Deuteronomy 32

Isa yuu yakepe dolapo pii lalopono dupwa selapa.
Kale yukupala nambana pii sokondali pipwape.
Nambana mana pii doko apu dopale ingyuo isa epara.
Eparamo dokopa isa yuu dokona pipyae lenge lenge papyuo ipwa ingyuo pete sera.
Nambana pii doko apu raa raa pyao
ee nyaŋa dupwana epenge dopale ingyara.
Nambame Kamongona kingi doko lakandaro dokopa
banya wambu dupwame baame yulu andake pilyamo lao polo larami.

Kamongo baa nakamana kyawa minyuo iso karenge ama porai wakasa.
Baame yulu peparae dupwana mende kyai pii nao rolae iki pingi.
Nakamana Anatu baa alowa pii nao kinyi angi dokona palyuo karenge.
Baame rolae ingyuo karo wambu peparae keta kapa kapa pingi.
Dopa pyuo karapyamopape nakamame baa yaki nyuo kaelyaminyi dokona banya wambu angingyuo kapa kara narami ingilyamo.
Nakamame yulu koo pyuo minyako pyuo karaminyi.
Nakama kopyali kyawa sisingi pali nange dupwa
dopa pyuo nakamame Kamongo doko rape rape lao kararamisi?
Baa nakamana rakange dokome nakama wasiya.
Baame nakama rara andake ingyuo wasinyi pyambuya.

Yuu gii kamame yuu wamba epo peyamo dupwana lao suu pyalapape.
Dokopa apa piya lao nakamana rakange dupwa piso soo langinya lalapape.
Yuu wamba piyamo dupwa akali alemo dupwame langinya lao piso selapape.
Kamongo Ama Ketae karenge dokome wambu rara wakale wakale dupwa yuu kapa paliraminyi dupwa rombo palyuo mokwa soo maiya.
Wambu anja palirami lao rombo palyiya.
Baame rara mendaki mendaki lao rapu pira lao aŋala mende rombo palyiya.
Dopa piyamopape Jekopena para pyasi wambu dupwa baa rangena ingyara lao rombo palyiya.

10 Baame nakama yuu muiyane mende see nange penda penda dokona
nyepo nyuo pambu lao papyuo kareyaminyipa kando nyiya.
Baa range poraiyuo iso karengenyili pyuo
konambe ingyuo nakama kako pyao mondo lao rapu piya.
11 Yaka kambeme yakane bii lena lao mana lamaiyuo
banya papake pee letamopa epo petenge doko suu pyao
Kamongome Isaraele wambu dupwa isa paa nana lao banya arapu dokona lanyuo papiya.
12 Yuu liti wakale dupwana mee bangeme wasisi anatu dupwana mendeme nyisa naya.
Kamongo baame iki banya wambu dupwa laminyuo peya.

13 Dopa pipala nakamame yuu kyau singi yuu dupwa isinya leya.
Iso karo yuu dupwana ee dupwana nenge andeyamo dupwa nakama neyami.
Nakama kana dupwana amburali ipwange lyiyamo kando nyiyami.
Dee nakamana isa olipi dupwa kana yuu dupwana mena mena lao andeya.
14 Nakamana mena bulamakao memepe dupwana anju ipwange endange palyuo kareyamopa kamuo nyiyami.
Mena bulamakao sipisipi memepe dupwa kameya rondo lasiko minyiyami.
Nenge witi elyapepe dee waene ipwange keyange rae mairamili dupwape nao kareyami.

15 Kamongona wambu dupwa kamongoyaminyipape nakama mona kana poko kamba leyami.
Dopa pyuo nakama mendasape kakasera kando lao nenge pyano sepala ando ama rondo lasi ingyuo kareyami.
Nakamana Anatu dokome nakama wasiyamo doko kame soo kaepala
dee nakama lete wai pyao nyingi akali porai doko mata maiyami.
16 Nakamame isa kanapeme wasisi dupwa kando lakandeyami dokome Kamongopa yango palyinyi pyambuyami.
Dee yulu koo piyaminyi dokome Kamongo imbwanyi pyambuyami.
17 Nakamame mee imambu koo anatu angi daa dupwa keta mena pyao kiso maiyuo kareyami.
Mee bange lapo Isaraele akali nakamana imbwange kauwangepe dupwa
wamba nyuo pyuo warombo soo kara nayami dupwa lakando kareyami.
18 Nakamame nakamana Anatu dokome nakama lete wai pyao pyuo nyingi porai dokome
nakama letena renge maiyamo doko kame siyami.

