Isaiah 55

Anatunya Sakame Kumungi Renge Doko Wambu Keta Palamo

Kamongome lamaiyuo,

Wambu peparae nano karenge dupwa
dae ipwa silyamo dokona ipupwa.
Kana dalyamo dupwa
palawa ropo pyao nala ipupwa.
Ipwa waene susupi dupwa
mee pakiki nyuo nala ipupwape.
Nenge sikya pii nara dokona akipamo kana nembo nelyamisi?
Akipamo embena pee nyingi kana dokome nembo ropo pyao napapinyipape mee lopoko karese?
Nambame laro doko sepala dokome moko minyuo piri dokome
nenge doloma nyuo isa palyuo rae maiyuo nengende nare.

Nambana wambu dupwa pii leto dakepa sepala namba keta ipupwape.
Dopa pyuo namba keta epo lete karenge renge nyerami.
Dokopa nambame kana minyuo lenge pii sulu sera mende
nambame Dapiti kando elyape keta pisaro lao lalu lao leyono dokona elyape keta pisingi renge doko nakama jeroko.
Nambame baa wambu rara peparaena akali kyawa ingyuo wasiyu.
Wasapala baa keta nambana porai renge doko nakama lasaka piyu.
Dakepa nakamame yuu wakale range wambu dupwa epena lao kyakale larami ingilyamo.
Wamba wambu dupwame nakama see nayami kande.
Dopa piyaminyipape epapu nakama karaminyi dokona makando ree lao eparami ingilyamo.
Namba nakamana Kamongo Anatu Isaraele wambunya Anatu poo pyasi dokome
renge dupwa pyaka sinya laro.
Nambame nakama kingi ketae pyambuo rape rape lena lao piru.

Kamongo baa keta kapu kyuo papala ateŋa lalapape.
Dakepa baa nakama repeta epo karamo.
Wambu koo pilyaminyi dupwame nakamana yulu koo dupwa yaki nyuo kaena.
Pipala nakamana suu pingi koo dupwa alowa pinya.
Nakama namwana Kamongo Anatu
sakame kumuo waiyuo lao nyuo kame sakamingi doko keta kapu kyuo pena.
Kamongome lao, Namba suu pyao yulu pyuo nenge rambo lao pingi dupwa
nakamana dopale daa, letamo.
Yake doko yuu dokona kamame yuu ketae ingyaro karamo doko suu pyao
nambana suu pingipi yulu pingipi doko kamame ketaele wakasa ingilyamo.

10 Apu pipyaepe dolapo mee dasa piso imbu napala
yake dokona piso lyuo epo ee yuupi ipwa pyao nenge andanyi pyambungi.
Dolapome nenge jingi maiyuo dee kakana pyuo pilyunupa nenge.
Nambana pii doko dopale ingyuo sipyamo pilyamo.
11 Dopa pyuo nambame mende pirunya lao retelyono doko
mee isa paa nange.
Angi letono dokonako kapa wai wara pyuo pipala pyuo otenge.

12 Nakama yuu Bapilone mona seramopa
raeme kumuo yaki nyerami.
Yuu kyau kuki andakepe nakama paraminyi kata dokona silyamo dupwame puli pyao kenane pyarami
dee isa dupwame rae maiyuo pii ketae palyuo larami.
13 Saiperese isa dupwa nepereke mau panda koo dupwana andarami.
Dee matele isa dupwa ikyaikya andenge dupwana poro lao andarami.
Dopa piramo dokopa namba Kamongo dokome yulu andake piiŋi lao
suu pyarami lao lasaka pili laro karalu karara.
56:1—57:21Pii renge wakale wakale palamo dupwa. Wambu dupwame Anatu yaki nyii nao baa laramuli pyuo mee pingi dokona lao palamo. Dee wambu dupwame Anatu yaki nyuo kata wakale penge dokona lao pii palamo. Dee Anatumi banya wambu dupwa nyiso pyuo nyero lao lalu lao leya.

Copyright information for `KYC