Matthew 28

Jisas ai sairo

Mk 16:1-10; Lu 24:1-10; Jo 20:1-18

Wosiwani himati gisi ini humbusiwani lindanasiwani Sande nurumbu, Mariya Makitala ga humwe ba fo Mariya ga matimat ni hei kinani ya fi ta. Wokowani metengei ete minawe laka ete ya di. Wowani Gotri ensel fo hewen ko andosini ri sikani o humokuto beiye dukweleni humbwe'isini o humokuto beiye tenge ki ya ri liti. Miyaningisopo rihi ti niri to lepakinandau hinga okundani nika'ari rihi ti niri wamwa tini heindau hinga sirasiwani ya lininda. Wokowani au anaye hima ele matimat o tini wu aulinindaro ti, rini wu heini wu akini seke tapa wunu rikirikinakoni haro hima hinga ya ete wu sira.

Ete wokowani ensel hima ori opi humwe fisi ni ya ri sawe, “Kini apa aki kei. O kini ani hambwanda, kini me yapweke tiki wu yero hima ri, Jisas, ni hei ki ki taro. Woro rini aha'a ki da numbwa. Rini imbihumbwa ri sawero hingambwa ri ai sairo! Ma ki tani rini wu siro michi ti ki hei. Wosini ma ete ki ima'ini ri himache leni ka hinga ma ki sawe, ‘Rini matimat ri hanja'aisini ri ai sairo. Wosini rindo mwaseni Galili mapwa ki o inda. Wosiwa apa ku ini o ki o rini ku heikonda.’ O kini a sawehito. Ya ma ki i.”

Wowani opi humwe fisi fi akindaro ti, eripe'aripe omwesika laka foki ete fi eripe'aripendani metengei ete matimat fi hanja'aisini ri himache leni fi sawe kinani ya fi namani fi i. Ete indawani Jisas numbo ki fini ri heini ya fini sawe, “Kapiche, se'e.” Ete wowani takai fi ini ri seke ki fi yakonambusini rini ni ya fi lotu wo. 10 Wowani Jisas ka hinga ya fini sawe, “Kini apa aki kei. Ma ki ini ai hiparakambwe leni ma ki sawewa Galili mapwa ki sa wu i. Wosini o ki wu tani sa apa wu ani hei.”

Au anaye hima lei wui mwanji

11 Wosiwani opi humwe fisi numbo tini ete fi indawani, matimat tini aulindaro au anaye hima fwele wu ini ko laka ki wu raruni ele sumbu hinga tinda wu heiro tini puris hima laka leni ya wu sawenda. 12 Wosiwani puris hima laka ele, mekupu hima laka lenga wu wausini mwanji foti ya wu inji. Wosini au anaye hima leni ya miyafo wu hasini 13 ya wu sawe, “Ka hinga ma ku sawe, ‘Nunu nu tukuyandawani ri himache le niliki ki wu tani ri hima tape ti hili yani wu ra'airo.’ 14 E, gapiman apukolaka do mwanji ri mendini kunu siliwa nunu ga mwanji fwele o rini nu sawekonda, wowa apa kunu kipe. Inaka tenge miyafo hinde apa ku hambwa kumbwa.” 15 Ete wowani au anaye hima ele o ya wu torosini wunu sawero mwanji hingambwa ya wu sirina. Wosiwani do mwanji Juta hima kupu lei nindo tiki ichi'uchandani, o mwanji to do ya ete da.

Jisas ri himache leni Gotri mwanji bwano tau tini wunu ri haro

Mk 16:14-18; Lu 24:36-49; Jo 20:19-23

16 Ete wosiwani ri tapa'angi tapa'angi hatachi funda himache ele Galili mapwa ki wu ini Jisas wunu sawesiro kimba o ki ya wu rau. 17 Wosini o kimba ki Jisas ni ya wu hei. Wokoni rini ni ya wu lotu wo. Ete wowani wunu fweleto inaka fisi ya wu hambwa. 18 Wosiwani Jisas wunu tambwa takai tani ka hinga ya wunu ri sawe, “Gotri hewen ki dau mwa'ambwe lenga nuwe ki dau mwa'ambwe lenga tinda ani auli kinani kwambu omwesika laka ri ani haro. 19 O keke ma ku ini ele himiyama hurahama ni ai himache hinga ma ku rata. Wosini Yapai hi ti, Che hi ti, e, Gotri Himamwale hi ti, ele hi wuhi ki uku ti ma wunu ku yasi. 20 Wosini o kunu a sawesiro mwanji hinga tinda ete ma wunu ondiyakandiyawa ele mwanji hinga tinda ete norukweni sa wu sirinanda. Ma ku mendi. Ani kunu ga gisi gisi ete a dawa do nuwe humbuno.”

Copyright information for `KWJ