19 Kamongome banya ikinyingi wanengepeme dopa pyuo koo piyaminyi doko kandapala
imbu singi nyepala nakama mata maiya.
20 Anatumi lao dokopa, Wambu mona kana poko namba yaki nyuo kaelyaminyi dupwa nambame nakama kamame nyisa naro.
Dopa piru dokopa nakama apa pyuo kararamipi lao lenge makande pyuo kando kararole.
21 Nakamame nakamana isa kanapeme mee bange wasisi anatu dupwame imbu singi nyakayaminyisa
mee bange anatu angi daa dupwana yango palyuo karo.
Dokona lao wambu rara angingyuo kara nalyaminyi dupwa keta nakama imbu singi nyinyi retaro.
Dopako pyuo wambu kopyali minyingi dupwa keta nakama pipya yango palyinyi pyambwaro.
22 Nambana imbu singi dokome isare kekenge ingyuo boletoko lapala
isa yuunya bange peparae rara.
Dopa pyuo rao isa yuu koko dono kando nyepala
yuu kyau dupwana pingi moko minyuo rara.

23 Nambame nakama keta randa maiyuo karalu kararo dokopa
nakama pipya pimwaiyuo nambana wanga walakape peparaeme minyuo pyaro.
24 Nakama lopo yanenge isasape dokome kumarami.
Nakama anga yakaneme koo mange naramo kumarami.
Nambame mena suwape rae lenge dupwape dee kau wambu nenge dupwape
nakama keta ralinyi peyaronopa dupwame wambu dupwa pyao narami.
25 Yanda andake sipurarasa wambu dupwa kata barete dupwana pyasi serami.
Anda dupwana yamarangusi sepala kumarami.
Dopa piramo dokopa mapwae parangepe dupwa kumarami.
Wane nyaŋa dee alemope peparae popo paa nao kumarami.
26 Wambu mendemepe nakama suu pyao kara narami lao
nambame nakama pyao otapuli lao suu piyu.
27 Dopa lao suu piyunupape namba rangeme pyao minjuku minyinyi nembeyo dokome
nakambana yanda pimwai dupwame nambana wambu dupwa pyao isa palyilyamano kae lao
nanga kapape lyinya lao panda maiya naro ingilyamo, leya.

28 Isaraele wambu dupwa kyawa sisingi bolombalo lao
mona kuki mendepe pali napyamo karaminyi.
29 Yanda pimwai dupwame nakama akipamo anamasi minyiyamipi lao soo nyii nalyaminyi.
Apa pyuo piyape lao soo gisa nalyaminyi.
30 Apa pyuo lama ikimi taosande akalisa anamasi minyuo
dee mendakimi taosande mende pyao isa palyuo piyape? lao suu pilyaminyi.
Renge doko nakamana Kamongo Anatu dokome nakama yaki nyuo kaeyasa piya.
Nakamana Anatu Porai dokome nakamana yanda pimwainya kingi rakana palyakamiyasa piya.
31 Yanda pimwai dupwame nakamana anatuŋu lenge dupwa angi mende daalyamo.
Isaraele wambunya Anatu doko ama porai wakasande karamo lao silyaminyi.
32 Nakamana yanda pimwai dupwa yuu Sotoma Gomorape koo keta paleyami dopale ingyuo pelyaminyi.
Nakama girapo isa jingi kau pingi lyingipi dee jingi napala kumungi lyingipi dopale ingyuo pelyaminyi.
33 Kaumi wambu pinginya ipwange dokome waene wasingi dopale ingyuo pelyaminyi.

