Jeremiah 9

Kamongome Juta Wambu Dupwa Randa Mailyamo Pii Doko Jeremaya Siya

10 Yuu kyaupi dee rambi mena nenge nengepe yando nao kyapuo oteyamo dokona
mona randapala ee lao kumaralerale nyuo pisiru.
Mendali dokona kata papirami ingya nalyamo.
Mena bulamakaope mendepe pii laramo see narami ingilyamo.
Yakape mena rae lengepe dupwa ralo puu pao peyami,
namba Jeremayame leyo.

11 Kamongo dokome lao, Nambame yuu Jerusaleme doko kokwa sinya laro.
Dopa pipala yuu doko suwa rae lenge makando karena lao piru.
Juu wambunya yuu taone dupwa nyuo mee inginyi nembo yuu muiyane seramopa
panda dokona mendali pali narami.
12 Nambame piso soo, Kamongo, akipamo yuu dokona wambu dupwa moko palyuo paa nana lao bulu bulu pyao ukiaki minyasi silyape? Akali api mende mona palikonda pingindeme renge dake soo nyerase? Api keta embame pii doko polo lamaipinyipa pao baame wakale dupwa lamairase? leyo.

13 Kamongome isingi dopa leya, Nambana mawa pii nakama keta pyao retapu dupwa yaki nyuo nambana kambunya pii ipyamo dupwa letamuli pyuo soo minya napala kamba letaminyi. Dee nambame mende pinya lapunu doko pii nalyaminyi. 14 Dopa pirami doko suu pyao mona kana pokapala nakamana rakange dupwame pinya lao mana lamaiyaminyili pyuo nakama rangena suu pingi ipyamo doko yeelyo moko minyuo mee bange anatuŋu lao kingi Bealo lenge dupwa kingi wapambupi lakao lakandelyaminyi. 15 Dopa pilyaminyi dokona namba Isaraele wambunya Anatu Kamongo Porai Wakasa dokome mende piru doko selapape, leya. Nambana wambu dupwa ee nenge kau pingi lapo nena lao maiyuo mauli ipwa lapo nao pinya lao mairu. 16 Nambame nakama yuu wakale lapo nakamape nakamana rora ambasupimi paa nange dupwana pyao ralyuo bolombalo lao pena lapala nambame ami yanda singi keta nyinyi piso pyao kokwa sinyi nembaro.

Jerusaleme Wambu Dupwa Nyisinya Lao Ee Leyami

17 Kamongo Porai Wakasa dokome lao,
Mende apa pipya kandapisi lao poraiyuo suu pyalapape.
Enda kumanda piso ee lao petenge dupwa epena lalapape.
Malu pinya pilyaminyipa enda lapome ee lao kenane pingi dupwa epena lalapape,
leya.

18 Dokopa wambu dupwame lao,
Yuu gii mende mee nemba nao waiya lao namwana lao malu pinya ee lao kenane pingi mende pyao petena lalapape.
Namwana lenge kapa doko ee ipwangeme simbuo lembakisa doko rombe laramo pisimanale.

19 Ee poponge yuu Sayone dokona piso ipyamo doko
apa pyuo koo keta palipala letaminyi lao selapa.
Namwa elya nyulu nyuo nyilyamano.
Renge namwana anda yuupi dupwa kwaeyasi silyamo dokona
namwa yaki nyuo kaeyalu kaeyo kaeyarama ingilyamo.

20 Enda dupwa Kamongo dokome apa letamo lao sinya leyo.
Banya pii doko kale yukupala selapape, leyo.
Wanenge dupwa kumanda piso ee larami lao mana lamainya.
Dee nakamana puu minyingi dupwa malu pinya dokopa apa pyuo
kenane pingi doko mana lamairami,
leyo.
21 Kumungi renge doko namwana windowa kata dokona kolando epelyamo.
Epo namwana kiŋinya anda kambu dokona epelyamo.
Epapala yuu taone kata barete andake dupwana wane wanakepe karaminyi dupwa pyao nyilyamo.
Dee makete yuu dupwana akali parange karaminyi dupwa epo pyao nyilyamoko.
22 Dopa pipala yongo kumasi dupwa yuu dupwana muu raleya.
Dopa pipala menana ii rasi yuu dupwana malu palyarapu singi dopale ingyuo silyamo.
Dee witi pyakepenge dokome mungyuo nyingi akali dupwame nyerami lapala
mendemepe nyuo malu palya nange pyakepo bolombalo lao yaki nyingi dopale ingyuo silyamo.
Kamongo dokome pii dokona lakape, langipya, leya.

23 Kamongo dokome letamo.
Mona palenge akali dupwame nakamana mona palyuo soo nyinginya renge doko lakanda nana.
Panda akali porai dupwame nakamana porainya renge doko range lakanda nanako.
Akali bange malu retenge dupwame nakamana bange dupwana lao range lakanda nanako.
24 Mendeme range lakandalana suu pyara ramo doko
baame namba Kamongo doko soo nyuo soo giso pilyamo dokona lakandara.
Renge dokona nambame wambu mona retenge doko reto puu penge.
Dopako pyuo nambame pii pali nana lao yulu rolae dupwa kapa pyuo puu penge.
Renge dolapome namba rae mainyi pyambungi,
Kamongo dokome letamo.
9:25—13:27Wambumi mee bange anatu lakandengepe rengya yuu nanesa karapusi ingyuo parami dokope dee Kamongona kana minyuo lalu lao lengepe dupwana pii palamo. Wambumi Jeremaya pyao kumakalana leyaminyipa Anatumi repe repe pii lamaiya. Anatumi banya wambu pipya rae mai naya. Namwa ketaele ingyuo karamano lao suu pingipi yulu koo pingipi dupwana lao Anatupa Jeremayapame wambu dupwa repe repe pii lamaiya.

Copyright information for `KYC