Isaiah 49

Isaraele Wambu Dupwa Kamongona Kendemande Ingyuo Rara Peparaena Kendalina Mendeke Kararami

Wambu yuu muu ree lao nanesa palyuo pelyaminyi dupwame nambana pii dake selapape.
Doko yuu wamba namba manjipa nayaminyi dokopa
Kamongo dokome namba banya kendemande ingyuo karareŋe lao rombo palyiya.
Baame nambana pii doko mora pisinyi pyambuyasa wua gelana mendeke ingyuo neya.
Baa rangena kingi kape dokona namba reto lanyuo papiya.
Baame namba walakana mendeke ingyuo
rapa rapa pinyi sero pyuo wasiya.
Dopa pipala baame namba langyuo, Isaraele emba nambana kendemande.
Wambu dupwame emba dokona kandapala namba lakandarami.

Nambame lao, Nambame yulu pipunupape mendena ketae ingyuo pwamoŋo, leyo.
Nambame yongo kisinyi nembo nambana porai renge dokome yulu pipunupape
angi mende pyuo kapa pali nalyo.
Dopa pipunupape nambame Kamongo keta kamame pyuo pyamalyuo pilyu dokona
baame yulu pilyunu dupwana yano jera.

Kamongo dokome namba manjipa nayami dokopa
banya kendemande ingyapala Isaraele wambu dupwa sukusa sukusa pyuo nyuo kapu kyuo lanyuo epare lapala rombo palyiyapya.
Dopa pyuo Kamongome nambana kingi ketae pyambuo pingi.
Yulu peparaena porai renge dupwa baa keta piso epenge.

Kamongome namba langyuo,

Nambana kendemande akali doko emba yulu andake mende retakapunu silyamo.
Embame Isaraele wambu kyawa lete nyisi karaminyi dupwa iki
keyange ingyuo palyuo karalu karena lao piriŋi lao laa nalyo.
Dopa piramopape wambu rara peparaena lambe mendeke ingyuo karalase lao lao rombo palyaro.
Dokona lao yuu muu peparaena wambu nambana lete penge kata lasaka pirami ingilyamo.
Akali mende baa kando yuu liti wakale wakale range dupwame kilya kando awa nao karaminyi doko
randa nao karo
baa isingi akali mupwana kendemande yulu pyakamyuo karenge akali doko kando
Isaraele wambunya Anatu poo pyasi lete wai pyao nyingi dokome dopa pira, letamo.
Kiŋi dupwame emba kiiramo epare kandapala
nakamame sipurapala rape rape lao kararami.
Dee kiŋinya wane dupwame emba kandapala
isa pangu soo embena kingi ketae pyambuo lakandarami, lamailyamo.

Dopa pyuo para renge doko Kamongo dokome banya kendemande akali doko rombo palyiya.

Isaraele wambunya Anatu poo pyasi doko banya pii lalu lao lapala kaeya nange

Jerusaleme Enenge Ingyuo Sera Doko

Kamongo dokome banya wambu dupwa lamaiyuo,

Yuu gii angi nakama lete wai pyao nyero doko pyaka seramo dokopa nambame nakama anjiki pyuo
nyisa lao ee lao karaminyi dokona isingi yano pyakaro.
Nambame nakama rapu pyuo karo konambe ingyaro kararonopa
nakama keta wambu dupwa peparae kana minyuo lalu lao laro.
Nambame nakamana yuu dakepa mee apa soo peelyamo dokona
range piso palyuo pipwa, laro.
Nambame wambu karapusi palaminyi dupwa kando lao, Mee manda rasi nyisa pupwape, laro.
Dee lapo iminjinginya petaminyi dupwa
yanga paupau lengena epena lao piru.
Dopa piru dokopa nakama mena sipisipi yuu kyaunya rambi nao mondo lao karenge dopale ingyuo kararami.
10 Nakama dee ipwa nanome kumuope lopome kumuope pii nalu narami.
Mendeme nakama mona reto karapyamo dokome nakama lanyuo paramo dokona
yuu muiyane dokona neta dokomepe isasa pingi dokomepe nakama rao rakusi raa nara.
Baame ipwa guu lao epenge dupwanako lanyuo para.

11 Nambame yuu kyau dorena oko soo aewae kata ingyuo pyao retapala
nambana wambu dupwa pena lao kata mende wapuo retakamiru.
12 Nambana wambu dupwa kaname nanesa piso eparami.
Eparaminyi dupwa dulurena pisope neta yalyingi dorena pisope
dee yuu taone Asawane yuu Isipi dokona donorena singi dokona pisope eparami.
13 Dokona yake pandana palaminyi dupwa kenane pyalapape. Isa yuu dokome rae maiyuo pii ketae palyuo lape.
Yuu kyau dupwana piso kenane doko ipwa ingyuo langa kulimbwanyi peeyo epena.
Kamongo dokome banya wambu randa nyuo karaminyi dupwa sakame kumuo
mona minyarambu minyaro karara, leya.

