Isaiah 35

Kata Poo Pyasi Doko

Yuu bange anda nange muiyane doko rae wakasa maira.
Yuu dopale dokona kalya pingi isa dupwa jingi lyuo rao karara.
Yuu bange anda nange doko
yuu kyau Lepanone au piyamuli pyuo rae maipala kenane poraiyuo pyara.
Yuu Kamele amenge pinginyili pyuo yuu muiyane doko seramopa
wambu peparaeme Anatunya porai rengepe
neta rengepe yulu wakasape doko angi kandarami.

Kingi kondelyamo dupwape dee kimbu walu lenge dupwape
porainyi pyambuo karalapape.
Wambu yamarangyuo yaki nyelana pilyaminyi dupwa dopa lamaiyuo,
Anatumi nakamana yanda pimwai dupwa
isingi moŋo maiyakala epana pilyamo dokona
paka nana, lamai.

Lenge koo dupwa lenge rao kando
kalepoe dupwa pii soo pirami.
Papae rambungi dupwa sipurapala malya pyao
pii laa nange dupwa rae maiyuo kyakale lao pirami.
Yuu muiyane yando dokona ipwa lyuo para.
Yuu kee netame kana ingyuo rao alyingi dokona ipwa pete sera.
Yuu oo lasi dupwana ipwa renge palyuo guu lara.
Yuu koo yana suwa kararope palyuo kareyaminyi dokona
maimbupaka pulyuo pyuo karara.

Yuu dokona aewae kata ingyuo wasaramopa
kingi Poo Pyasi Kata laraminyipa
koo pingi dupwa kata dokona papya narami ingyara.
Kopyali minyingi dupwame kata dokona paa narami ingyara.
Mena nalana pingi
dee mena laenepe dupwa kata dokona papya naraminyipa
Anatumi kiiramo nyisi wambu dupwa iki
anda kata dokona parami.
10 Nakama rae maiyuo Jerusaleme kando nyuo dokopa
kenane poraiyuo pyao rae maiyuo parami.
Saka rengepe mona randange rengepe dupwa nakama keta epa naramopa
rae maiyuo karalu kararami.
36:1—39:8Asiria kiŋi Senakeripi lenge doko yuu Juta doko pyao nyela epeya. Yuu taone andake Jerusaleme doko Asiria wambu dupwana kingi raka lao Anatumi neta nyiya. Dee kiŋi Esekaya baa anga andake piyamopape enakana kapa ingiya.

Copyright information for `KYC