1 Kings 22

Poropeta Akali Maekaya Lenge Dokome Ayape Repe Repe Pii Lamaiya

Ee kana lamana Isaraele wambu dupwa Siria wambu pipya manda rao lambo lao mona siyamopa palu karo piyami. Piyaminyipape ee kana repo dokona yuu Juta range kiŋi Jiosapatame Isaraele wambunya kiŋi Ayape kandala peya. Peyamo dokopa Ayapeme banya akali mupwa dupwa piso soo lao, Oramote yuu Giliate singi doko namwana doŋo. Akipamo namwame yuu Oramote yuu Giliate singi doko Siria wambunya kiŋi rekya lao nyerama lao mende pii nalyamase? leya. Lapala Ayapeme Jiosapata kando lao, Emba namba role pyao Oramote wambu dupwa pyao nyela parambase? leya.

Dokopa Jiosapatame isingi lao, Nambape nambana yanda singipi dee yanda singi mena ose matana petengepe dupwa rapa rapa pyuo otapuŋu. Dusipa peparae emba rangena ingilyamo, leya.
Dopa piramopape wambo Kamongo doko keta kapa lao piso soo kandamanale, leya.

Dokona lao Ayapeme poropeta akali andete kisima (400) epena lapala piso soo lao, Nambame Oramote wambu dupwa kapa pyala paowa panda kaeyowase? leya. Leyamo dokopa isingi lao, Kamongome pyao wini pii lao emba keta embone kararaŋa kapa pyala pare, leyami.

Leyaminyipape Jiosapatame piso soo lao, Kamongome apa letamo lao, poropeta mendali keta serama mende kara nalyase? leya.

Dokopa Ayapeme isingi lao, Imilana ikinyingi poropeta Maekaya karamo. Karapyamopape baame namba rengya mende pira lao keyange dokona langya napala yuu peparae koo dupwanako langingi dokona nambame baa awa nalyo, leya.

Jiosapatame isingi lao, Emba dopa laa nare ingilyamo, leya.

Leyasa kiŋi Ayapeme banya anda karenge akali mupwa mende kee lao nyepala yuu gii mendaki dakepako poropeta Maekaya nyela pena leya.

10 Lapala kiŋi dolapo nakambana komau londe dupwa wapupala yuu Samaria kame nyisarena witi pyao injingi mare dokona nakambana petenge isa dokona peteyambinyipa poropeta dupwame nakambana lenge kambu siya dorena karo mende rengya pira dokona lamaipa pyuo kareyami. 11 Kareyaminyi dokopa akali mende Senanana ikinyingi Setekaya lenge dokome baa rangeme ane poraimi mena bulamakaona nenge yale wasiya. Wasapala Ayape lamaiyuo, Kamongo dokome bange dake minyuo Siria wambu dupwa doko kapa pyao ralinyi nembapala kaeyare letamo, leya. 12 Leyamo dokopa poropeta menge dupwa dokonako palyuo lao, Kamongo dokome porainya renge jeramopa Oramote wambu kararaminyi dokona pao nakama nyuo wini piri, leyami.

13 Dopa pyuo kareyaminyipa akali mupwa poropeta Maekaya nyela peyamo dokome epo lao, Poropeta menge dupwame kiŋi doko rae mainyi pyambuo pii mendareko lami dopa pyuo emba dokonako ingyuo lape, leya.

14 Leyamo dokopa Maekayame isingi lao, Kamongo lete karenge dokona lao lalu lao lao baame namba dopa laa lao langiramo doko laro, leya.

15 Enakana baa kiŋi peteya dokona peyamo dokopa kiŋi dokome baa piso soo lao, Maekaya, kiŋi Jiosapata nambapame Oramote wambu dupwa pyala bwua panda kaeyambase? leya.

Dokopa Maekayame isingi lao, Kapa pupwa. Kamongo dokome embone karenge jeramopa nakambame pyao anda pisirambi, leya.

16 Leyamo dokopa Ayapeme isingi lao, Kamongo dokona kingi lao embame namba pii kinyi dokona iki langi. Yuu akipare nambame emba dopa pii lao langirusi? leya.

17 Maekayame isingi lao, Isaraele ami yanda singi dupwa mena sipisipi rapu pingi kara nalyaminyi ralo karenge dopale ingyuo yuu kyau dupwana wakale wakale ralo pao karaminyi kandeyo. Dokopa Kamongo dokome lao, Wambu dupwana rapu pingi akali mupwa mende kara nange lamoŋo dokona mee mona seramo anda pena lapya, leya.

18 Dokopa Ayapeme Jiosapata lamaiyuo, Baame namba keta keyange piraŋa lao langi napala yuu peparae koo dokonako langingiŋi lao emba langya napu kandapisi? leya.

19 Leyamo dokopa Maekayame deeyako lao, Epapu Kamongo dokome apa letamo lao sepe. Kamongo doko yake panda dokona banya petenge isa dokona pisipyamo banya aŋala dupwa baa pisipyamo wangusa karaminyi kandapu. 20 Dokopa Kamongo dokome piso soo, Apimi Ayape baa yuu Oramote dokona papala kumara lao minyako pela parase? leya. Leyamo dokopa aŋala lapome pii mendakinya palyuo leyami dee lapome mendena palyuo leyami. 21 Lao peteyaminyipa imambu mende epo Kamongo peteyamo dokona papala akali doko nambame minyako pela paro, leya. 22 Leyamo dokopa Kamongome piso soo lao, Apa pyuo pirisi? leya. Dokopa imambu dokome isingi lao, Nambame papala Ayapena poropeta akali dupwa kyambo lena lao kunji pyaro, leya. Dokopa Kamongo dokome lao, Emba wini piriŋi baa minyako pela puu, leya.