14 Dopa leyamopape Jerusaleme wambu dupwame lao,

Kamongo dokome namwa kame soo kaeyo
kyawa yaki nyilyamo, leyami.
15 Dokopa Kamongo dokome isingi lao,
Endame wane banya rangena doko kame sepala kaengese?
Banya wane angi mandenge doko mona reta nangese?
Dokona lao kamame endangi dokome banya wane kame seramopape
nambame nakama kame see nalu nao naro.
16 Jerusaleme nambame yuu mendepape nakama kame soo kaeya naro ingilyamo.
Nambana kingi kape dokona nakamana kingi doko pyasi palamo.

17 Nakama dee minyalyuo nyerami dupwa oo repeta epelyaminyi dokopa
nakama kokwa siyaminyi dupwa yaki nyuo kala parami ingilyamo.
18 Kamenge kara napala apa pilyamo lao paki pakipi kandarapu pyuo karalapape.
Nakamana wambu dupwa anda epena elyambu pyuo epelyaminyi.
Kinyi namba lete karalu karenge Anatu doko suu pyao
nakamame nakamana wambu kandapala dokopa
enda mapwaeme lyange mamakupi soo kalya pyuo akalinya anda pao rae maiyuo pamoli pyuo rae mairami ingyara.

19 Nakamana yuu doko mee kokwa soo peya kande.
Dopa piyamopape epapu wambu malu palya epelyaminyi dokome
yuu doko kuki ingyapala kete pyara.
Nakama kokwa soo momo nao pinyi nembeyami wambu dupwa
nakama yaki nyuo yuu nanesa wakale parami.
20 Yuu mendepa embena wambu karapusi karo mandeyami dupwame nakama kando lao,
Yuu dake ama kuki lamoŋa.
Namwa palyuo karo piramano panda lama kamame konda pyuo nyimwali aiya larami.
21 Dokopa Jerusaleme wambu palirami dupwame range lao,
Apimi wane dupwa namwana lao manjo jiyape?
Wane angi namwana dupwa nembo kaeyo epo dee manjirama ingya naya.
Namwa karapusi ingyuo puu maiyuo nyuo minyuo wakale peyamiŋi.
Apimi wane dapwa wai kiso nyiyase?
Namwa iki yeelyo yaki nyuo kaeyamiŋi
wane dapwa anja karo epeyamisi? larami, leya.

22 Kamongo Mupwa Andake Wakasa dokome banya wambu dupwa lamaiyuo lao,

Wambu yuu liti wakale wakale dupwa keta kongwalu mende pyuo lasaka pirunupa
nakamame embena wane dupwa minyakao anda eparami.
23 Kiŋi dupwa nakamana rakange dopale ingyarami.
Dee enda kuini dupwa nakamana endangi ingyuo parami.
Dopa pipala nakamame kingi wapambupi lakao pangu soo nakama lakando ketae pyambuo
kuki ingyuo inyimungu karo rape rape lao kararami.
Dokopa nakamame namba Kamongo lao soo nyerami.
Dee mendeme nambame nyisareŋe lao isaro karara ramo doko mona maka nara, leya.

24 Nakamame ami yanda singinya yanda pimwai porainya pinji nyepala eparamo doko nyuo nembaramisi?
Dee gapomane koo porai mende keta nakamame wambu karapusi lekeleke rao palaminyi dupwa mee kapa kiiramo moko nyeramisi?

25 Kamongo dokome isingi lao,

Doo leto doko nambame pirowaleŋe.
Yanda singinya karapusi wambu palyarami dupwa nyuo lanyuo pao
dee yanda singimi yanda pimwainya pinji bange nyuo soo parami.
Dupwa nyuo nembo pipala mendeme nakama pyalana piramo doko nambame yanda pimwaiyuo pyalana pyuo
nakamana wane wanakepe dupwa kiiramo nyakaro.
26 Nambame nakama pyalana piraminyi wambu dupwa yango sukusa range pyao kumasinya lao piru.
Wambu ipwa biya napala kopyali kyakaenge doko suu pyao nakamame wambu yango mende pyao kumako imbu singi andake manjo kararami.
Dokopa wambu rara peparae dupwame namba Kamongo
nakama kyawa lete nyuo kiiramo nyii doko lamo lao soo nyerami.
Nakamame namba Isaraele wambunya porai renge palenge Anatu doko lamo lao soo nyuo pirami.
Copyright information for `KYC