2 Kings 19

Kiŋi Dokome Aisaya Kando Apa Pirama Lao Piso Siya

Akali dusipame epo pii lamaiyaminyi doko sepala dokopa aopa kiŋi Esekaya dokome mona randame kumuo banya komau pingi dupwa minyuo pilyapala baa kumanda piso kondome kumuo komau wapungi dupwa wapupala Kamongona tembole anda dokona peya. Papala baame akali Eleakimi kiŋinya anda iso karenge akali mupwa dokope kote singi dupwana pepa pingi akali Sepena lenge dokope dee purisi andapae dupwape akali Amosena ikinyingi poropeta Aisaya lenge kareyamo dokona pena leya. Nakama opetaeko kondome kumuo komau wapungi dupwa wapuyami. Wai pii dake baame Aisaya lamainya lao lamaiya. Epapu yuu gii dake randa nyingi yuu gii. Dokona namwa randa nyuo elyame kumulyamano. Namwa enda wane repeta manjalana pingi doko kapa manjira ingya nange dopale ingilyamano. Yuu Asiria kiŋi akali dokome banya akali mupwa dokome Anatu lete karenge doko kando kilya kando lala pena leya. Embena Kamongo Anatu dokome doo kilya kando letaminyi wambu dupwana pii sepala nakama randa mainya. Dokona lao namwana wambu lapo mee lete piso petaminyi dupwana lao Anatu keta ateŋa lakaminya lena leya.

Dokopa Aisayame kiŋi Esekayana pii doko sepala dokopa banya pii dake isingi leya. Kamongo dokome emba nyiso kyawa lete nyii naraŋa lao Asiria wambu dupwame pakanyi pyambuo laraminyipape nakama paka nao karalapape, Kamongo dokome nakama langilyamo. Kamongo dokome kiŋi akali doko pii kyambo lapo sepala banya rangena yuu dokona kapu kyuo pena lao pira. Dokopa Kamongo dokome baa nyepala yuu dokona wambu lapome baa pyao kumakaminya lara, leya.

Asiria Wambu Dupwame Randa Mende Epara, Leyami

Yuu Asiria kiŋi akali dokome yuu Lakisi yaki nyepala yuu repeta taone Lipina dokona wambu dupwa pipya pimwaiyuo pyala peyamo doko yuu Asiria akali mupwa dokome leyaminyi siya. Dokona lao baa pii lamaila peya. Yuu Isipi yanda singi dupwa Itiopia kiŋi akali Tiraka lenge dokome laminyuo epo nakama pyala epelyamo leyami pii doko Asiria wambu dupwa siyami. Pii doko yuu Asiria kiŋi akali dokome sepala pepa pase mende kiŋi Esekaya yuu Juta range maiya. 10 Pyao maiyuo lao, Anatu emba keta pyamalyuo karene dokome emba isa pao nambana kingi raka dokona palya nareŋe lao langipya. Dopa pyuo langipyamopape dokome emba kokwa soo koo keta nemba nana lape, leya. 11 Yuu Asiria kiŋi akali dokome yuu muu wakale dupwana mendepe pyao kokwa seroŋo lao suu pingi dupwa pyao kokwa sepala kaenge doko emba singi. Embame suu pyapinyi dokopa emba range kyawa lete nyero lao silisi? 12 Nambana rora ambasu dupwame yuu taone Gosanepe yuu Arane dee Oresepe pyao kokwa siyami. Kokwa sepala yuu Betetene wambu yuu Telasa palenge dupwa pyao kumakayami. Dokopa nakamana mee bange kingimi wasisi anatuŋu lao lakandenge dupwana mendeme nyiso kyawa lete nyii nayami. 13 Yuu taone Amati kiŋi dokope yuu Arepate range kiŋipi yuu Separaime kiŋipi yuu Ena kiŋipi dee yuu Ipa kiŋipi dupwa anja karamisi lao pepa piya.

14 Dokopa kiŋi Esekayame wai pii minyingi akali dupwa keta pepa pyasi minyuo epeyami doko nyepala yaka leya. Lapala baa tembole anda dokona peya. Papala pepa pyasi doko Kamongona lenge kambu siyamo dokona pee lao reteya. 15 Retapala ateŋa lao, O Kamongo Isaraele wambunya Anatu, lete bange papake karenge ketae embena kiŋi petenge isa dokona petenge. Emba Anatu mendaki iki. Emba yuu muu dupwana rara karenge dupwa peparae isingi. Embame yake yuupi dupwa pyuo wasii. 16 Epapu Kamongo namwa keta mende pilyamo doko kandape. Kamongo emba lete karenge doko kando akali Senakeripi dokome kilya kando letamo pii dupwa peparae sepe. 17 Kamongo, namwa peparae silyamano. Doko yuu Asiria kiŋi akali dupwame akali rara malu pyao kokwa soo dee nakamana yuu dupwana mende pulya nana lao apa nyuo pingi. 18 Pipala nakamana mee bange anatu dupwa kisinyi nembakamingi. Dupwa anatu angi daa isa kanapeme anatuŋu lao mee wambunya kingimi wasisi dupwa kiso nembenge. 19 Dokona epapu Kamongo namwana Anatu Asiria wambu dupwa pipya namwa kyawa lete nyuo nyisape. Dokona lao yuu muu dupwana wambu rara palaminyi dupwame peparae Kamongo emba iki Anatu lao soo nyinyale, leya.

