Isaiah 53

Dokopa wambu dupwame isingi lao,

Namwame kandapala letamano dokona apimi kinyilyamo lao soo nyera ingilyase?
Dee dokona yulu dakena Kamongona porainya renge doko apimi kandara ingilyase?
Kamongome suu piyamili pyuo isa wai mende yuu ketange pyasi mee dokona lee rao andengenyili pyuo
banya kendemande akali doko poro lena leya.
Wambumi epe kandaraminyi
panda lakanda minya minya pingipi
baa keta pali nana lao kareyamopa
mendeme baa lengeme auwa kandarami ingya naya.
Namwame baa epe kanda nale nale lapala baa mata maiyuo kareyama.
Baame randa dupwa epeyamopa yasu nao rando kareya.
Dopa pyuo kareyamopa mendeme baa kandalana suu pyaa nayami.
namwame baa mende daaŋa lao suu piyama.

Dopa pyuo ando peyamopape randa doo neyamo dupwa namwa neyamali.
Baame randa nao kareyamo doko kandapala
Anatumi baa keta randa mailyamo lao suu piyama.
Dopa pyuo peyamopape namwana koo pingi dupwana lao
baa randa maiyuo pyaroko piyami.
Baa yanenge poro lao randa nyiyamo dokome
namwa pyuo lete nyiya.
Doko namwa peparae mena sipisipi pana nange dopale ingyuo kareyama.
Karapala namwa rangena suu piyamano kata dupwana iki pao kareyama.
Dopa piyamopape namwa peparaeme koo piyamano randa nyerama ingiya doko
Kamongo dokome baa keta kulimbuo palena lao maiya.
Baa koo keta palyuo pyao lao randa maiyaminyipape
kambu lumbuo pii mendepe laa napala koo nono ingyuo elya kalo randa nyiya.
Mena sipisipinya ikyane pyalana lanyuo penge dokopa kae laa nao penge
panda sipisipi mendena emanji pyaki pilyaminyipa sipisipi doko kae laa nao karenge doko suu pyao
baa pii mende laa nao kareya.
Baa minyaro nyepala pii piso soo kote leyami. Kote lapala baa lanyuo pyao kumakala peyami.
Dokopa mendeme baa doo randa nyera dokona mendeme pii palyuo lakaminya suu pyaa nayami.
Baa namwana wambunya koo dupwana lao
reke lao pyao kumakayami.
Baa lowa mende yalope
pii kyambo mende laope pii nayamopape
baa koo pingi wambu pipya role pyao malu piyami.
Baa akali kamongona panda dokona malu piyamiko.

10 Kamongome lao,

Nambame baa randa nyuo yasu napyali lao suu piyu dokona randa nyiya.
Dopa pyuo baa kumuyamo dokopa mena pyao kiso maingi dopale ingyuo wambunya koo dupwa kame soo kaeyasi siya.
Dokona lao baame banya para pyasi wambu dupwa range kando nyera.
Baa yuu gii londe andarele karara.
Dokopa baa kumaramo renge doko nambana yulu dupwa jingi lyuo kapa palyuo para.
11 Baa randa yasupi naparamo dokopa enakana baa rae maingi renge dee kamba nyera.
Baa doo randa naramo dupwa mee male male lao randa neyolyamo lao suu pyaa nara.
Nambana kendemande dokome namba mona retenge doko kando namba rae maingi.
Baame peparaena koo dupwana randa nyeramopa
banya lao nambame nakamana koo dupwa kame sakamiru.
12 Dopa pyuo paramopa nambame baa ketae pyambuo
baa akali kamame wakasa porai dupwa pipya karena laro.
Wambu koo pingi dupwana panda nyuo randa nao
baa range kumuo mainya mona kumapala
baame wambu koo pingi malunya panda nyepala
ateŋa lao Anatumi nakamana koo dupwa kame sakaminya lamaiyuo kumuya.
Copyright information for `KYC