Exodus 32

Bulamakao Ikyane Golome Wasisi Doko

Mosese baa isa epa nao yuu kyau dokona andarele kareyamopa wambu dupwame kandapala Erone kareyamo dokona sukusa sukusa pyuo epapala dopa lamaiyuo, Namwa Isipi kareyamanopa nyuo lanyuo epeyamo akali Mosese doko epapu apa pilyamo lao soo gisa nalyamano. Dokona mee bange anatu lao mende wasakape. Dokome namwa lanyuo penale, leyami.

Dokopa Eroneme nakama lamaiyuo, Nakamana endape wanepe wanakepe dupwana kana golome kalena pingi bange dupwa nyepala namba karo dakena minyuo ipupwape, leya. Dokopa wambu peparaeme kana golome kalena pingi bange dupwa nyisa nyepala minyuo epo Erone maiyami. Dokopa baame kana golo kalena pingi dupwa nyepala kiso lili lao ipwa ingiya. Ingiyamopa yuwale mena bulamakao dopale ingyuo apu rao reteyaminyi dokona golo ipwange doko kulimbwanyi pyambuya. Pyambuyamopa golo dokome bulamakao ikyane wasiya.

Dokopa wambu dupwame lao, Isaraele dupwa dake namwana anatu yuu Isipi yaki nyuo lanyuo epeyamo dokoŋo, leyami.

Dokopa Eroneme golome wasisi mena bulamakao kareyamo lenge kambu dokona kana pyare mende leya. Lapala lao, Rakya Kamongo doko kingi ketae pyambuo lakando nenge andake kiso mairama, leya. Leyamo dokopa yuu gii mende dokona wamba yangama dokopa wambu dupwame mena lapo minyuo epo pyao kiso maiyuo dee lapo dupwa nakama pipya Anatumoo mona mendaki palyuo kiso maiyuo piyami. Pipala nakama nenge nao piso kopetame pyuo ipwa biya nao kepo pyuo peteyami.

Dopa piyaminyisa Kamongo dokome Mosese lamaiyuo lao, Embena wambu yuu Isipi yaki nyuo lanyuo epee kande dupwame namba mata joo yulu koo pilyaminyi dokona dakepa aopa waiya lao lupyuo puu, leya. Dopa lao, Nambame nakama mawa pii lamaipala moko minyuo pinya leyono doko yaki nyuo otami. Dopa pipala nakama kana golo kiso lili lapala mena bulamakao mende wasami. Wasapala doko lakando mena pyao kiso maimi. Maipala nakamame lao, Dake namwana anatu namwa yuu Isipi yaki nyuo lanyuo epeyamo dokoŋo, lami. Nakamana mona kana poko pilyaminyi doko namba silyu, leya. 10 Namba nakama pipya imbuo pyao kokwa sero dokona epapu embame namba daa lao kata rokwa napipi. Dopa pirunu dokopa embape embena para pyarene dupwape jingi para pyao andakinyi pyambwaro, leya Kamongome.

11 Leyamopape Moseseme banya Kamongo Anatu doko kando poraiyuo piso sokondali pyuo lao, Kamongo embame embena wambu dupwa kyawa lete nyuo yuu Isipi piso embena porainya renge dokome nyuo minyuo epee dupwa akipamo nakama kando imbumi kumarese? 12 Isipi wambu dupwame dopa lao, Embena wambu yuu Isipi yaki nyuo lanyuo pee dupwa yuu kyau dokona pyao kumuo kokwa soo nembalu nembo nembalana lanyuo pee lyamo lao akipamo laramisi? Dokona imbwa nao embena suu pingi alowa pipala embena wambu dupwa keta randa doko mai napipi. 13 Embena kendemande akali Aporakame Aisake Jekopemoo dusipana lao suu pyaro karape. Karo nakama kando embena pii lalu lao lao, Nakamana wane manjiraminyi dupwa kamame wakasa yakena bui dopale ingyuo ando kararami. Nakamana para pyaraminyi dupwame yuu mairu lalu lao leene doko nakamana ingyuo dokona palyuo karalu kararami leene doko suu pyaro karape, leya. 14 Leyamosa Kamongo dokome banya wambu dupwa randa maiyuo pyalana suu piyamo doko alowa pipala pyaa naya.

15 Dokopa Mosese yuu kyau doko yaki nyuo kana para lamana paki pakipi mawa pii dupwa pyasi paleyamo dolapo soo lupyuo peya. 16 Anatumi baa rangme kana para lama wasapala dolapona mawa pii peparae pyao reteya.

17 Wambu dupwame pii porakai leyaminyi doko Josuame sepala Mosese lamaiyuo lao, Wambu dupwa paliminyi yuu dokona yanda pyuo pii laminyi doko silyu, leya.

