2 Kings 24

Akali Jiyoakini Baa Juta Wambunya Kiŋi Kareya

Jiyoakini baa ee kana akalisa ipisu mange lama karo dokopa baa Juta wambunya kiŋi kareya. Karapala baame yuu Jerusaleme dokona kana rema nembo kiŋi ingyuo iso kareya. Banya endangi doko Nekusitane lenge yuu Jerusaleme range akali Elenatane dokona wanenge. Jiyoakini banya rakange yulu pingi dupwana mana nyepala Kamongona lenge kambu dokona kooko pyuo kareya.

10 Banya iso kareyamo yuu gii dokopa kiŋi Nepukatenesana akali mupwa dupwame yuu Bapilone ami yanda singi dupwa lanyuo yuu Jerusaleme pyao nyela epeyami. 11 Dopa pyuo kareyaminyi dokopa kiŋi Nepukatenesa baa yuu Jerusaleme epeya. 12 Dokopa kiŋi Jiyoakini banya ikinyingi dupwape banya endangi dokope dee banya akali mupwa dupwape dee kiŋinya anda yuupi dupwana akali mupwa dupwape pipya Bapilone wambu keta peyami. Doko Nepukatenesa baa ee kana mange lama karo wambu dupwa iso kareyamo gii dokopa akali Jiyoakini puu maiyuo nyepala peya. 13 Dokopa tembole anda dokonape dee kiŋinya anda dokonape bange kulisa rungi rungi pisi singi dupwa peparae nyuo yuu Bapilone minyuo peya. Kiŋi Solomoneme tembole anda dokona yulu piramiŋi lao kana golome bange waso reteyamo dupwa Kamongo wamba lamaiyamuli pyuo Nepukatenesame pyao poro lanyi nembeya. 14 Akali mupwa peparaepe kiŋinya wane peparaepe dee Jerusaleme wambu peparaepe nyuo pyaso dokopa taosande akalisa (10,000) kiŋi Nepukatenesame puu maiyuo nyuo peya. Papala baame akali mora piso yulu pingi dupwape dee ane dupwame bange wasingi akali dupwape opetaeko yuu wakale mendena karapusi ingyuo nembeya. Dopa pipala wambu pendewale dupwa iki yuu Juta petena lao yaki nyuo kaeya.

15 Dopa pipala Nepukatenesame akali Jiyoakini baa karapusi ingyuo yuu Bapilone lanyuo peya. Dee kamame banya endangipi etengepe banya akali mupwape dee Juta akali kyawa dupwape opetaeko puu maiyuo minyuo peya. 16 Nepukatenesame akali kamongo dupwa peparae yuu Bapilone nembo oteya. Nyuo pyaso dokopa taosande yanda ipingi (7,000) ingiya. Dee mora piso yulu pingi akali taosande mendaki nyiya. Dee dokona pyasapala ane isame bange wasingi akali dupwa opetaeko nyuo piya. Doo nyiyamo dupwa peparae akali kuli poraingiko yanda singinyape kapa karapengele akali dupwa nyuo peya.

17 Nepukatenesame Jiyoakininya apange Matanaya lenge doko Juta wambunya kiŋi ingyuo karena rombo palyiya. Dopa pipala banya kingi alowa pyuo Setekaya leya.

Setekaya Baa Juta Wambunya Kiŋi Kareya

(Je 52:1-3)

18 Setekaya baa ee kana akalisa lama ipisu mendaki dokopa Juta wambunya kiŋi kareya. Karapala baa kiŋi ingyuo yuu Jerusaleme dokona iso kareyamopa ee kana akalisa ipisu mendaki epo peya. Banya endangi doko Amutale lenge yuu taone Lipina range akali Jeremaya lengena wanenge. 19 Kiŋi Jiyoakwimi Kamongo kando koo dokome piyamo dopaleko ingyuo kiŋi Setekayame Kamongo kando kooko pyuo kareya. 20 Dopa piyamosa Kamongo dokome Jerusaleme wambupi dee Juta wambu dupwape keta ama wakasa imbwuapala banya lenge kambu dokona rekya lao nyisa nembeya.

Copyright information for `KYC