Jeremiah 14

Yuu Yando Andake Nao Nenge See Nao Piya

Yuu panyi pyuo nenge see nao piyamo dokona lao Kamongona pii doko namba Jeremaya keta epo leya.

Juta wambu dupwa ee lao kumaralerale nyuo kumanda petaminyi.
Nakamana yuu taone dupwa isa pelyamo.
Nakamana wambu dupwa mona randame kumuo isa yuu dupwana nangalo kyaso silyaminyi.
Dee Jerusaleme wambu dupwa nyisinya lao ee letaminyi.
Pisa napyamo kamuo nyii nalyaminyi. (14:3)

Wambu bange malu retenge kamongo dupwame nakamana kendemande dupwa ipwa kamwala pena lami.
Ipwa petenge isa yuunya singi mauli pete yale dokona kamwala pumi doko
pisa napyamo kamuo nyii nalyaminyi.
Dopa pipala nakama mee pee minyuo anda epelyaminyi.
Epapala nakama ipwa pisa nalyamo lao pao mona kendapala apa pirama lao ee lao
lenge kambu yambe pyao nee pyuo epelyaminyi.
Dopa pyuo apu epa napyamo dokome
yuu dupwa yando nao kyapwapala oo lapyasa
pama akali dupwa mona yanyi pilyamo karapala
nakama lenge kambu dupwa yambe pyao karaminyi.
Dokopa ee yuu rambi andenge dupwa ando kara napyamosa
mena diya lenge dokome banya yakane doko
anju kipa nao sinya lapala kaelyamo.
Mena donge rae lenge dupwa yuu kyau ketae dupwana karapala
yana suwa kararope dopale ingyuo imambu ŋeeŋaepa lao kumuo
nenge isakope naa nayami dokome
lopo malawai lapyamopa karaminyi.
Nambana wambu dupwame namba kando ee langyuo dokopa
namwana koo wakasa piyama dupwame namwa range randa joo koo keta palyilyamo.
Namwa emba karenge lao suu pyao kara napala kata malunya mata joo pao kaeyama.
Namwa emba kando koo dupwa piyama.
Dopa piyamanopape Kamongo embame nyisaro lao lao kaeyene dokona palyuo nyisape.
Embame Isaraele wambu dupwame mende pirinyi lao sepala mona pyamalyuo lao karenge.
Embameko namwana randa dupwana kyawa minyingi.
Doko akipamo emba namwana yuu dakena upunili ingyalya ingyana pyuo
yuu mendaki mee panya epo luu palipala penge dopale ingyuo karese?
Emba akipamo akali mona nembako kamenge walu lao nyingi dopale ingyuo
dee akipamo emba yanda singi lapo porainya renge pali napala nyisalana pako karenge dopale ingilisi?
Kamongo emba namwa role karene doko siyamano.
Namwa embena wambu
embame namwa kyawa yaki nyii napipi, lao letaminyi,
leya.

10 Kamongo dokome wambu dapwana lao leya. Nakama namba yaki nyuo ralo makando pena mona nyilyaminyi. Dopa pipala nakama range kame pyuo minya narami. Dokona lao nambame nakama pipya rae mai nalyo. Dokona nakamana yulu kopetame pilyaminyi dupwa nambame suu pyaro. Suu pyapala nakamana koo dupwana randa mairu, leya.

11 Kamongo dokome namba langyuo lao, Wambu dapwa nyisapili lao namba piso see napipi, leya. 12 Nakama nenge naa napala nambame nyisa lao ee laraminyipape nambame nakamana ee see naro. Nakamame namba mena kiso joope dee nenge witi jingi kiso joope piraminyipape nambame nakama kando rae mai naro. Dokona ingyuo nambame nakama yanda pirami mendena lopo maiyuo yanyi maiyuo pyao kumakaro, leya.