Aisayame Kiŋi Doko Wai Pii Lamaiya

20 Dokopa Aisayame kiŋi Esekaya lamaiyuo, Kamongo dokome kiŋi dokona ateŋa doko sepala isingi yano pyapya lao wai nembeya. 21 Kamongo dokome lao, Senakeripi yuu taone Jerusaleme dokona wambu dupwame emba kando giyuo karenge. Giyuo karapala emba kando kilya kando lao male lalya lana pingi. 22 Embame api kilya kando letoŋo lao suu pyapisi? Isaraele wambunya Anatu Poo Pyasi doko embame nambana kingi ketae pyambuo laa napi. 23 Embena wai pii minyingi akali dupwame namba keta emba range lakando embena mena oseme ipyuo papingi uliuli dupwa peparaeme yuu Lepanone dokona yuu kyau kamame ketae dupwa isa palyuo wini pipu laope dee emba range lakando pyuo isa sita lenge ama londe dupwa poko isa palyuo dee isa saiporose ama keyange dupwa poko pao imwa anda suku dokona kando nyipu lapi. 24 Emba range lakando lao yuu wakale dupwana yuwale apu rapala ipwa kamuo nenge doko lapi. Dee embena yanda singi dupwa yanda makao kimbu pyao piso epo ipwa Naele sokona lao pisimi lapi.

25 Nambame dupwa peparae yuu wamba rapa rapa pyuo reteyo doko emba kaname see nangese? Epapu dakepa nambame minyuo pulyuo raelyo. Yuu taone kana kame porai awali lao palenge dupwa nyuo koo ingyuo kokwa sinyi nembo pepe lao nambame emba porainya renge jiyu. 26 Wambu dokona palenge dupwa porainya renge mende pali naya. Dokona pako walu lao mona nembo yamaranguyami. Nakama rambe yuunya andenge panda isako anda yanginya andenge dupwa neta potemenge dorena isasa pyuo piso dokopa rakusi renge dopale ingiyami.

27 Dopa pipyamopape nambame emba peparae soo otelyo. Emba aki mende pipipi dee anja mendasa pupipi dupwa silyu. Emba nambapa pimwaiyuo imbwapi doko soo otelyo, leya. 28 Nambame embena imbu singi andake dokope dee range mupwaŋa lao suu pyape dokope namba langiminyi soo nyipu. Dokona nambame embena gyaa kata dokona waeya puu palyaro dee ane bange mende nenge kata dokona palyaro. Palyapala wamba emba epee kata kande dokonako kamba kapu kyuo lanyuo paro, leya.

29 Enakana Aisayame kiŋi Esekaya lamaiyuo lao, Rengya mende pira dokona wambo dake pilyamo. Ee kana dakenape dee ee kana dumbinyape nakama witi jingi wambunya wara pii nange mee isa yokona poro lao andenge dupwa narami. Dopa piraminyipape ee kana ene eparamo dupwana nakama witi wara pipala pyakepo nyuo narami dee isa girapo wara pipala girapo jingi dupwa narami. 30 Yuu Juta dokona wambu lapo lete pisiraminyi dupwa au pyuo andapala ee waingi wara pilyaminyipa pingi pyao yuu koko papala jingi kapape pyao andenge dopale ingyuo ando kararami. 31 Yuu Jerusalemepe dee yuu kyau Sayonepe wambu pisiraminyi dupwa lapo lete ando kararamiŋi lao Kamongo dokome poraiyuo suu pyao leyamuli pyuo kararami.

32 Asiria kiŋi akali dokona lao Kamongo dokome pii dake leya. Baame yuu taone dakena sukusa pyaka soo dee wanga kakupi kuki mende yanda pimwaiyuo pyao sukusa peya narako. Dee yanda singi kuki mendemepe konambe embo yuu taone dakena repetape epa nara dee yanda singi dupwamepe yuu doko nyelana pyuo karapusi pyao kame pyuo sukusa palya naramiko, leya. 33 Asiria kiŋi akali doko kata wambo epeyamo dokonako dee kamba kapu kyuo para. Dokopa yuu taone dakena sukusa epa nara. Namba Kamongo dokome lapusa pilyamo, leya. 34 Nambana kendemande akali Dapiti kando lalu lao leyono dokome namba rangena kingi lao nambame yuu taone dake keta pyamalyapala nyisaro, leya.

35 Yuu gii kukwa dokopa Kamongona aŋala mende Asiria akali komau anda pyuo paleyami dokona papala akali ama malu (185,000) pyao kumakaya. Yuu gii mendena yangama dokopa nakama peparae kumasi siyami. 36 Dokopa yuu Asiria kiŋi akali Senakeripi baa yaki nyepala kapu kyuo yuu Ninepa dokona peya. 37 Yuu mendepa banya mee bange kingimi wasisi anatuŋu lao lakandenge kingi Nisiroko lenge banya tembole anda dokona lakando kareyamo dokopa banya ikinyingi lama mende Aterameleke lenge mende Saresa lenge dolapome nakambana wua gela dokome baa pyao kumakayambi.

Kumakapala nakamba range kyawa lete nyuo yuu Ararate lenge dokona peyambi. Dokopa ikinyingi mende Isarone lenge dokome rakangena panda nyuo kiŋi ingyuo kareya.
20:1—21:26Juta kiŋi Esekaya lenge doko anga andake piyamopape enakana kapa ingiya (rombo 20 dokona pii pyasi palamo). Juta kiŋi Manasapa Amonepa kareyambinyipa yulu lapo piyami (rombo 21 dokona pyasi palamo).


Copyright information for `KYC