Job 14

Jopome Wambunya Isa Yuu Dakena Mee Piso Karo Pingi Dokona Lao Kondapala Pii Leya

Jopome leya.

Namwa endagimi manjisi porai ingya nalyamo dupwa
yuu gii malu kararamo ingya nalyamopa randa doko simbwaro sipyamo karamano.
Namwa ee rasinya ambwa sinya ingyapala dee pana narama ingilyamo.
Namwa mee imambulinde karapala pana narama ingilyamo.
Namba dopale ingyuo karo dokona
Anatu embame namba nyuo pyalya pyana pyuo kandarese?
Akali mendaki mendemepe renge karo petenge dupwana
renge poo pyasi mende alowa pyuo pirami ingya nalu nao nalyamo.
Banya yuu gii kanape karara dusipa embame lao retenge dokona kapa karapala yalara ingya nalyamo.
Isa mende poko lakalyaminyi dokona dee imbu pira kata doko singiko. (14:7)

Dokona baa maso rae maiyuo pyuo karenale yaki nyepala kae.

Isa mende poko lakalyaminyi dokona dee imbu pira kata doko singiko.
Doko dee kamba imbu pipala andengeko.
Isa pokonge dokona sinju doko yando nao pingi dupwa rumbyuo pilyamopape
imbu doko rangeme ipwa manjo andenge.
10 Isa doko dopa pyuo pelyamopape akali baa kumuo otengepya.
Baa kumapelyamopa dee anja epo karase?

11 Akali kumungi doko dee epa nangepya.
Mee ipwa sokole lengepya.
12 Yake doko singinyili pyuo silyamo dokopa
akali doko luu palyuo sili lao kumasi sulu soo singipya.

13 Anatu embame namba luu luu kumuo puu lapala yaki nyuo kaepili yaka.
Dopa pipala embena imbu singi doko otaramopa namba dee suu pyaro lao yuu gii mende nyipili yaka.
14 Akali doko kumara ramo doko dee lete eparase?
Nambana randa epelyamo doko pao otaparamopa
yuu gii elyape dokona epo kararo lao iso karapuli yaka.
15 Dokopa embame namba kyakale larenepa namba wasiinyi dokome pii isingi laronopa
emba rae maiyuo karare.
16 Dopa pyuo paramo dokopa embame namba apa pyuo karena lao lee minyuo karapala
koo piru dupwana yaka lao kara nare.
17 Embame nyuo yalu pyuo retapala kame sakao kaeyare.
Koo piru dupwa kwuanyi nemboko karare.

18 Yuu kyau dupwa angi lakao nyingi.
Rondo dupwana kana munjamae porai dupwa mendasa lakao pao singi.
19 Kana dupwa ipwa nyingiko.
Apu reeko dupwame yuu dupwa kalao soo pengeko.
Doko suu pyao embame akali doko ene suu pyao karapya dupwa kata roko pyao kumasilini.
20 Emba keta iki porai renge palipala akali doko dopa pyuo dee epa nara lao pyao nembalu nembo nembelene.
Banya lenge kambu doko alowa pyuo gyaa kyai pyuo kumuo pelyamo.
21 Banya ikinyingi dupwa ketae pao akali ingyuo kararamipi panda randa mairaminyi isa paramipi lao
sepa nao mee kopyali ingyuo kumuo pena letene.
22 Banya yanenge sii lapyamo dokona iki suu pyao
kyawa sisingi baa rangena randa pipyamo dolapona iki suu pyao sepala kumulyamo.
15:1—18:21Dee lapo pyuo pii leyami. Elipasemoo Jopomoo Bilitatemoo dusipana pii pyasi palamo.

Copyright information for `KYC