23 Dokopa Maekayame lao oto lao dopa leya. Dopa pipya lyakande. Kamongo dokome embena poropeta dapwa kando kyambo lena lao kunji pyapya. Dopa pipyamopape Kamongo baa rangeme emba koo keta palyuo lapya, leya.

24 Leyamo dokopa poropeta akali Setekaya doko Maekaya kareya dokona papala Maekayana lenge kambu dokona rakyuo pyao lao, Kamongona Imambu dokome namba yaki nyuo epo apa pyuo emba pii kanda soo langilyase? leya.

25 Leyamo dokopa Maekayame isingi lao, Emba panda kuki matarena dokona yalu pela pare dokopa koto kandare, leya.

26 Dokopa kiŋi Ayapeme banya akali mupwa dokona mende lamaiyuo, Maekaya minyarapala nyepala yuu taone andake dokona gapomane akali mupwa Amonepa dee kiŋinya ikinyingi kingi Joasepa minyuo pao maipi. 27 Maipala dokopa nakamba lamaiyuo, Baa karapusi anda palyapala nenge borete ipwape iki maiyuo karena lare. Dopa pyuo kararaminyipa namba kapa lete eparo, leya.

28 Dokopa Maekayame pii poraiyuo lao, Wambu peparaeme nambana pii selapape. Ayape, emba lete anda kapu kyuo epare ramo dokoyaka Kamongo dokome namba keta pii langya napyalyamo lao kandaro, leya.

Ayape Kumuyamo Doko

29 Isaraele wambunya kiŋi Ayapepa Juta wambunya kiŋi Jiosapatapame yuu Giliate dokona Oramote wambu dupwa pyala peyambi. 30 Ayapeme Jiosapata lamaiyuo, Emba yanda pela paramba dokopa kiŋi komau dupwa wapupala kiŋi ingyuo pupi. Dopa pirinyipa namba wambu dupwame nambaŋa lao kanda seramiŋi namba komau wakale wapupala paro, leya. Lapala Isaraele kiŋi doko alowa pyuo wakale ingyuo yanda pela peya.

31 Peyamo dokopa Siria wambunya kiŋi dokome akali banya mena oseme ipyuo papingi uliuli dupwa rapu pyuo karenge dupwa pii poraiyuo lamaiyuo, Akali kuki andakepe dupwa pyaa napala Isaraele kiŋi doko iki pinya leya. 32 Dokopa nakamame kiŋi Jiosapata epeyamo doko kandapala Isaraele kiŋi dokoŋo lao peparaeme suu piyami. Suu pyapala pyala peyami dokopa baa pii ketae lao ee leya. 33 Ee leyamo dokome doko Isaraele kiŋi doko daalyamo lao sepala pyala peyaminyi doko kaeyami. 34 Kaeyaminyipape Siria yanda singi dokona mendeme banya kakumi mee kamenge piyamopa papala kiŋi Ayapena ane komau porai kimbuso kii pingi dokona pisipala pao anju renge dokona peteya. Peteyamosa akali banya mena oseme ipyuo papingi uliuli yulu minyuo penge doko kando ee poraiyuo lapala, Namba kandape. Namba pisipilyamoŋo yanda dakena yaki nyuo ipyuo minyuo nyisa pupi, leya.

35 Yuu gii dokopa yanda andeyamosa kiŋi Ayape baa Siria range kareyami dorena lenge kambu pyambwaro banya mena oseme ipyuo papingi uliuli dokona bange lapome pyare lapala peteya. Peteyamopa kaku peteya dokona ranjama dupwa epo karo uliuli panda isarena raeyo siya. Dokpa kukwama baa kumuya. 36 Neta anda repeta para ingiyamo dokopa Isaraele yanda singi kareyaminyi dokona pii mende lao sukusa pao akali peparae nakamana taone yuupi dupwana kapu kyuo pena, leya.

37 Dopa pyuo kiŋi Ayape kumuya. Banya yongo doko minyuo pao yuu Samaria dokona malu piyami. 38 Kamongome pira leyamuli pyuo banya uliuli doko minyuo pao ipwa Samaria pete dokona wate piyami dokopa ranjama dupwa suwa dupwame pendo nao dee pamuku enda dupwame dokona wate pyuo piyami.

39 Yulu peparae kiŋi Ayape piyamopa anda ama keyange piyamope dee yuu taone karenge wasiyamope dupwana lao Isaraele Kiŋi Dupwana Arome Pii Buku dokona pyao reteyami. 40 Baa kumuyamo dokopa banya panda nyuo ikinyingi Ayasaya lenge doko kiŋi kareya.
22:41-53Jiosapata baa kiŋi Asana panda nyuo yuu Juta iso kareya. Dee Ayasaya baa kiŋi Ayapena panda nyuo yuu Isaraele iso kareya.


Copyright information for `KYC