Daniel 9

Danieleme Banya Wambu Dupwana Lao Ateŋa Lakamiya

Akali Darisi yuu Mitia range Sekesena ikinyingi doko kiŋi ingyuo yuu Bapilone iso kareya. Ee kana mupwa dokona akali baa kiŋi ingyuo kareyamo dokopa namba Danieleme buku poo pyasi dokona mana nyuo kareyo. Doko ee kana akalisa yanda ipingi dusipana yuu Jerusaleme doko kwaeyo momo nao paraŋa lao poropeta Jeremaya lamaiyamuli pyuo mana nyiyu. Dokopa namba kumanda piso wapungi komau wapuo nenge wasaka pyuo peena piso Kamongo Anatu lao ateŋa poraiyuo lao baa piso sokondali pyuo peteyo. Nambana wambu dupwana koo dupwa kame sakaminya lao nambana Kamongo Anatu kando ateŋa lakamiyu.

Nambame lao, Kamongo Anatu emba kamame andake. Namwame emba ketae pyambuo rape rape lao lakando karamano. Emba embena kana minyuo lalu lao lenge pii doko suu pyao minyaro karenge. Dee wambu lapome emba mona reto embame pii lengenyili pyuo pingi dupwa embame mona retalu reto retenge.

Namwa yulu koo pingi. Namwa koo dokome kopetame pyuo karenge. Embame namwa mawa pii langyuo dopa pipwa dapa pipwa leene dupwa namwame kamba lao mata joo peyama. Dee embame yulu rolae lasaka pii dupwa yaki nyuo kaeyama. Embena kendemande akali poropeta dupwame embena kingi dokona lao namwana kiŋi akalipi akali mupwape rora ambasupi dee namwana wambu peparaepe lamaingi dokopa namwa see nalu nayama. Emba Kamongo yuu peparae rolae pyuo karapinyipape namwa yulu koo pyuo range keta elya nyuo karamano. Namwa wambu yuu Juta palengepe yuu Jerusaleme palengepe dee Isaraele wambu peparaepe emba yaki nyuo kaeyama. Dokona lao embame repeta nanesape dupwana palu pena lao minyuo muu raleya lao nembee dupwame dopa pyuo kareyama. Namwana kiŋipi akali mupwape rora ambasupi dupwame yulu elya pingi dupwa pyuo dee Kamongo ema kando yulu koo pyuo kareyami. Namwame emba kando koo pyuo mona kana poko mata jiyamanopape embame sakame kumuo kame sakame kumuo kame sakao karenge. 10 Embena kendemande poropeta dupwa keta lowa pii namwa jiinyi dokome laramuli pyuo palipwa lao namwa langipinyipape Kamongo Anatu namwame embena pii doko soo nyii nayama. 11 Isaraele wambu peparaeme embena lowa doko kamba lapala embame lapinyi dokona selena wangu laka nayami. Namwame emba kando koo piyamanosa koo keta palena lenge pii dupwa embena kendemande Mosesena lowa dokona pyasi palamo dupwa embame namwa keta palena leene. 12 Namwa iso karenge akali dupwape dee namwape keta mende piru leene doko mee pii. Dokona lao yuu taone isa yuu dakena silyaminyi dupwa pyao kokwa soo nembenepape embame Jerusaleme kamame wakasako ingyuo randa maiyuo pyao kokwa sinyi nembee. 13 Mosesena lowa dokona randa nyerami lao lapyamo dusipa pepare namwa jii. Jiinyipape kamame epapu Kamongo Anatu namwana koo dupwa yaki nyuo panda embena pii kinyi angi dokona moko minyuo pao emba rae mainyi pyambwalana lao suu pyaa nayama. 14 Emba namwana Kamongo Anatu doko yuu peparae rolae pingi dokome namwa randa jelana rapa rapa pipala angi randa jii kande. Dopa piinyipape namwame embena pii sili see nale lao kareyama. 15 Namwana Kamongo Anatu, yuu Isipi piso embena wambu dupwa lanyuo epeene dokome embena porai renge doko lasaka pii. Dokona lao wambu dupwame embena porai renge dokona lao mee suu pyaro karaminyi. Dopa piinyipa namwame kopetame pyuo yulu koo pyuo karamano. 16 Wamba dokopa emba namwa pipya pyamalyuo nyiso karenge. Dokona lao Jerusaleme pipya imbuo karalu kara napipi. Jerusaleme embena yuu taone doko. Dee embena yuu kyau poo pyasi. Namwana koo dupwanape dee namwana rora ambasu dupwana yulu koo piyaminyi dokona wambu yuu liti wakale wakale maki palenge dupwa peparaeme namwa kilya kandelyaminyi. 17 Anatu nambana ateŋa piso sokondali pyuo leto doko sepe. Sepala embena tembole anda kokwa siyamo doko karengenyili pyuo elya pepe. Emba Anatuŋu lao wambu peparaeme soo nyinyaleŋe dokona tembole anda doko kamba elya pepe. 18 Anatu namwana pii sepe. Sepala namwa randa aki nyilyaminyi lao kandape. Yuu taone dokona embena kingi singi dokona wambu dupwa randa nyilyaminyi doko kandape. Namwa rolae pyuo karamwandena daa. Embame sakame kumuo nyisingi dokome namwa emba kando ateŋa letamano. 19 Kamongo, namwana ateŋa sakape. Sakapala Kamongo namwana koo dupwa nyuo kame sakape. Kamongo namwana pii sepala namwa keta yulu keyange mende pyakape. Wambu peparaeme emba Anatu lao soo nyinyaleŋe dokona mende pinya suu pilini doko waiya lao pepe. Yuu taone dake embena. Dee wambu dae karenge dupwa embenako.

