Job 38

Kamongome Jopo Pii Leyamo Dupwana Yano Piya

Porambaiye minyuo apu epeyamo dokona rakapana Kamongo dokome Jopo pii lamaiya.

Kamongo dokome letamo.

Emba apimi nambana singinya renge dokona piso serese?
Emba pii kapa palya nao kekenge pii lenge akali dake.
Angi akali karenge doko suu pyao roya karapala
nambame piso singi pii pisaro dokopa isingi yano pyape.
Nambame yuu muu dupwa wasiyu dokopa emba dokona kareese?
Dokona kando siinde ramo doko dopa pyuo lao kandee lao polo langipi.
Yuu kameya apiyakale serale lao apimi suu piyase?
Dee apimi yuu liti dupwa makande pyuo kandeyase?
Pii dupwana isingi peparae kapa langirisi?
Yuu doko akimi pingi pyaro karase?
Dee yuu muu pinjingi dusipana kaname paka pyaro karamo doko apimi kareyase?
Yuu gii yangama dokopa bui dupwa kenane pyao nyuo malu palyiyaminyi dokopa
yake panda karenge dupwa rae maiyuo pii porakaeyo ketae leyami.
Ipwa kota doko singi dokona soo neta yuunya epa nana lao
apimi kambu kii minyaro kareyase?
Namba dokome ipwa kota doko iminjingi dupwame nyuo yaki pipala
kopa dokome yambe piyu lyakande.
10 Ipwa kota liti piramo yuu pinjingi dupwa nambame rombo palyuo reteyo.
Retapala kame pyuo kii palyiyu.
11 Dopa pipala nambame ipwa baa lamaiyuo, Dake kapa andakele pee lao sepeleneŋe dee kamame andake ingyuo puŋu paŋu lao soo paa napala
dakena banya kasakole minyuo pondoma pingi renge doko yaki nyuo liti pinya, leyo.
12 Jopo emba ando karene yuu gii dusipana
yuu yangelyamo doko dopa pyuo yango rali pinya lao lamaisi?
13 Embame yuu yango neta koo epelyamo dokome yuu muu doko minyarala nyepala minyaro karo
wambu koo yalu pyuo karaminyi dupwa minyuo walu walu lakana lao lamaisi?
14 Yuu yangelyamo dokopa yuu kungu rapu kukipi lama lamape dupwa
liti pira pira pyuo rombo palyuo pano singi.
15 Yuu yango neta rao yanga paupau lenge dokome
wambu yulu koo pingi dupwa pii nana lao neta ranyi pyambungi.

16 Emba ipwa kota doko guu lenge dokona pengese?
Emba ipwa kotana isa panda dokona kimbu warendo kalyo pengese?
17 Mendemepe emba yuu iminjo kondo kondo lenge kumungi panda dokona
rapu pingi kame kii doko lasaka pingisi?
18 Yuu dake andakepe panda kukipi apiyakale lao silisi?
Sere ramo doko namba langipi.

19 Yuu yanganyi peengepe iminjinyi peengepe dolapo
anja piso epelyamo lao emba silisi?
20 Embame dolapo anjali pao liti pipala kala pena lao larese?
21 Doo leto dupwa piri lao sepala leto.
Renge doko yuu muu dupwa wasiyunu dokopa akali andapae dopale doko karenge karo pii lao silyu.

22 Nambame randake kapape apupi dupwa retenge panda doko
emba pao kandengese?
23 Randa eparamo yuu giipi yanda pela paraminyipape dopalena
rapa rapa pyuo dopalena suu pyao retenge.
24 Emba poraiya minyuo epenge kata dorena piso
neta pyakaeyo epenge mare dokona pengese?

25 Apimi apu epena lao suu nyakamingisi dee
apimi yuu gala lao poraiya andake dokona lao kata wapwakamingisi?
26 Yuu wambu pali nange dupwana apimi apu epo pena lengese?
27 Apimi yuu oo lasi ipwa epa nangepe dupwa
isoko andena lao ipwa pingisi?
28 Apu pipyaepe dolapo nakambana rakange mende karengese?
29 Bange randake kapa yale ase lenge dokome ipwa dupwa kapu kyuo kana inginyi pyambuo
dee ipwa kota dupwa manda ranyi pyambuo pingi dokona endangi doko apisi?

31 Bui kingi Pelaetese lenge lapo karaminyi dupwa embame nyuo kambwa pyao mendakyapala
bui kingi Orayone lenge karenge dupwana panda doko dopako pyuo nyuo alowa pingisi?
32 Ee kana lyakange dupwana bui dupwa embame rapu pyuo pingisi?
Embame bui kingi Mena Beya Kameya Beya Kukipi lenge dolapo dusa pena dusa pena lao lamaingisi?
33 Yake panda dopa pyuo sinya dopa pyuo sinya lao minyaro silyamo doko apa pipala silyamo lao emba singisi?
Dee embame dopale ingyuo yuu dake wasarese?

34 Embame kopa dupwa kando pii poraiyuo lapala
emba rombe lalana apu epena lao lamaingisi?
35 Embame yuu pele pinya lare ramo dokopa
dokome emba karare dokona epapala namba embena kendemande pingi emba letene dopa pyuo piru, larase?
36 Apimi ipwa Naele pona dokona yaka kingi aipisi lenge yaka omani yale petamo doko ipwa andake palipyamo lao lamairase?
Panda yaka kola kali doko apu epelyamo lao apimi lamairase?
37 Api mende soo gisingi mendeme kopa dupwa yaka lapala nyuo
38 kapu kyuo apu dokome sinjimu dupwa soo yuu inginyi pyambuo epenge
dopa pyuo epena lao pirase?

39 Mena laene dupwa nakamana palenge anda dokona isaro palenge dokopape
nakamana kananda dupwana yalu piro singi dokopape
40 embame mena laene dupwana nenge nena lao kotakamyuo
laene yakane lopo karenge dupwa nenge sikya pyuo nena lao maiyuo pingisi?
41 Yaka orapene lenge dupwa lopo ralo karengepe
dee yakane dupwa namba kando lopoe lenge dokopape
wambu apimi nenge pingisi?
Copyright information for `KYC