Jeremiah 26

Wambu Dupwame Jeremaya Pyalana Suu Piyami

Josayana ikinyingi Jiyoakwimi lenge doko Juta wambunya kiŋi ingyuo kanda soo kareyamopa Kamongome namba kando langyuo, Tembole anda kamapi dokona karapala wambu yuu Juta taone dupwana piso dokona lakandala eparami dupwa nambame emba pii langilyu dupwa peparae lamaipi. Pii dupwanape kuki mende kame soo yaki nyuo kaeya nao lamaipi. Wambu dupwame pii doko sepala nakamana yulu koo dupwa kame soo yaki nyerami rapisi. Nakamana yulu koo dupwa peparaena nambame nakama keta randa mairu lao rapa rapa piyu doko nambana suu pingi alowa pyuo kaeyaro. Kamongome wambu dupwa lamai lao namba langiya. Namba Kamongo dokome leto. Nakamame namba warombo soo nambame pii mana langilyu dupwa kamba laa nao moko minyuo pyuo karalapape. Dopako pyuo nambana kendemande akali poropeta dupwa nakama keta kaeya nao mapanyi peyapa pyuo kareyo dupwa apa letaminyi lao sokondali pyuo karalapape. Wamba nakamana pii warombo see nayami. Nakama mee kamba lao karalu kararami ramo doko nambame yuu Sailo tembole anda doko koo inginyi nembeyonoli pyuo tembole anda dake koo inginyi nembaroko. Dopa pirunupa wambu yuu muu dupwana palaminyi dupwame pii koo mende letamano lao dokopa yuu taone dakena kingi lapapu larami, leya.

Purisi dupwape poropeta dupwape dee wambu dupwa peparaemepe yulu dupwana lao nambame tembole anda dokona leyono doko siyami. Kamongo dokome namba lape lao pii peparae lamaiyunuli pyuo lao otapeyono dokopa aopa role pyapeta pyakaeyapala pii poraiyuo kaeyo lao, Emba doo letene dokona pyao kumakapengele, leyami. Dopa lapala, Akipamo embame Kamongona kingi dokona lao tembole anda dake yuu Sailo tembole koo ingiya dopale ingyaramopa yuu taone dake pyao kokwa soo piramopa wambu mendalipi dakena pali narami, letese? leyami. Lapala wambu dupwame namba nyuo sukusa palyuo kako piyami.

10 Dopa piyami doko Juta lita akali dupwame sepala nakamame kiŋinya anda doko yaki nyuo waiya lao tembole anda dokona papala Kame Kambu Enenge palyiyaminyi dokona isaro kareyami. 11 Gii dokopa purisi akalipi poropeta akalipi dupwame lita akalipi dee wambu dupwape kando lamaiyuo lao, Akali dakeme yasu kee lao namwana yuu taone doko kando koo inginyi nembo pulyuo letamo dokona baa randa maiyuo piso soo kote lao pyao kumarami ingilyamo. Dokona pii lapyamo dupwa nakama rangena kale dokome rolae simi kandapi, leyami.

12 Dokopa nambame lao, Yuu taone andake dakenape tembole anda dakenape pulyuo pimwaiyuo nambame pii lapunu simi kandapi dupwa peparae Kamongo dokome lala puu lapyamo epo lapu. 13 Nakama palyuo karo pilyaminyi kata dupwape dee pilyaminyi dupwape alowa pipwape. Pipala nakamana Kamongo Anatu dokona pii laramuli pyuo kamba laa nao pipwape. Dopa pirami ramo dokopa baame randa mende peyo pyao kokwa sero leyamo doko alowa pipala kaeyara. 14 Namba doko nakamana kingi raka dokona karo. Dokona nakamame namba kando aki mende nakama pipya kapa ingyuo para pinya suu pilyaminyi doko mee pipwape. 15 Namba pyaramiko dokona renge mende palape lao selapape. Nakamame namba pyao larami ramo doko nakamape wambu yuu taone dakena palaminyi dupwape wambu koko pii nange dokome Anatumi repe repe lala puu lapyamo ipu doko pyaramisa pira, leya.

16 Leyamo dokopa lita akalipi wambu dupwapeme poropeta akalipi purisi dupwape kando lamaiyuo lao, Akali dakeme namwana Kamongo Anatunya kingi lao pii langipyaŋa. Baa pyao kumaka narama ingilyamo, leyami.

17 Dokopa enakana akali andapae lapome sipurapala wambu malu palyuo peteyami dupwa lamaiyuo lao, 18 Akali Esakaya baa Juta wambunya kiŋi ingyuo kareyamo dokopa poropeta akali Maeka yuu Moresete range dokome Kamongo Porai Wakasa dokome leyamo pii dupwa wambu peparae lamaiya.

Yuu Sayone doko kwai mapu lapo pyasi sili lao
yuu Jerusaleme doko ama pyao kokwa sinyi nembo
dee tembole anda karenge dokona imwa palyuo pira.
19 Lapala kiŋi Esakayamoo Juta wambu dupwapeme akali Maeka baa pyao kumaka nayami. Pyao kumakapenge doko suu pyao akali Esekayame Kamongo doko pakapala baame Kamongo rae mairali yulu lapo piya. Dopa piyasa Kamongo dokome nakama keta randa mairu leyamo doko nyuo alowa pipala kaeya. Dokona epapu namwa rangeme randa ama koo andake nyelana minji nanji pilyamano.

20 (Dokona akali mende wakale kingi Yuraya lenge akali Semayana ikinyingi yuu Kiriate Jirimi range doko akali Jeremayame leyamo dopako suu pyao baame Kamongona kingi dokona lao yuu taone dakepe dee wambu rara dupwape koo ingyuo paraŋa lao pulyuo pimwaiyuo leya. 21 Leyamo pii doko kiŋi Jiyoakwimimoo banya yanda singi dupwape dee akali mupwa dupwapeme siyami. Sepala dokopa kiŋi dokome baa nyepala pyao kumakalana suu piya. Dopa pyuo suu piyamopape doo leyaminyi pii doko akali Yurayame sepala baa pakame kumuo baa range kyawa lete nyuo yuu Isipi dokona peya. 22 Dopa piyamopape kiŋi Jiyoakwimi baame akali Akipona ikinyingi Elanatane dee akali lapo pipya yuu Isipi dokona akali Yuraya nyela pena lao nembeya. 23 Akali dusipame Yuraya nyuo lanyuo epo kiŋi Jiyoakwimi maiyamisa baame nyepala pyao kumakapala banya yongo doko wambu peparaena malu pingi yuu dokona pyao nembeyami.)

24 Dopa piyaminyipape namba Jeremayame akali Aikami Sapanena ikinyingi dokona matarena karo yulu piyu dokome wambu dupwame pyao kumakana lao mai nayami.
27:1—30:24Juta wambupi dee yuu wakale range wambupi iso kareyamo doko Bapilone kiŋi kingi Nepukatenesa lenge dokona pawa dokome lasaka pili lao Kamongome Jeremaya baa isa mamando banya mange dokona soo pyuo karena leya. Dopa pyuo kareyamo dokopa kyambo lenge poropeta akali mendeme Jeremayana pii nembalana lao kareya. Dopa piyamosa baa kumuya. Wambu karapusi ingyuo Bapilone dokona kareyaminyi dupwa Jeremaya baa pepa pase pyao maiya. Nakama yuu Bapilone dokona maka nao mee elya kalo piso yuu rakyame kapa anda eparami, leya.


Copyright information for `KYC