Isaiah 33

Nyisinya Lao Ateŋa Lenge Pii Doko

Namwana yanda pimwai dupwa nyuo anamasi minyaraŋa. Wambu wakale dupwame nakama pyao anda yuupi yanga nayaminyipape nakamame pyao anda yuupi yangeyami. Pyapala anda yuupi yangapala nakama randa nyerami yuu gii epara lao mona rando parami.

Kamongo embame mende piri lao soo karamano dokona namwa kando sakame kumuo karape. Namwa yangaramo yaka lao nyiso randa eparamo gii dokopa kyawa minyuo karape. Embame namwana lao yanda pyakarene dokopa yuu muu andake dupwana wambu wakale dupwa yanda keparoko doko sepala mee paka parami ingilyamo. Nakamana pinji andape dupwa waiya lao epo nyuo arete pirami ingilyamo.

Kamongome bange wambupi peparae iso karenge dokona baa apa pyuo wakasa lao see narami. Baame Jerusaleme dokona akali pii angi lao mona palyuo rolae pingipi dee rolo angi dokoko lengepe dupwame simbwaro karena lara. Dopa pyuo simbunya lapala wambu peparae porai ingyuo kame piru karena lara. Baame banya wambu dupwa kyawa minyapala mona angi palyuo singinya renge soo nyinginya rengepe maingi. Nakamana bange kulisa andake ingyuo retenge doko Kamongo baa wakasa lao suu pingi doko retenge.

Akali paka nange dupwame nyisinya lao kyakale letaminyi. Pii lakala pena lenge akali dupwa koo pyuku pyuku penge renge minyuo epena saka napala ee ramu ramu pyuo letaminyi. Kata andake jima jima dupwana yulu moŋo sipyasa wambu dokona papi nalyaminyi. Pyaso mendaki ingyarama lao wato lenge makande dokona waingi pyao minya nalyaminyi. Yulu dupwa kulimbuo dopa pyuo piramaŋa lao mona mendaki palyuo larami dupwa waingi pyao minya nalyaminyi. Dee yango mendena kingi dupwa ketae pyambwa nao kwuanyi nembo pilyaminyi. Yuu doko mee sinya lao yaki nyuo pelyaminyi. Lepanone imwa andake dokona isa yoko dupwa kope kape lapyamopa yuu Sarone amenge pingi rapu doko pao penda penda ingilyamopa yuu Besane yuu kyau Kamele dolapona isa yoko panda dupwa kirali pao kwaelyamo.

Kamongome Banya Yanda Pimwai Dupwa Repe Repe Lamailyamo

10 Kamongome wambu yuu liti wakale wakale dupwa lamaiyuo, Namba dakepa sipuraroŋo nambana porai renge palenge lao lasaka piroŋo kandalapale, letamo. 11 Nakama dopa pyuonde pimana lami dupwa angi ingya nao para dupwana mee kekenge pii lamisa isare dopale ingyuo nakama range kokwa silyamo. 12 Nakama nepereke karenge doko isareme kingi naso ralamuli pyuowape dee kana doko isareme rao lakao ranapala mee isare pee ingyuo isa puu pao parami. 13 Wambu repeta palenge dupwape nanesa dupwape nambame piyunu pii raiya dupwa sepala namba porainya renge palenge lao soo gisirami.

14 Sayone range wambu dupwa yulu koo pinya wangu lakange pako walu walu lao karo lao, Anatunya kote lao rolenge dokome isare ingyuo rao karalu karara dokona namwa apa pyuo lete kararama? 15 Lete karalana ramo doko rolae doko anjuku lao pirami. Nakama pendewa dupwa kando panga soo ilimungu kalimungu lao bange nyakami narami. Dopa pyuo kunji pyuo kana nakami nalapape. Nakamame wambu pyao kumakalana pingipi yulu koo wakale wakale pinya pingipi pipya role pyao kara nalapape. 16 Dopale karaminyi dokome yuu kyau dokona anda porai karenge dopale ingyuo au pyuo kararami dokopa nakamana yuu dokona nenge ipwape seramuli pyuo nao palu karalu kararami ingilyamo.

Rengyana Elyape Keta Pisirami Doko

17 Dopako pyuo kiŋi mendeme banya iso karenge yuu kata luna dusipana suu laro karo nanesa keyange ingyuo ando nyimbara dusipana iso kararamo kandarami. 18 Nakama mende pakao karaminyi doko yuu wakale range dupwame kana takisi nyakayaminyi dupwape yalu pyuo yuu pandape kandanyi lyakala epenge akali dupwape mee kombeyame ingyuo para. 19 Nakama kyaŋe singi wambu yuu nanesa range pii wakale lenge dupwana mende dee lenge kambu kanda narami. 20 Sayone yuu taone andake namwana misi lenge dokona pati lao kalya makandope pyuo pingi doko kandalapa. Jerusaleme doko randa see nange ingyaraŋa dokona yuu palu palenge ingyuo sera ingilyamo doko kandalapa. Yuu doko komau anda kana ingyaro karenge dopale ingyuo dee pinginya isa anda simu pyao minyaro karenge dopale dee banya puu doko porai rokwa nange dopalepe ingyuo sera. 21 Kamongome banya neta renge yulu doko namwa lasaka pira ingilyamo. Namwa ipwa kameya ruŋupaŋu pyuo epengepe ipwa pona kukipi repeta palyuo kararama ingilyamo. Dopa piramanopape yanda pimwai sipu dupwa minyuo repeta epa narami. 22 Ipwa sipunya komau porambaiye nyingi dupwa kaolena saka narami dokona komau rongo pipala mee serarami. 23 Ami yanda pimwai dupwana mena bangepe dupwa namwame nyuo soo parama ingilyamo. Mena bangepe ama malu seramosa kata papya nange wambu dupwame soo kaeyo seramo dokona nyerami ingilyamo. Kamongo baa range namwana kiŋi mupwa ingyuo namwa kyawa minyuo iso karara. 24 Dee namwana yuu dokona palirami dupwa peparae anga pilyamo lao mumu laa narami ingyara. Dee koo peparae nyuo kame sisi sera.
34:1-17Anatunya nyisu petenge dupwa kokwa soo paraminyi dokona kenane pii lao reteyamo dakena palamo.


Copyright information for `KYC