Rengya Pira Leyamo Dokona Geperieleme Polo Lamaiya

20 Nambame nambana Kamongo Anatu doko kando ateŋa lao nambana Isaraele wambu dupwana koo dupwa polo lakamyuo dee nambana koo dupwa polo lamaiyuo banya tembole anda poo pyasi doko karengenyili pyuo kamba elya pinya lao piso sokondali piyu. 21 Namba ateŋa pyao piso dokopa aŋala Geperiele kombeya wambo pii repa repa piyunu dokona kandeyono doko namba peteyono mare dokona bii lao epeyamo kandeyo. Doko kukwa mena pyao kiso maingi doko mairama yuu gii ingiyamopa kandeyo. 22 Baame polo lao, Daniele rengya mende pira dokona emba soo gisilase lao nyiso langyala epelyo, leya. 23 Embame kanda soo Anatu kando ateŋa lao piso sokondali pyuo leene dokopa baame emba isingi yano piya. Anatumi emba mona retenge dokome ateŋa isingi yano pyapyamo pii doko langyala epelyo. Dokona nambame pii repa repa angi piinyi dokona polo langirunu dokopa emba elya kalo soo pisipi.

24 Ee kana andete kisima ipisu akalisa mange mendaki (490) epo paparamopa Anatumi embena wambupi embena yuu taone poo pyasipi koo keta moko nyero lao rombo palyiya. Yuu gii dokopa koo dupwa kame sakaramo dokopa wambu dupwa rolae pyuo karalu kararami. Dopa piramo dokopa pii repa repa piinyi dokope dee rengya mende pira lao poropeta pii leyamo dokope angi kinyi ingyuo para. Paramo dokopa tembole anda doko dee yapasi ingyuo karara. 25 Dokona pii dake soo nyepe. Yuu Jerusaleme kamba elya pinya lao lamairamo yuu gii dokona piso pao Anatumi akali mende kyawa ingyuo rombo palyiyamo doko kararamo yuu gii dokopa ee kana akalisa kisima ipisu mange mendaki (49) dusipa epo para. Dokopa enakana yuu taone Jerusalemepe kata sukusa singi dupwape kana kame porai awali lao karengepe dupwa elya piraminyipa ee kana malu (434) karara. Kararamopape ee kana dusipana randa malu epara. 26 Ee kana 434 epo paparamopa nakamame Anatunya rombo palyisi akali mupwa doko mee langa pyao kumakarami. Dokopa wambu iso karenge akali mupwa mendena ami yanda singi dupwame epapala yuu taonepe tembole andape dupwa pyao lalyuo kokwa serami. Anatumi yanda pyuo randa epo pira lao reteyamo doko ipwa kopetame palyuo epenge dopale ingyuo lumwa pyuo epara. 27 Wambu iso karenge akali dokome wambu malu dupwa pipya ee kana yanda ipingi nembo mona mendaki palyuo pii walengena lao kararami. Ee kana rema dee kanya dusa ingyuo baame mena pyao kiso maingipi bange maingipi dupwa ote pyuo kaena lara. Dopa pyuo kaena lapala baame mee bange anatu kingimi wasisi mende tembole anda pinjingi londe dokona ketae pisara. Pisaramo doko pisaramoko pao akali pisiyamo dokona lao Anatumi yuu gii lumwa pyuo randa mairu lao rapa rapa pyuo reteyamo doko pyaka seramo dokopa otara.
10:1—12:13Wamba pii repa repa piyamo doko Daniele dee kando dee renge lapo opetae konda pyuo kando piya.


Copyright information for `KYC