarakarandau hima.

Gisi foki hima fwele tani Herot ga wu wausini, ri nuwai rini raro gisi tini ya wu hambwanda. Wondawani Herotiyas i himiyama che ti wui nindo tiki hukwa ti ti ra ra seke ti yitindawani Herot o tini ete ri okokonanda. Wowani tini ni mwa'ambwe ri ha kinani ya ri sawe, “Mwe naha kari kau, mwa'ambwe kipe naha foti keke ni ani siliwa, nini ani ha sindau.” Ete wowani nuwai o ti che ni sembe ti yewani ya ti sawe, “E, uku yasindau hima Jon i mwa ni peleti tenge tiki ma owesini ma ani ha.”

O hinga ti sawewani, king sembe ti nomo naha ya rini a. Woro rini ga funda linindani ahirahi wu andau hima lei miyaningisopo tiki, mwe naha kari kau ri naro keke ri hambwafuni ya ri sawe, “Do mwa'ambwe ma tini ha.” 10 Wosini hima fo ri humbwewani kalapus wondau aka tokwe ri ini Jon kwele tini ya ri takuto. 11 Rini takutosini mwa rihi ti peleti tenge fotiki owesini ratani o humwe chongo ni ya tini ha. Wowani ti nuwai tambwa ya ti ra'ai. 12 Ete wosiwani Jon ri himache le tani hima tape dinga ti ra'aini ya wu si. Wu sisini wu ini Jisas ni ya wu sawe.

Jisas 5,000 hurahama lenga wui che humwe lenga ahirahi haro

Mk 6:31-44; Lu 9:10-17; Jo 6:1-13

13 Wowani Jisas o mwanji ri mendini o michi ri andosini kanu foki ri rauni ri litisini hima da nambwe michi fotiki rini bati ya ri i. Wowani ele himiyama hurahama o tini wu mendisini wui ko wu andosini rini wu sirinani ya wu i. 14 Jisas ini kanu ri andosini fwa gamba tiki ri etisini ri heiwani himiyama hurahama miyafo ya wu da. Wowani sembe mwe naha wunu keke ri woni ele wui hahungo hima fweleni kipe ti ya ri wosi.

15 Wondawani sundukowani ri himache le rini tambwa wu tani ya rini wu sawe, “Do michi hima nambwe michi, nika ti sisinahiro. Ma wunu humbwe'iwa ele wui ko tokwe sa wu ini ahirahi ti wakini sa wu a.” 16 Ete wowani Jisas ya wunu sawe, “Bwele keke wunu a humbwe'iwa wu ino? Kunjenga ahirahi ma wunu hawa sa wu a.” 17 Wowani ya rini wu sawe, “Nunu ahirahi miyafo nambwe. Nunu bereti tapa'angi ga fwai'omwe ti fisi tombwa dau.” 18 Ete wowani ya ri sawe, “Opi ahirahiche ma ani rata.”

19 Wosini ele himiyama hurahama ri sawewani ki tenge tiki wu litisiwani o tapa'angi bereti ga fwai'omwe fisi ga ri torosini hewen tokwe ri mauni Gotri ni ri wese'asini o fwai'omwe ga o bereti ga ri lepikasini ri himache leni ri hasiwani ele himiyama hurahama ni ya wu ha'i hatanda. 20 Wowani o ahirahi wu a awani sembe ti ya wunu tale. Ete wowani ahirahi gomu gamwe ti wu rukoni tapa'angi tapa'angi hatachi fisi hala tiki ya wu waro. 21 O ahirahi wu aro hima hinga tinda ete 5,000, kichapwa himiyama lenga gandi nambwe.

Jisas fwanjuwei tenge tiki eti eti inda

Mk 6:45-52; Jo 6:15-21

22 Ete wosini Jisas, ri himache le wu mwaseni wu i kinani wunu ekichasiwani kanu tenge tiki wu rau wu litisini fwanjuwei angi tokwe ya wu rachi. Wondawanumbwa rinjenga ele himiyama hurahama leni ri humbwewani ya wu i. 23 Wu isiwani rini ri Yapai ni ri uchahambwa kinani kimba laka tiki ya ri rau. Sunduya iwani rini bati o kimba ki ya ri da. 24 Wondawani kanu oti fwanjuwei wemi ki indawani ausuwa laka ti saini kanu indau soko tokwe sini fwa o tini yembekinawani tani kanu o tini hapa tinga ya ye. O keke kanu i kinani ya anakwendau. 25 Kapwa apwe gindawani Jisas fwanjuwei tenge tiki ri eti eti ele ri himache le tambwa ya ri i. 26 Wondawani rini wu heiwani fwa tenge tiki eti eti ri tandawani wu akini ya wu sawe, “Ka ambusuwa fo'o?” O hinga wu bwakoni ata ti ya wu gi. 27 Ete wowani metengei ete Jisas ri mendini ya wunu ri sawe, “Kunu yakinani ma ku eti. Ando a tandau. Apa ku aki kei.”

28 Ete wowani Pita mwanji wasa ka hinga ya ri sawe, “Apukolaka, e, mini naha nawa ma ani sawewa mini tambwa fwa tenge tiki ani eti eti a ta.” 29 Wowani Jisas ya rini sawe, “Ma ta.” Ete wowani Pita kanu ri hanja'aisini fwa tenge tiki ri eti eti Jisas tambwa ya ri i. 30 Ri indani ausuwa tini ri heini ri akikoni fwa we tiki kamindache ya ri rai. Wofunu ri uchani ya ri sawe, “Apukolaka, ma ani okula.”

31 Ete wowani metengei ba ete Jisas tapa dachinani Pita ni ri torosini ya rini sawe, “Sembe mi haro ti kapwacheche naha. Hinde wowani, mini inaka fisi mi hambwandau?” 32 Wosini kanu tenge tiki fi rauwani, ausuwa laka oti ya humbu. 33 Ete wowani ele hima kanu tenge tiki wu daro ti, rini wu lotu woni ya wu sawe, “Mwe naha, mini Gotri Che.”

Jisas Genesaret pe hahungo dau hima leni kipe ri wosiro

Mk 6:53-56

34 O fwanjuwei wu yetikinani wu rachini Genesaret mapwa ki ya wu i. 35 Wosiwani ele kipe hima le ya wu hambwa, o Jisas to taro. O hinga wu hambwakoni mwanji ti ele ko takai hinga tinda ete wu humbwe'i humbwetawani hahungondaro hima wuhi le rini tambwa ya wu rata. 36 Wosini ya rini wu sili, “Dele nui hahungondau hima le nika'ari sumbu mihi tunumbwa sa wu toro.” Ete wosiwani ele hahungo hima rini tororo leto tinda ete kipe ti ya wu wosi.

Copyright information for `KWJ