Isaiah 46

Yuu Bapilonena mee bange anatuŋu lenge dolapo pyao kokwa soo nembo ote piya.
Wambu dupwame Belo Nepopa yuu gii mendaki lakandepeyaminyipape
nakama mena dongena mata dokona nyuo retapala manjo peyami.
Isa kanape anatuŋu lenge dolapo kenda pingi dokome mena dupwa kendo yame yame leyamo manjo peyami.
Anatu lao kyambo lasi dolapo range kyawa lete nyuo neta epena saka nayambi
range karapusi anjisi pelyambinyi.
Dopa pipala yuu Bapilonena mee bange anatuŋu lenge dolapo pyao kokwa soo nembo oteya.

Isaraele rara dokona rembe nanao palaminyi
Jekopena para pyasi dupwa nambana pii dake selapa.
Nakama romba anda paleyaminyipape dee manjinyi peyaminyipape
nambame rapu pyuo karo andanyi pyambuyu kande dokome letoŋo.
Namba nakamana Anatu doko.
Nakama epapu piso pao nakamana kyawa yaku eparamo dokopa alemo ingyuo karaminyi dokopa
nambame wasiyunu dokona yaki nyii nao lanyuo papyuo karo pao kyawa lete nyuo kararo.

Api mende namba yale karapyandeme makande pyuo nambapa manda manjirase?
Namba yale mende mendasa karase? Kamongome dopa letamo.
Wambumi kana palyingi nyuu dupwa lumbwanyi karalyapala kana golo dupwa mee male male lao nembo
nakamame kana kulingi sikyali dokona piyami.
Dopa pipala kana golome wasingi akali dupwame anatuŋu lao wasinya lao
kingi wapambu lakao dokonako suu pyao misi lao karengepya.
Nakamba anatuŋu lenge bange minyalyapala lange dokome soo anda papala
banya singi mare dokona retenge.
Retenge dokopa romo pii nao sulu soo singi.
Mendeme nyisinya lao piso soo loma singi ramo dokopa romo napyuo pii isingi laa nao
dee randa nyilyamo dokona kyawa minya nangeko.

Koo pingi wambu dupwa nakama namba mende piyunu doko apa pii lao
dee kamba suu pyao pinginya nyuo manjipwape.
Yuu wamba yulu lapo piyamo dupwa suu pyalapape.
Namba iki Anatu angi doko.
Dee wakale mende namba yale manda minyuo mende mendasa karapyamo kara nalyamoŋo lao soo gisalapape.
10 Ene pirunu dupwana wambo kanda soo dokopa polo lao oteyo doko.
Nambame yuu wamba leyono dupwa pipala kaeyaro.
Nambana mende pinya lao rapa rapa pingi doko isa paa nange.
Dee nambame mende renge palyuo piruŋu lenge doko kaeya nao peparae pipala kaeyaro, leyo.
11 Nambame akali yuu neta pyakaenge dorena range mende epena lao kyakale leto.
Baame yaka ulisapu rendamu nyepala lupyuo epengenyili pyuo waiya lao lupyuo isa epapala
nambame rapa rapa pinyi reteyonoli pyuo pyuo otara.
Nambame leyo doko angi leyonoli pyuo pira.

12 Mona kana pokapala nakama simbi simbi pingi wambu dupwa
nambana mata kyakao nyerono renge doko nanesale silyamo lao suu pyao karaminyi dupwame kale yukupala selapape.
13 Namba pyao mata kyakao nyero yuu gii doko oo repeta minyuo epelyo
panda londesa see nalyamo.
Nambame anamasi minyuo pyuo nyero yuu gii doko oo repe repe pyuo retelyo.
Nambame yuu taone Jerusaleme doko nyiso pyuo nyuo
Isaraele wambu dupwa dokome kingi ketae palyinyi nembaro,
leya Anatumi.
47:1—48:22Rombo 47 dokona Bapilone doko isa paramo dokona lao leyamo pii palamo. Rombo 48 dokona apa pyuo Anatumi yulu andake pyuo banya wambu kyawa lete nyingi dokona lao pii palamo.


Copyright information for `KYC