Romans 16

Pol himiyama hurahama miyafo leni ri wese'aro

Ai okokona ti, nui kahaiche Fipi kunu tambwa ti iwa ma tini ku enependa. Tini Sengiriya pe sios hima le keke Gotri tau ti randau. Ti iwa Apukolaka hi ki Fipi ku ra'aisiwa kunu ga sa ti da. E, nomo fo tini ki sukwawa ma tini ku okula. Kunu Gotri himiyama hurahama le, o sumbu hinga ku wosino ti sumbu kipe naha. Hinde wowani, himiyama hurahama miyafo naha ti okulani ani okwe ti okularo.

Wese'a ahi ti ma ku ra'aini Pirisila hima pi Akwila ni ku sawe. Fini Jisas Kurais hi ki ani ga tau funda nu randau. Fini fi hano tini fi otokunasini fi ani okularo. Woro andombwa fini a wese'andau, mina. Ele hima kupu ba fwelei nindo ki dau sios hinga tinda ete fini wu wese'andau. Wese'a ahi ti fi aka ki waundau sios hima leni ma ku sawe.

Wese'a ahi ti ma ku ra'aini Epinitas ni ku sawe. Rini nau ahi naha, Esiya mapwa ki sembe ha sumbu ti ele hima i nindo ki rindo mwaseni haro.
Wese'a ahi ti ma ku ra'aini Mariya ni ma ku sawe. Tini kunu okula kinani tau kwambu miyafo naha ki ti randaro.

Wese'a ahi ti ma ku ra'aini Andoronikas hima pi Juniyas ni ma ku sawe. Fini ani hinga Juta hima kupu fopi, woro kalapus tiki funda ete nu daro. Jisas Himache lei nindo tiki fini hi chele, sembe ha sumbu fihi ti findo mwasesiwanimbwa ani gumwa kumbwa sembe ani haro.

Wese'a ahi ti ma ku ra'aini Ambiliyetas ni ma ku sawe. Rini Apukolaka ni sirinandau ai nau naha.

Wese'a ahi ti ku ra'aini Epan ni ma ku ha, rini Kurais tau funda nu randau nui hiparakambwe naha. Wosini wese'a ahi ti Sitekis okwe ma ete ku sawe, rini ai nau naha.

10 Wese'a ahi ti ku ra'aini Apelis ma ku sawe. Rini Kurais ni mwe naha ri sirinandau hima hinga ri sukwasindau.

Wese'a ahi ti ku ra'aini Arisitopulas aka kumbwa dau hima leni ma ku sawe.

11 Wese'a ahi ti ku ra'aini Herodiyon ni ma ku sawe, rini ani hinga Juta hima kupu fo.

Wese'a ahi ti ku ra'aini Nasisas aka kumbwa dau hima leni ma ku sawe, wunu Apukolaka tapa tenge ki wu dau.

12 Wese'a ahi ti ku ra'aini Tiraifina hima pi Tiraifosa ni ma fini ku sawe, fini Apukolaka tau ni tau kwambu naha ki fi randau.

Wese'a ahi ti ku ra'aini Pesis ni ma ku sawe, rini ai nau naha, Apukolaka tau ni tau kwambu naha ki ri randaro.

13 Wese'a ahi ti ku ra'aini Rufas ga ri nuwai ni ma ku sawe. Rini Apukolaka rihi ri naro hima kipe naha. Ri nuwai ani ni ti che hinga ti enependaro.

14 Wese'a ahi ti ku ra'aini kale hima ni ma ku sawe, Asingiritas, Filikon, Hemis, Patoropas, Hemas, e, wunu dau hiparakambwe le okwe.

15 Wese'a ahi ti ku ra'aini kale hima ni ma ku sawe, Filolokas hima pi Juliya, Neriyas ga ri kahaiche ga, Olimbas, e, wunu ga dau Gotri himiyama hurahama le okwe.

16 Kunu Gotri himiyama hurahama le kui sumbu ti kunu funda funda kui hiparakambwe ni tapa ti ma ku anayenguna.

Kurais ri sios hima le wunu tinda ete kunu ni wese'aro.

Hima fwele sios apumbwa apu i kinani wu huwandau

17 Ai hiparakambwe le, ani hima le sios ti huwawa apumbwa apu ino ti keke ku hambwafwa'ai kinani sembe kunu a yendau. Wunu o ku sirinandau sumbu ti wu yetupwandani o sumbu hinga wu wosindau. O keke hima miyafo naha wu hichakondau. Woro kunu ele hima miya hinga ni gumwa ma ku sini wunu ga funda ku ichi'uchanda kei. 18 Kale hima hinga le nui Apukolaka Kurais tau tini wu randa nambwe. Mina. Wunu wui okokona sumbu tini wu sirinandau. Wondani kapwa sumbu ki indau numbo ni hikisandau hima kipe lei wui inaka ki mwanji muningi sukwa kinani sembe yendani ya wunu gambonda. 19 Gotri mwanji ni kipe naha ku sirinandau mwanji suwa ti ele hima hinga tinda wu mendisindau. O keke kunu ani eripe'aripenda. Woro ai okokona ti, sumbu kipe tini norukweni ku hambwasini kapwa sumbu tini ku hikisanda ki. 20 Gotri rini ki sembe wahapi mu naha dau, woro gisi faiche naha iwa Saiten ni ri yititakokoni kui seke tako ki o ri rawarukonda.

Nui Apukolaka Jisas ri hima keke wo sumbu kunu ga o dakonda.

Hima fwele Rom kipe himako leni wese'aro

21 Tau funda si randau hima, Timoti, kunu ri wese'anda. Lusiyas, Jeson, Sosipata, wunu ani ga Juta hima kupu, woro wunu okwe kunu wese'anda.

22 Ani Tetiyas, do chengi a kairo ti, Pol takisopo naha ki a mendisini a kairo. Apukolaka hi tiki kunu a wese'andau.

23 Gaiyas okwe kunu wese'andau. Aka rihi ki a dawani kipe ri ani aulindau, woro o aka kumbwa ele sios hima le okwe wu waundau.

Erasutas, do ko laka ki gapiman lei chengi kaindau hima hinga ri dau. Woro rini ga nui hiparakambwe ri Kwotas ga kunu ni fi wese'andau.

24 [Nui Apukolaka Jisas Kurais hima keke wo sumbu rihi ti kunu ga o da. Mwe naha.]

Nunu Gotri hi tini ma nu rasai

25 Jisas Kurais ni sawero Gotri mwanji kipe ni a bwandawani kunu o tini ku mendini sembe ku hasini ku dau. Woro Gotri ku tororo mwanji ki kunu ri okulandawa sembe ha sumbu kuhi kwambu ki o ku etikonda. Doha'a mwanji imbihumbwa kapwa ete yanisini daro ti, apa Gotri to amwei woro. 26 Ete da ete da Gotri to sawewani imbihumbwa Gotri mwanji bwarakarandaro hima leto kairo mwanji mu mwe tini ele nuwe mapwa ki dau hima leni wu bwawani ele himiyama hurahama hinga tinda ete o mwanji yanisiro ti mwanji mu ti, amwei naha wu hambwandau. Gotri o hinga ri wosiro ti, ele biya hima kupu ba fwele sembe mwe naha wu hani ri sumbu tini wu sirina ki. 27 Dori Gotri rindombwa ele hambwa hinga tinda ri torosindau. O Gotri hi numbwa Jisas Kurais hi ki gisi gisi ma ete nu rasainda. Mwe naha.

Copyright information for `KWJ