Habakkuk 3

Apakukumi Ateŋa Leya

Dake poropeta akali Apakukumi ateŋa leya doko.

Kamongo embame yulu pii doko kando siyu.
Sepala namba yamarangyuo karo.
Yulu andake pinginyili pyuo namwa karamano dakepa pipi.
Imbu piya kandepe namwa sako karape.

Anatu baame yuu Itome karo kamba epelyamo.
Anatu poo pyasi doko baa yuu kyau Parane dokona karo epelyamo.
Banya yanga paupau lenge dokome yake doko kako penge.
Dokona isa yuu dokona karo baa ketae pyambuo lakandelyaminyi.
Kamongo Anatu baa yanga paupau lao yuu pele ingyuo epenge.
Banya kingi kape dokona piso yanga paupau lao epenge.
Bange porainya renge doko banya kingi kape dokona yalu piru karenge.
Anatu baame yanyi pingi doko wambu keta pena lenge.
Enakana kumungi renge doko pena lenge.
Lao karo otapelyamo dokopa yuusili minyingi.
Baame lengeme kandelyamo dokopa wambu dupwa walu walu lenge.
Yuu kyau sulu singi dupwa longwalya longwana pinya lenge.
Pilyamopa yuu kyau baa wamba papyuo kareyamo dokopa siyamoko singi dupwa purukwo ranenge.

Namba Kusane range wambu dupwa pakayaminyipa
Mitiane wambu dupwa pakapala walu walu lao karo piyaminyi kandeyo.
Ipwa dupwame Kamongo emba imbwanyi reteyamisi?
Ipwa kota dokome embena imbu singi nyakayase?
Emba kopa dokona piso epo
apu milirandakuna doko embena mena oseme ipyuo minyuo penge uliuli ingyuo ralipinya lapala
embena wambu dupwa dolona pyao anamena lao nyisii.
Embame embena yanda dokome pyalana rapa rapa pinyi dokopa
yanda ipyuo dokopa wanga dupwa simbwaro kareyamo dokopa
Embena yuu pele dokome isa yuu doko pyao rali pii, leya.
10 Dokopa yuu kyau dupwame emba kandeyami dokopa walu walu lao siyami.
Siyaminyipa yake dokona piso ipwa kulimbuo isa epeyamopa
Yuunya ipwa dupwa uu lao
kasakole minyuo ama ketae peya.
11 Peyamopa kaku walekape embena doko pundai pipala yanga paupau lao peyamosa
neta kanape dolapo romo pii nao mee kareyambi.
12 Emba yuu dokona imbu singi paleta yanda kata pao okosi sepala
yuu muu peparaena wambu dupwa kalyuo injii.
13 Embame papala embena wambu dupwa nyiso dokopa
embena rombo palyasi kiŋi doko nyisiiko.
Akali yulu koona mupwa ingingi doko pyapala
banya letamuli pyuo pingi dupwa pyao kokwa sinya nembalu nembo nembee.
14 Banya yanda pimwai dupwa ipwaŋa kulimbuli lao epo
namwa pyao bolombalo lanyi nembala epeyami.
Bange aya nange wambu dupwana bange dupwa yalu pyuo kingi rukyuo nyakamyuo pingi dopale ingyuo epeyami.
Dopa piyaminyipape dupwana yanda singi mupwa doko embame angi keta pii.
15 Embena ose akali dupwame ipwa kota dokona yanda kata peyamisa kota doko kipwa kipwa dolapona nyuo karalyapala
mee dulu ketae make make manjaro kareya.

16 Dopa pyuo pelyamo lao sepala walu lao kareyonosa dokome
namba kambu walu walu lapala pakalyo.
Pakapala nambana yongo doko wale wale lao yaku kuisi ingyapala
namba kimbu doko walu walu lapala pao palinya pilyu.

Anatumi namwa pyalana pilyaminyi dupwa randa mairamo yuu gii doko epelyape lao
elya kalo isaro pisiru.

17 Isa piki dupwa jingi lyii naramopape
dee isa girapo jingi dupwa lyii naramopape
dee isa olipi dupwana jingi lyii naramopape
dee ee dupwa jingi lyuo pii naramopape
dee sipisipi dupwa peparae kumuo otaraminyipape
dee bulamakao karenge panda dupwa apa seramopape
18 Kamongo Anatu baa nambana nyisingi akali dokona
namba mee rae maiyuo kararo ingilyamo.
19 Kamongome namba porainya renge joo karenge.
Baame namba suwa kata makandapala
yuu kyau pyaa narami panda mondo lao karenge dokona puu lao pingi.
Copyright information for `KYC