2 Samuel 23

Dapitinya Pii Lao Lumwa Pyuo Leya

Dapiti akali Jesena ikinyingi dokome Kamongome mupwa inginyi nembeya. Akali doko Jekopena Anatu dokome baa kiŋi ingyuo rombo palyiya dokome kenane pii keyange dupwa Isaraele wambunya pyao retakamiya. Dokona pii dake Dapitimi lumwa pyuo leya.

Kamongona Imambu dokome namba keta pii letamo.
Banya wai pii dupwa nambame lakare lao jingi.
Isaraele wambunya Anatu dokome pii leya.
Isaraele wambunya konambe ingyuo alya isa ingingi dokome namba langyuo lao,
Kiŋi akali kata rolae dokona iki wambu dupwa iso karo
dee Anatu lengenyili pyuo iso karenge doko
wamba yangama kopa yake dokona see nalyamopa neta iki rao karenge dopale ingilyamo.
Dee baa apunda epo sokwa pelyamopa netame isako dupwa leya leya pinyi pyambungi dopale ingilyamo.

Kamongome namba kando pii kana minyuo lalu lao leya dokona
Anatumi nambana manjirunu dupwa elyape keta pisinyi pyambwakara.
Dee pii angi kinyi walengena palyuo yaki nyuo kaeya naro, leya.
Pii lalu lao lapala alowa pii nange dokona namba moname nyilyamo.
Dokona Anatumi namba dopa pyuo angi pyakaramo dokopa anamasi minyuo kararo.
Dopa piramopa akali Anatu suu pyaa nange dupwa nepereke neta nembenge dopale ingyuo nembenge.
Dokopa wambu mendemepe kingimi minyandara ingya nange.
Mendeme puu reke karenge doko minyandalena suu pyarami ramo doko bange aneme wasisipi dee kakupi lapo nyepala minyarami.
Dokopa nepereke puu doko isareme rao otalu oto otara.
23:8—24:25Pii lumwa pyuo reteya. Dapitinya yanda singi mupwa dupwana kingi pyasi palamo. Yuu mendepa nakamame Isaraele wambupi Juta wambupi yaka leyaminyi dokona pii palamo. Dee yuu mendepa wambu malu yanyi nyiyaminyipa Kamongo dokome yanyi isa palyiya. Pii dupwa palamo.

Copyright information for `KYC