Deuteronomy 33

Moseseme Isaraele Rara Dupwa Apa Pyuo Elyape Keta Pisara Lao Polo Lamaiya

Moseseme baa Anatunya pii lamaingi akali dokome yuu gii repeta kumara ingiyamo dokopa Isaraele dupwa elyape keta pisara pii dapwa lamaiya.

Kamongo doko yuu Sainai kyau dokona piso epeya.
Epo yuu Itome neta pyakaenge dorena neta potemengenyili pyuo epo dokopa
baa yuu kyau Parane piso banya wambu keta neta ranyi pisiya.
Aŋala taosande akalisa baa pipya kareyaminyipa
banya kingi rolaerena isare uliyapu rao kareya.
Kamongome banya wambu dupwa mona reto
kyawa minyingi
dokona lao namwa banya kimbu silyamo dorena pangu sepala
baame langilyamuli pyuo warombo singi.
Namba Moseseme Mawa Pii langiyu dupwa namwame yaki nyii nalyamano.
Namwana yuu liti dakena mawa pii dapwa wakasale ingyuo nyuo retarama ingilyamo.
Isaraele wambu dupwana mupwape dee rara peparaepe nakama mendakinya pyasiyaminyi dokopa
Kamongo baa epo nakama Isaraele wambu dupwana kiŋi ingyuo kareya, leya.

Dokopa Moseseme akali Urupenena rara dokona lao lao,

Banya rara andake ingya napyamopape
kapa pyuo rembe naa nana, leya.

Jutana rara dokona lao lao,

Kamongo embame nyisapili lao kee laraminyi doko sepala
rara wakale dupwa pipya deyako nyuo pyasapala
nakamana yanda pimwai pipya
yanda pimwaiyakamiri, leya.

Lipaena rara dokona lao dopa lamaiya.

Emba Kamongo dokome kana Urimi Tumimi dolapo keta karo
Lipae rara dupwa emba mende pipyali yaka lao suu pingi doko pano lasaka pyakamingi.
Embame yuu Masa dokonape dee ipwa Merepa dokonape
apa pilyamipi lao kandalana makande pyuo kandee dokopa nakama rolae pyuo yaki nyii nao karaminyi kandee.
Nakamame endangipa rakangepa kandowape dee pemalenge yangongepe kando sakao pyuo kareyaminyipape
embena mawa pii dupwa kamame ama porai wakasa minyuo pyuo
emba rape rape lao kareyami.
Dopa pipala embena mawa pii dupwape kana minyuo lalu lao lenge pii dupwape mondo lao minyuo kareyami.
10 Dopa pipala embena wambumi Mawa Pii dupwa warombo soo minyinya lao mana lamaiyakarami.
Nakamame embena kana pyare dokona mena pyao kiso joo kararami.
11 Dupwana lao Kamongo embame nakamana rara dupwa porai ingyuo penale lao wai kisakamipala
nakamana yulu pyuo pii laraminyi dupwa epe sakamyuo karape.
Dopa pyuo dokopa nakamana yanda pimwai dokona mende dee sipura nana lao
pyao ruki ruki lanyi nembakamipi, leya.

12 Benjamenena rara dokona lao dopa leya.

Rara dake Kamongome mona retapala kyawa minyuo karapenge.
Kwuara yangara piramo yaka lao baame nakama koo keta pali nana lao
baa nakama pipya role pyao karenge, leya.

13 Josepena rara dokona lao dopa leya.

Kamongome nakamana yuu doko elyape keta pisinyi pyambuo apunda peyakamyuo
dee yuu dokona ipwa guu lamu lae pyuo karakamyuo pinya.
14 Kamongome yuu dokona neta petenge yuu ingyuo pipwakamipala nenge wambu pyuo poo rakamyuo pinyale.
Dopa piramopa panyi apundape kana peparaena enengeme kamonganyi nembo manjo nao karenale.
15 Nakamana yuu kyau mee sulu singi dupwa pyuo wara piraminyipa nenge keyange dupwame simbwaro karena.
16 Nakamana yuu doko mena nengepe keyange dupwame mee poro lao keta pyao sinya lao
Kamongo baa keta keyange renge palenge
yuu isoko dokona isare kekenge ingyuo rao epo Mosese keta pii leyamo dokome dopa pyuo elyape keta pisara.
Josepe baame yangonge dupwana kyawa ingyuo kareyamo dokona
Josepena rara dupwa keta renge keyange dapwa epena.
17 Josepe baa bulamakao kalinya porai renge dopale palenge.
Dee yulu pingi bulamakao kali okese lenge dokona kyawa kulinya nenge potemo epenge dopale ingyuo nyuo pee pipala karara.
Banya kyawa kulinya nenge kyai doko Manasana akali taosandeme poraiyuo karaminyi.
Dokona mendeke ingyuo Eporaimena wambu ama malu taosande akalisa (10,000) karaminyi dopale.
Manda manjo pao piramopa porai dokome yuu liti wakale dupwana wambu rara dupwa pyao
Suu lanyi kipwa kipwasa palyuo karara, leya.