34 Kamongo nakamana yanda pimwaimi dopande pyuo karaminyi lao soo karamo.
Baame yuu gii angi pyaka sera mendepa randa mairuŋu lao isaro karamo.
35 Kamongome koo pirami dupwana bakeme pyuo isingi pyakamira
Yuu gii nakama randa narami doko repeta ipyamo pilyamo.
Dokopa isa paomene.
36 Kamongo banya wambu dupwa rale male lapala poraiyapa naramo kararaminyi dokopa
koo dupwa neta rekya lanyi nembo nyera.
Banya yulu pingi dupwa iki ingyuo saka nao karelyaminyi kandapala dokopa
sakame kumuo nyisara.
37 Dopa pyuo banya wambu dupwa nyisapala dokopa piso soo lao,
Nakamana mee bange anatu poraiŋi lao keta pyamalyiyaminyi dupwa anja karamisi? lara.
38 Nakama mena pyao kisiyaminyi dupwana kapa rukyuo maiyuo
ipwa waene nena lao maiyuo piyami dupwame
dakepa nyisala epena larami.
Dakepa randa dokona nenge rekya lao nyera dokona pyakao epena larami.

39 Namba doko iki Anatu ingyuo karo.
Wakale dupwa Anatu angi mende daa.
Nambame pyao kumasepala dee lete renge maingi.
Nambame wambu pyao ranjama nyepala dee pyuo nyingi.
Nambame pilyunu dupwa mendeme yanda pimwaiyarami ingya nange.
40 Kinyi kinyi namba Anatu mee karawako karenge dokome
kingi minyalyuo lalu lao leto.
41 Nambana yanda pingi wua gela doko nanga sepala
rolae pyuo
nambame yanda pimwai pipya koo dupwana yano nyuo
dee nambapa epe kanda narami dupwa pipya randa mairu ingilyamo.
42 Wambunya ranjama dupwa nambana wanga walakape nenge dupwana ropo lao lyuo karara.
Nambana wua gela dokome wambu namba yanda pimwaingi dupwa pyao kumakaro.
Mendeme nambapa yanda pimwaiyara doko lete karena laa naro.
Dopa pyuo ranjama nyuo pyasipi karapusi palengepe dupwa kumarami.

43 Dokona yuu mure lao Kamongona wambu dupwa lakandarami ingilyamo.
Kamongome banya wambu pyao kumakaelyaminyi dupwa isingi pyao randa maira ingilyamo.
Dokopa baame banya yanda pimwai dupwa keta yano nyuo
banya wambu dupwana koo dupwa nyuo kame sakamyuo pingi,
leya.

44 Isaraele wambu dupwa seramiŋi lao Mosesepa Josua Nanena ikinyingi dokopame kenane dake kamba lao lao piyambi.

Moseseme Mana Pii Lao Oto Leya

45 Moseseme Anatunya mana pii dupwa wambu lamaiyuo otapala 46 dokopa baame lao, Nakama epapu mawa pii dapwa peparae langilyu dupwa warombo soo minyuo pyuo karamape lao kandokondali pyuo karalapape. Dopako pyuo nakamana wanenge ikinyingipi dupwame Anatunya mana pii peparae yaki nyii nao rape rape lao minyarami lao nakamame nakama kamba lamaiyuo lamaiyuo pirami. 47 Mana pii dapwa mee pii yeelyo ingya nalyamo. Pii dupwame nakama palyuo kararami dokopa pingi pyaramo kararami ingilyamo. Dokona pii dupwa warombo soo rape rape lao minyuo karapala nakama ipwa Jotane yalo yuu nyuo palya panya pilyaminyi dokona yuu gii malu palyuo kararami ingilyamo, leya.

48 Yuu gii mendaki dokopako Kamongome Mosese lamaiyuo, 49 Yuu taone Jereko kanda kanda Moape wambunya yuu dokona yuu kyau Apirame singi dupwana papala yuu kyau Nipo dokona pulyuo pao karapala nambame Isaraele wambu dupwa yuu Kenane mainya pilyunu doko kandape. 50 Kandapala dokopa embena yangone Erone yuu kyau Oo dokona karo kumunya dopaleko ingyuo emba yuu kyau dokona karo kumare. 51 Renge kumarambinya doko nakamba laparaeme Isaraele wambunya lenge kambu dokona namba rape rape lao kara nayambi. Dee nakamba yuu muiyane Sini dokona yuu taone Katese repeta ipwa Merepa mare dokona karo nakambame wambu dupwana lenge kambu dokona namba kando nambana kingi ketae pyambwa nayambi. 52 Embame yuu angi doko nanesale karo kandare. Dopa pyuo kandarenepape namba Isaraele wambu yuu mairunu dokona emba sukusa paa nare, leya.

Copyright information for `KYC