Jeremiah 38

Jeremaya Baa Ipwa Pete Sokwasi Yuwale Mendena Kareya

Akali Matanena ikinyingi Sepatayamoo Pasana ikinyingi Getalayamoo Selemayana ikinyingi Jukalemoo dee Malekayana ikinyingi Pasamoo dusipame nambame wambu dupwa lamaiyuo Kamongo dokome leyamo pii dupwa lao papilini leyami doko nakama siyami. Lamaiyunu doko, Kamongo dokome lao wambu mendali yuu taone dakena palyuo karara ramo doko yanda andake mende piraminyi dokona kumuope panda nenge see naramo lopo andake pipala kumuope panda yanyi nyepala kumuope pirami. Dopa piraminyipape mendeme neta pao Bapilone ami dupwame waiku nyinya lapala kaeyara ramo doko baa kuma nara. Baa range yongo lete nyuo mee palyuo karara. Nambame nakama dopako pyuo lamaiyuo, Kamongome lao dokopa yuu taone dake Bapilone ami nyerami lapya, leyo.

Dokopa akali mupwa dupwame kiŋi doko peteyamo dokona papala lamaiyuo lao, Akali dake pyao kumakamana. Baame pii dopale lapya dokome yuu taone dokona yanda singi karenge dupwa paka renge manjinyi pyambuo letamo. Dee wambu pyarepala pao yuu taone dokona pisiminyi dupwa dopako pinyi pyambuo letamo. Akali dakeme wambu dupwa nyisalana suu pyao laa nalyamo. Baame wambu dapwa isa nenge kara nange dokome suu lao randa maiyuo letamo, leyami.

Dopa leyaminyi dokona kiŋi Setekayame isingi lao, Doko kapa. Nambame nakama kaeyalapa laa naroŋo. Nakamame baa keta pinya suu pilyaminyi doko pipwape, leya. Dokona lao kiŋinya yanda singinya panda dokona kiŋinya ikinyingi Malekayana ipwa petende singi dokona namba minyuo pao pyambuyami. Nakamame puu karapala malyiyami. Yuwale dokona ipwa pete see napala wara yeelyo siyandena namba nyuo pee kuku piya.

Dopa piyaminyipape Itiopia akali Epetemeleke lenge kiŋi dokona anda yulu pyuo kareyamo dokome namba yuwale dokona nyuo malyiyaminyi leyami doko siya. Yuu gii dokopa kiŋi doko Benjamenena Kame Kambu dokona kote soo peteya. Dokopa akali Epetemeleke baame kiŋi doko peteyamo dokona papala lamaiyuo lao, Emba kiŋi andake doko, akali dapwame mende piminyi doko ama kopetame pimi. Doko yuu taone dakena nenge mendepe see napya dokome nakamame akali Jeremaya doko lopome kumapala kumaraŋa lao soo yuwale dokona pyambwami, leya. 10 Dokopa kiŋi dokome akali Epetemeleke lamaiyuo, Akali dae karaminyi dokona rema nyepala Jeremaya baa kumapa nanaleŋe yuwale dokona palamo doko ipyuo nyela pena leyapya. 11 Dokona lao Epetemelekeme akali dupwa nyuo lanyuo kiŋi dokona yulu pingi bange retenge anda dokona papala komau kangusi lapo puu karo yuwale dokona namba nyelana malyiya. 12 Malyapala Epetemelekeme namba langyuo lao, Puu dokome emba naa nana lao komau kangusi dupwame embena arokwa kata dokona palyepala palyape, leya. Leyamuli pyuo namba dopa piyu. 13 Dokopa nakamame namba yuu paleta ipyuo nyiyaminyisa namba yuwale dokona nyisa epeyo. Epapala kiŋinya yanda singi panda dokona kareyo.
Namba yuwale dokona nyisa epeyo. (38:13)


Setekayame Jeremaya Kando Apa Pirusi Lao Piso Siya

14 Yuu gii mendepa tembole anda dokona kambu repo ingyuo singi konandowame dokona namba kiŋi Setekaya peteyamo dokona lanyuo peyami. Peyaminyipa baame namba langyuo lao, Nambame emba piso singi pii mende pisaroŋo embame namba kando lapo kalyama napala angi peparae kinyi dokona langipi, leya.

15 Dokopa nambame isingi lao, Nambame kinyi dokona laro ramo doko embame namba pyao kumakare. Dee nambame dopa piri dapa piri lao nyiso laro ramo doko emba sili see nale lao karare, leya.

