Revelation of John 5

Jon benisindau chengi fo ri heiro

Wondawani ri linindau tei tapa mama tokwe ani heiwani benisindau chengi foti ya da. Chengi mwe ti we ga hoko ga himiki tumbwa ete kaisindau. Wosini tapa'angi hatachi fisi pilasita tipa leki o beniro chengi ki ya wu findasinda. Wondawani ukume ga dau ensel laka fo ani heiwani hapa tinga ri uchani ka hinga ya ri sawenda, “Hinde na hima kipe forito rini chikisiwa apa doha'a pilasita findasindau ri dungwasini do chengi hungoni lesanano?” Woro hewen ko ki dau hima fori, nuwe ki dau hima fori, e, nuwe ki tiki dau hima fori do chengi hungoni lesanasini kwai kaisindau ri hei nambwe. O keke ani ya ete ani ichakanda. Hinde wowani, o chengi hungoni lesanasini kwai heino sumbu ni chikindau hima fori wakini hei nambwe. Wondawani mekupu hima laka fori ya ani sawe, “Apa ichaka kei! Ma mendi! Juta hima kupu ki sukwaro hima kapwa asa fo, hi ti, laiyon, hinga o da. Rini Defit anitafenita ki me yongo hinga tingiro. Woro ori hima to au anayendau sumbu ri dikiro. Rindombwa ka tapa'angi hatachi fisi pilasita tipa findasindau ti dungwani o chengi ri hungoni ri lesanakonda.”

Jon Sipisip Che ni heiro

Wosiwani ani heiwani wu yeni wu siro Sipisip Che hinga ani hambwaro to ya eninda. Rini King Apukolaka linindau tei tinga ele himamwale ga dau mwa'ambwe opuri'opuri ga ele mekupu hima jambanini litisindau nindo ki ya ri eninda. Ri mwa ki tapa'angi hatachi fisi mambanga sukwasiwani ri miya ti okwe tapa'angi hatachi fisi ya da. Kale tapa'angi hatachi fisi mwa'ambwe le Gotri ele nuwe mapwa hinga tinda wunu humbwewani wu iro himamwale leni sawendau. Ori Sipisip Che ini ka tei ki litisindau hima i tapa mama ki daro chengi oti ya ri ruko. O chengi ri rukosiwani ele ki enindaro himamwale ga dau mwa'ambwe opuri'opuri ga ele 24 mekupu hima laka lenga ori Sipisip Che seke mu tiki takaini ya wu opuli. Ele mekupu hima laka funda funda metako ba fo, hi ti, hap, tinga paura talesindau gol ba wosiro bapi tinga wu torosindau. Kale paura sawendau ti, ele Gotri ni sembe haro hima leto wui uchahambwa leni sawero. Wosini hukwa ako foti ka hinga ya wu ra:

“Mindombwa naha ka chengi mi rukoni pilasita findasindau ti mi dungwasini mi lesanano hima hinga mi chikisindau.
Hinde wowani, wunu mini yewani mi haro ti keke mi fi ti ele hima hinga wungwa ti wunu mi jisini Gotri tambwa mi ai wunu mi rataro.
Mwe naha, mindombwa ele hima tiya hinga, ele mwanji gale ba fweleki bwandau hima le, e, ele nuwe mapwa ki dau tape ba fwele okwe, wunu tinda ete mindombwa wungwa wunu mi jiro.
10 Mini wunu mi wosiwani nui Gotri tau ra puris hima kupu hinga ya wu sira.
Ichai wundo do nuwe ki king apukolaka hinga wu aulino.”

Sipisip Che ri hi tini wu rasaindau

11 Wosini ani ai heiwani ensel miyafo naha lei ata ti ya a mendi. Hima mwe le hinde wunu gendi kumbwa. Wunu niri pe isangi hinga, funda ete kwetikwetisini King Apukolaka linindau tei tinga ele himamwale ga dau mwa'ambwe lenga, e, ele mekupu hima laka lenga ya wunu haweisini wu eninda. 12 Wosini wu uchani ka hinga ya wu sawe,

“Doriha'a Sipisip Che imbihumbwa wu yeni wu siro hima ri, ka sumbu hinga ri torono hima hinga rini chikisindau.
Ri torono sumbu mwe le kale: Hi omwesika naha ti, ele mwa'ambwe kipe naha ti, hambwa omwesika ti, kwambu omwesika ti, e, hima le hi rihi rasaini rini ni wu eripe'aripendani rini wu wese'andau ti.”
13 Wosiwani a mendiwani hewen ko ki dau, nuwe ki dau, nuwe ki tiki dau, e, soluwara we ki dau Gotri wosiro himamwale ga dau ele mwa'ambwe hinga tinda ete hukwa ka hinga ya wu randa,

“King Apukolaka tei ki linindau Gotri ga Sipisip Che ringa fini kumbwa
wese'andau sumbu ti, hi omwesika rasaindau sumbu ti, eripe'aripendau sumbu ti, e, kwambu ti, gisi gisi fini ga ya sa ete da ete da.”
14 Wondawani ele himamwale ga dau mwa'ambwe opuri'opuri ka hinga ya wu sawe, “Mwe naha.” Ete wondawani mekupu hima laka ele wu opulisini Gotri hima pi Jisas ni ya wu lotu wonda.

Copyright information for `KWJ