18 Leyamo dokopa Moseseme lao, Doo letaminyi dokome yanda pyuo wini pipala letaminyi ingya naope panda pyao anamasi minya napala ee lenge dopale ingya naope pilyamo. Doko mee kenane poponge epelyamo, leya.

19 Lapala Mosese baa yuu paleyaminyi dokona repetale epo karo mena bulamakao dokope wambu rae maiyuo kenane pyao malya pyao kareyaminyi dupwape kandeya. Kandapala baa ama imbumi kumapala kana lama soo epeyamo dolapo yuu kyau dokona isarena pyao pisiyasa poro leya. 20 Dopa pipala baame mena bulamakao wasiyaminyi doko nyepala isarena kiso kuku piya. Pipala kuku pisi dupwa nyuo ipwa dokona pyasiya. Pyasapala Isaraele wambu dupwa kamuo nena leya. 21 Dokopa Moseseme Erone kando lao, Wambu dupwame emba kando aki koo mende pimisa embame nakama yulu koo andake dake kapa pinya lao panda maipisi? leya.

22 Dokopa Eroneme isingi lao, Embame namba kando imbwa napipi. Wambu dapwa rangeme porayapala yulu koo doko pimwalinya suu pyao karenge doko emba soo otelene. 23 Wambu dupwa dopa lanyuo, Mosese Isipi karo namwa nyuo lanyuo epeya doko epapu baa apa pilyape lao see nalyamano dokona epapu embame anatu mende namwa lanyuo para lao wasakape, leyami. 24 Dopa leyaminyi dokopa kana golome wasisi kalya pingi bange dupwa minyuo epo jinya leyo. Dokopa wambu lapome bange reteyaminyi dupwa nyisa nyepala jiyami. Jiyaminyi dupwa isare dokona pyao pyambuyu dokopa bulamakao ikyane dake mee maso sipuro epeya, leya.

25 Erone baame Isaraele wambu dupwa poraiyuo rapu pii nayamosa mee bolombalo lao karo yulu kopetame pyuo kareyaminyipa yanda pimwai dupwame nakama kando giyuo kareyami. Dopa piyaminyi doko Mosese kandeya. 26 Kandapala Mosese baa yuu paleyaminyi kame kambu doko karapala poraiyuo kyakale lao, Nakama lapo Kamongona wambu ingyuo karaminyi dupwa namba karo dakena ipupwape, leya. Leyamo dokopa Lipae wambu peparae dupwa baa kareyamo dokona epo malu palyiyami. 27 Baame nakama lamaiyuo lao, Kamongo Isaraele wambunya Anatu dokome nakama peparae langyuo, Mendaki mendaki lao embena wua gela doko nyuo minyapala yuu palaminyi dokona kanda kanda kame kambu dakena piso pao paki oto embena yangonepe puu minyingipi dee parali maki palengepe dupwa pyao kumakalapape letamo, leya. 28 Leyamo yuu gii dokopako Lipae akali dupwame warombo sepala wambu ama malu taosande rema (3,000) pyao kumuyami. 29 Dokopa Moseseme Lipae akali dupwa lamaiyuo lao, Nakamana yangongepe ikinyingipi dupwa pyao kumakami dokona nakama yapasi ingyuo Kamongona purisi karaminyi. Dokona Kamongo dokome nakama elyape keta pisapya, leya.

30 Yuu gii yangama dokopa Moseseme wambu dupwa lamaiyuo, Nakamame yulu koo dae pimi dake kamame koo ingyuo pelyamo. Dokona epapu namba yuu kyau Kamongo karamo doko dee kamba paro. Papala nambame nakamana koo dupwa nyuo kame sakana lao piso sero dokopa baame kame sakara rapisi, leya. 31 Lapala Mosese kamba kapu kyuo pulyuo papala Kamongo doko lamaiyuo, Wambu dupwame yulu koo andake pyuo kana golome anatu wakale wasapala doko lakando karami. 32 Dokona nakamana koo dupwa nyuo kame sakamipi. Kame sakami nare ramo doko buku embena wambu dupwa kingi pyao palyingi dokona nambana kingi palamo doko kwuanyi nembakape, leya.

33 Leyamo dokopa Kamongo dokome isingi lao, Doko wambu namba kando koo piminyi dupwana kingi dupwa nambana buku dokona pali nana lao kwuanyi nembaro, leya. 34 Dokona epapu nambame emba langiyunu yuu dokona wambu dupwa lanyuo pupi. Parene dokopa nambana aŋala dokome emba rapu pyuo karara. Dopa piramopape wambu dupwa koo piyami dokona randa mairunu yuu gii doko pyaka sera, leya.

35 Wambu dupwame Erone kando mena bulamakao ikyane golome wasakana leyaminyi dokona Kamongo dokome anga ikyane mende wambu keta peeya.

Copyright information for `KYC