1 Kings 21

Akali Napotena Isa Girapo Ee Doko

Yuu Jeserele dokona kiŋi Ayapena anda kambu repeta dokona akali Napote lenge dokona isa girapo ee andenge. Yuu gii mendepa Ayapeme Napote lamaiyuo lao, Embena isa girapo ee yuu doko nambana anda kambu repeta singi dokona namba anane kapisupi lapo wara pinyaŋa yuu doko namba nyerowale. Nyepala nambame emba girapo ee wakale mende jero. Panda range rae mai nare ramo doko nambame emba bange keyange lapo joo ropo pyao nyero, leya.

Leyamo dokopa Napoteme isingi lao, Namba girapo ee dake nambana rora ambasu dupwana nyiyuŋu nambame emba nyii laro dokopa Kamongo dokome daa lena, leya.

Ayape baa Napoteme pii lamaiyamo doko sepala ama mona kendo dee imbumi kumuo anda peya. Papala nenge naa nao banya luu palenge rate dokona papala lenge kambu apya dorena pyambwapala palyuo siya. Dokopa banya etenge Jesapele papala piso soo lao, Akipamo emba nenge naa nao mona randame kumuo silisi? leya.

Ayapeme isingi lao, Namba Napotena isa girapo ee doko ropo pyao nyero panda baa range rae mai nara ramo doko nambame ee wakale maiyuo banya ee dokona nyero lapu dokopa baame namba daa langipyamo dokona dopa pyuo peto, leya. Leyamo dokopa Jesapeleme isingi lao, Kapa emba kiŋi panda kiŋi daase? Rate dokona sipuro epo mona kare kare rae maiyuo piso nenge nape. Nambame Napotena isa girapo ee doko nyakaroŋo, leya.

Lapala enakana enda baame Ayapena kingi palyuo pepa mende pyapala waa lumbuo kandasarami lapala make mende ketae pisiya. Pisapala yuu Jeserele akali mupwa dupwape wambu lita ingyuo karenge dupwape maiya. Maiyamo pepa dokona dopa lao piya. Wambu dupwa kee lao nyuo malu palyapala nenge wasaka pyuo piso Napote baa kingi ketae pyambuo lakandalapape, leya. 10 Lapala orasakele akali lama nyepala baa kooŋo lapala Anatunya lenge kambupi kiŋinya lenge kambupi dolapona kokwa soo pipi lena. Lapala yuu taone dokona baa minyuo nyisa papala kaname pyao kumakalapape, leya.

11 Dokopa yuu Jeserele dokona akali mupwa dupwape wambu lita ingyuo karenge dupwapeme enda Jesapeleme pinya leyamuli pyuo piyami. 12 Nakamame wambu dupwa nyuo malu palyuo nenge wasaka pyuo piso Napote baa kingi ketae pyambuo lakandeyami. 13 Lapala orasakele akali dolapome baa kooŋo Anatunya lenge kambupi dee kiŋinya lenge kambupi dolapona kokwa soo pipya leyambi dokopa yuu taone dokona Napote minyuo nyisa papala kaname pyao kumakayami. 14 Dokopa Napote pyao kumakalyamo lao Jesapele peteyamo dokona pii wai nembeyami.

15 Pii wai doko Jesapele sepala aopa dokopako Ayape lamaiyuo, Napote baa kumapyaŋa dokona lao banya isa girapo ee yuu emba jelana simbi simbi piyamo doko emba nyela puu, leya. 16 Yuu gii mendaki dokopako Ayape ee doko nyela peya.

17 Peyamo dokopa Kamongo dokome yuu Tisipi range poropeta Ilainja lamaiyuo, 18 Yuu Samaria range kiŋi Ayapeme Napote isa girapo ee doko nyakaminya pilyamoŋo baa petamo dokona puu. 19 Papala namba Kamongo dokome lapya lao baa lamaiyuo, Embame akali doko pyao kumakapala dokopa enakana banya ee doko emba nyerene keyangese? Nambame dapa lapya lao, baa lamaipi. Suwa dupwame Napotena ranjama pendo naminyi yuu dokonako embena ranjama pendo narami lapya lape, leya. 20 Ayapeme Ilainja kandapala dopa leya, Nambana nyisu petenge, embame namba minyarapala nyela epelese? leya.

Leyamo dokopa Ilainjame isingi lao, Emba Kamongona lenge kambu dorena emba rangeme koo pipala nyisa rekya lao pao otapi dokona waa nambame emba nyela epelyo.
21 Dokona lao Kamongome emba dopa langilyamo. Nambame emba keta randa andake jero. Doko embena ree palu dokona wane dupwa peparae kuki andapaepe mende pyarepala paa nana lao pyaro, lapya. 22 Embame Isaraele wambu dupwa kata koona lanyuo pao koo pinya lao pipinyi dokona nambana imbu singi nyakaleneŋe embena ree palu dupwa kiŋi Jeropome Nepatena ikinyingi piyamo doko waiso dee kiŋi Basa Ainjana ikinyingi piyamo doko waiso pirami, lapya. 23 Enda Jesapele dokona lao doko Kamongo dokome lao, Yuu taone Jeserele dokona banya yongo doko suwa dupwame narami lapya, leya. 24 Dee embena wambu range lapo yuu taone dokona kumarami dupwa suwa dupwame narami dee wambu lapo mee neta dupwana kumarami dupwa yaka ketae papingi dupwame narami, lapya.

25 (Banya etenge Jesapeleme kyawame suu lao piyamo dokome Kamongona lenge kambu dokona Ayape baame ama koo pyulu pyuo piya. Banya koo piyamo doko wakale dupwana mendeme isa palya nayami. 26 Kamongo dokome Isaraele wambunya lenge kambu dokona Amo wambu yulu koo elya pingi pyuo mee bange kingimi wasisi dupwa lakando kareyaminyi dupwa nyisa nembeya. Nakama koo pyuo kareyaminyili pyuo Ayapeme piya.)

27 Ilainja pii lao otapeyamo dokopa kiŋi Ayapeme banya komau doko minyuo kangunyi nembapala baa kumanda wapungi komau wapuo nenge naa nao mee luu palyuo baa mona randame kumuo peteya.

28 Dokopa Kamongo dokome poropeta Ilainja lamaiyuo, 29 Epapu kiŋi Ayape kandape. Namba kando inyimungu pisipyamo doko emba kandelese? Dopa pyuo karapyamo dokona nambame epapu baa lete karamo yuu gii dakepa baa keta randa mai naro. Rengya banya ikinyingi dupwa kararami yuu gii dokopape Ayape banya ree palu dupwape keta randa doko mairu, leya.

Copyright information for `KYC