13 Dokopa nambame lao, Kamongo Mupwa Andake Wakasa, poropeta akali dupwame wambu dupwa lamaiyuo, Liti dakena yanda mende pii nao lopo see nara. Renge doko embame lalu lao lao mona kyuu lao singi renge doko iki yuu dakena seramo pisirami lapiŋi lao lao karaminyi, leyo.

14 Dopa leyonopape Kamongo dokome isingi lao, Poropeta akali dupwame nambana kingi dokona lao kyambo letaminyi. Nambame nakama lala pena lao peeya nao nambame nakama dopa pyuo lena lao pii mendaki mendepe mana lamai napu. Nakama pii repa repa pyuo lenge mee wakale lapo unyi anyi pyuo range pipala letaminyi dupwape mende nambame pinya lao maiyunde daa. Nakama dopa pira dapa piralyamo lao mee tangeme suu pyao letaminyi dupwa mee ingyuo pelyamo. 15 Renge dokona lao namba Kamongo dokome poropeta akali dupwa namba pena laa napunupa mee rangeme sisu lao nambana kingi lao mee letaminyi dupwa mende piru lao letoŋo. Poropeta pii lao yuu dakena lopo see nao wambu kaku wuape nenge dokona nyuo mapisa nareŋe langilyaminyi dupwa yuu dakena nakama lopo maiyuo wua kakupi nenge dokona nyinyi pisarono kumarami ingilyamo. 16 Wambu lapo opetae pii letaminyi doko soo karaminyi dupwa dopaleko ingyuo pyao kumakarami. Dokopa nakamana yongo dupwa yuu Jerusaleme kata barete andake dupwana nembaraminyipa wambu mendeme au pyuo nyuo malu pii narami ingyara. Doko etenge ikinyingi wanengepe wambu peparaepe dopako pirami. Nakamana yulu koo dupwana nambame yano nyuo dopa piru, leya.

17 Kamongo dokome nambana mona rando karapunu dokona wambu dupwa lamairi doko pii dapwa lamaipi, langiya.

Nambana wambu dupwa wua kakupi piso kopeta kapeta pyami dokona
kukwa korakamape ee dupwa palyamo
kata pali naramopa lao kararo ingilyamo.
18 Namba yuu neta dorena kandaro dokopa
akali ayemba pukusi dupwa male lao seramo kandarolyamo.
Dee taone dorena parono dokopa
wambu dupwa lopome kumuo karaminyi dupwa kandarolyamo.
Poropeta purisi akalipi dupwame nakamana yulu doko mee kyawame suu lao pyuo pelyaminyiko dokoŋo
angi doko aki pilyamano lao see nalyaminyi.

Wambu Dupwame Kamongo Piso Sokondali Pyuo Leyami

19 Kamongo, emba Juta wambu pipya kinyi kinyi mata maiyuo letese?
Yuu kyau Sayone wambu dupwa embame epe kanda nalese?
Akipamo embame namwa pyuo nyii namili lao
randa andake jilisi?
Namwa mona seramo karalana koto pumwano dokopa keyange mende kando nyii nalyamano.
Namwa pyuo nyereŋe lao suu pyamwanopape paka renge doko epelyamo.
20 Kamongo, namwame emba kando koo pimwa.
Doko namwa rangena koo dupwa polo lao
dee namwana rora ambasu dupwana koo dupwa polo letamano.
21 Embena lalu lao lenge pii dupwa kame see napala embena kingi dokona reke lao namwa mata joo kaeya napipi.
Kiŋinya palyuo karenge yuu Jerusaleme dokona elya renge doko minyuo epa napipi.
Embena kana minyuo lalu lao lenge pii porai kandale doko yala napipi.
22 Yuu liti wakale wakale wambunya mee bange anatuŋu lao isa kanape wasisi dupwame apu peya narami.
Yake dokome susu lao apu pura pura pyao epena lao nyuo peya nara.
Yulu dupwa peparae embame iki inginyi peengepya.
Dokona lao namwana Kamongo Anatu emba keta dupwa peparae epara lao soo karamano.
Copyright information for `KYC