16 Dokona lao kiŋi Setekayame namba kando yalu pyuo pii mende lalu lao lao dopa leya, Anatu Lete Karenge dokome namwa letena renge jiyamo dokona kingi lao kana minyuo lao, Namba emba pyao kumaka naro dee akali lapome emba pyao kumalena lami dupwa keta mai naroko, leya.

17 Dokopa enakana nambame Setekaya lamaiyuo, Kamongo Porai Wakasa Isaraele wambunya Anatu dokome lao, Emba rangeme yuu Bapilone ami akali dupwa waiku nyinya lao kumuo maiyuo kaeyare ramo doko emba range kyawa lete nyuo dee yuu taone doko raa nara. Dee embape embena ree palupi laparae kyawa lete nyera, leya. 18 Dopa piraminyipape emba waiku nyinya lao kumuo maiyuo kaeya nare ramo doko yuu taone andake dake Bapilone akalinya kingi rakana palyakamiramopa pyao kisarami. Dopa piramopa emba kapa wanjo lete paa nareko, leya.

19 Leyamo dokopa kiŋi Setekayame isingi lao, Namwana Juu akali lapo Bapilone range ingyuo karaminyi dupwa namba pakalyo. Dokona nakamana kingi rakana palyara ramo dokopa nakamame randa jerami, leya. 20 Nambame lao, Emba nakamana kingi rakana palya nara. Nambame emba piso sokondali pyuo lao, Kamongo dokona wai pii doko warombo sepe. Dopa pirinyi dokopa bange peparae dupwa emba keta kapa ingyuo paramopa emba range kyawa lete pare. 21 Emba Bapilone ami akali dupwa waiku nyinya lao kumuo maiyuo kaeya nare ramo dokopa Kamongo dokome mende piramo doko namba pii repa repa pyuo lasaka pipya leyo. 22 Nambame dokona kandapunu Juta enda dokopa kiŋinya anda dokona pisimi dupwa Bapilone kiŋi dokona akali mupwa dupwa karami dokona lanyuo pumi. Dokona nakama pao karo dokopa apa lami lao sepe. Nakamame dopa lao pumi.

Kiŋi dupwana puu minyingi angi dupwame baa minyoko pyuo kata koona lanyuo pumi
Dokopa nakamame baa isa palyimi.
Banya kimbu dolapo warana yalyipyamopa
banya puu minyingi dupwame baa yaki nyimi
lao puminyi sipu leya.

23 Dokopa nambame konda pyuo lao, Embena enda peparaepe dee wane wanakepe dupwa yuu Bapilone lanyuo parami. Dee emba range nakama keta kyawa lete nyii nareko. Emba yuu Bapilone kiŋi dokome karapusi ingyuo nyuo minyuo paramopa yuu taone dake rao muku sera, leyo.

24 Leyono dokopa Setekayame isingi lao, Pii doo iso letambano doko embame mendali sinya lao lamai nare ramo doko emba randa nyii nare, leya. 25 Akali mupwa dupwame namba embapa pii lao pisimbi lao serami ramo doko apa lambi lao emba piso sela eparami lyakande. Dokona embame pii peparae lamairi ramo doko nakamame emba kando pyao kumaka narama lao lalu lao lao langirami lyakande, leya. 26 Dopa laraminyipape embame nakama lamaiyuo, Namba karapusi anda dokona kumalase lao kamba lanyuo paa nana lao nambame piso sokondali pyuo pisapu lape, leya. 27 Leyamo dokopa akali mupwa dupwame namba peteyo dokona epapala piso siyami dokopa kiŋi dokome lape lao langiyamuli pyuo leyo. Dokopa mendemepe pii iso yalu pyuo leyambano doko see nayami dokome dee nakamame mende dusa pirami ingya naya. 28 Dokopa namba kiŋi dokona yanda singinya panda dokona karapusi kareyonopa Jerusaleme pyao epo anamasi minyiyami.
39:1—51:64Kiŋi Nepukatenesa baame yuu Jerusaleme pyao piyamosa taone andake doko isa peya. Juta kiŋi kingi Setekaya lenge doko yuu Bapilone dokona karapusi ingyuo lanyuo peyami. Dopa piyaminyipape Jeremaya baa moko nyiyami. Dokopa akali mende Getalaya lenge doko gapomane mupwa ingyuo yuu doko iso karena leyami. Leyaminyipape enakana wambu dupwame baa pyao kumakayami. Kumakayaminyi dokopa wambu lapo yuu Isipi ralo peyaminyipa Jeremaya baa nakama pipya role monale, leyami. Rombo 46-51 dupwana Kamongome yuu Isipipi Bapilonepe dee yuu wakale wakale dupwape kote laro leyamo pii pyasi palamo.


Copyright information for `KYC