18 Sepyulane Isakana rara dolapona lao dopa lamaiyuo,

Sepyulane ipwa kotana pao bisinase yulu doko pyuo kakana pinya
dee Isaka banya bange dupwame banya yuu dokona pyuo andanyi nembara.
19 Nakamame wambu yuu muu wakale range dupwa nakamana yuu kyau dokona epena lapala
bange Kamongome letamuli pyuo pyao kiso maiyuo
ipwa kota dokonape kee kama dupwanape
bange seramo nyuo kamongarami, leya.

20 Gatena rara dokona lao dopa lamaiya.

Kamongo Anatu nakamana yuu andake ingyanyi nembeyamo dokona kingi doko lakandalapape.
Gatena rara dupwame mena laeneme isaro soo
ayemba kingipi pyanyi nembalamuli pyuo pyao karenge.
21 Isaraele mupwa dupwame yuu mokwa siyaminyi dokopa Gatena rara dupwa yuu keyange amenge pingiko nyiyami.
Nyiyaminyi yuu doko nakamana akali mupwa dupwa iki kapa nyerami ingiya.
Isaraele akali mupwa dupwa malu palyuo kareyaminyi dokopa
nakamame Kamongona lowa piipi mawa piipi dupwa warombo siyami, leya.

22 Danena rara dokona lao dopa lamaiya.

Dane mena laene yakane dopale ingyuo
yuu Basane karo pyakao neta epenge, leya.

23 Napatalaina rara dokona lao dopa lamaiya.

Napatalaina rara doko Kamongome epe kandapala mena wai kiso nenge andakamyuo kamonganyi nembenge.
Nakamana yuu mendaki dokonako pao yuu dulurena piso epo ipwa Galili pete dokona suu lapala dee lama donorele para.

24 Asana rara dokona lao dopa lamaiya.

Asana rara dokona rara doloma nyuo isa palyili lao
ee wara pyuo nao mena wai kiso pirasa
banya yangonge dupwame baa mona reto epe kando karena.
Banya yuu dupwa olipi isa dupwame kamonganyi nembena.
25 Banya yuu taone dupwana kapa kararami lao ane isa dupwame kambu kii palyinya.
Baa keta pundu yandape epa naramo karena, leya.

26 Isaraele wambu dupwa selapape. Anatu mende nakamana Anatu kamame andake
neta renge dokome yake dorena piso oko soo epo
dee kopa rakapana dokona piso nakama nyisala epenge kandale dopale mende kara nalyamo.
27 Anatu baa yuu peparae nakama kyawa minyuo karenge.
Banya kingi dolapome nakama paka pyao soo karalu karenge.
Nakamame pyao pelyaminyi dokopa baame nakamana yanda pimwai dupwa pyao ralinyi nembakange.
Dopa pyakapala nakama langyuo, Pyao kokwa selapape, lao langingi.
28 Dokopa Jekopena para pyasi dupwa mona seramo piso palyuo pilyaminyi.
Yuu dokona pundu yandape mende pisa napyamopa yake dokona piso pipyae kondanyi yuu dokona pisilyamo dokona
witi jingipi ipwa waenepe mondo lao andara.
29 Isaraele wambu nakama raeme kumulyaminyi kande.
Kamongome nakama nyiso lete nyipyamo dopale ingyuo
yuu liti menge dupwa Kamongome nyisapyamo kara nalyaminyi.
Kamongo baa nakamana konambe wua gelape ingyuo baa nenge nyakalyamo.
Dopa pipala nakamana yanda pimwai dupwame sakame kumuo karamili lao piso soo epeyami kande dokopa
nakama pyao kalya pisi pisi pyuo anamo kararami.
Copyright information for `KYC