Judges 15

Enakana yuu gii lapo epo papeyamopa witi jingi kanda soo lyuo nyingi dokopa Samasone baa etenge peteyamo dokona mena meme ikyane lanyuo etenge kandala peya. Papala enda banya palenge panda dokona panya lao suu piya.

Dokopa enda dokona rakange dokome baa kapa paa nara daa, leya.
Lapala baame Samasone lamaiyuo, Nambame emba enda doko kinyi kinyi awa nalene lao suu piyu. Suu pyapala enda baa embena puu minyingi akali baa nyinya lao maiyu. Dokona suu pyao emba epapu banya kakingi kuki baa mapwae au pingi keyange petamo doko nyelase, lamaiya.

Samasoneme lamaiyuo, Dakepa nambame kapa pyuo Pilisitia wambu dupwa kando randa mende mairu, leya. Dopa lapala Samasone baa papala yana suwa kararope andete rema (300) nyuo malu palyiya. Palyapala lama larapu nyepala kanya dokona kendapuli palyarapu kunali dolapome puu piya. Enakana Samasone baame kendapuli dokona isare kainyi palyapala yana suwa kararope dupwa Pilisitia wambunya witi jingi ee andake dokona nembeya. Nembeyamo dokopa papala Pilisitia wambunya witi jingi lyingi dee witi singi pyake pasi dupwape isa olipi lenge ee dokona karenge dupwape ama peparae rao oteya. Enakana Pilisitia wambu dupwame ee doko kandapala lao, Apimi pipyase? lao piso siyami. Dokopa Samasone Timina akalinya imwange dokome pipyalyamo. Banya etenge doko rakangeme nyepala akali wakale maipya dokona imbwuapala pipyalyamo, leyambinyi siyami. Sepala Pilisitia wambu dupwame epapala enda dokopa banya rakangepa dee banya andape isare palyuo kisiyami.

Dokopa Samasoneme lao, Dopa piminyi dokona nambame kinyi kinyi leto. Nakama kando isingi kooko piru. Pipala namba yaki nyuo puu pao paro, leya. Lapala Samasone baame Pilisitia akali dupwa pipya yanda pimwaiyapala akali ama malu baame pyao kumakaya. Enakana yuu Etame lenge dokona kananda mende karenge dokona pao palu karo piya.

Samasone Baame Pilisitia Wambu Dupwa Nyuo Anamasi Minyiya

Pilisitia wambu dupwa nakama epo yuu Juta dokona komau anda pyuo palyuo kareyami. Karo dokopa yuu taone Liya dokona papala wambu dupwa pyao bange dupwa minyarambu nyuo piyami. 10 Dokopa Juta akali dupwame Pilisitia akali dupwa piso soo leyami. Akipamo nakamame namwa pyao ralinyi nembo namwana yuu doko nyakalyamisi? leyami.

Dokopa nakamame isingi lamaiyuo, Namwame Samasone baa puu maiyuo retalena epelyamano. Baame namwa kando piyamuli pyuo baa isingi pyarama, leyami.
11 Doko sepala Juta range akali taosande rema (3,000) nakama yuu Etame lenge kananda karenge Samasone baa palu kareyamo dokona papala Samasone kando dopa lamaiyami. Pilisitia wambu dupwame namwa iso karaminyi doko emba see nalese? Embame aki mende piinyisa namwa keta randa dake epelyase? leyami.

Dokopa baame isingi lamaiyuo, Nakamame namba dopa piyamiŋi dokona nambame nakama dopako piyu, leya.

12 Nakamame baa lamaiyuo, Namwame dae epo emba puu pyao nyepala Pilisitia wambu dupwa maiyalena epamano, leyami. Dokopa Samasoneme nakama lamaiyuo, Nakama rangeme namba pyaa narama lao kinyi kinyi langilapa, leya.

13 Dokopa nakamame baa lamaiyuo, Daa, pyaa narama. Namwame emba mee puu pyao nyepala Pilisitia wambu dupwa keta mairama, leyami. Lapala nakamame puu enenge lamame pakapala Samasone baa puu pyapala lanyuo kananda yaki nyuo epeyami. 14 Baa yuu Liya dokona epeyamo dokopa Pilisitia wambu dupwame pii poraiyuo lao kando nyela epeyami. Dokopa Kamongona Imambu dokome baa porainyi pyambuyamopa banya kingi dokona puu piyaminyi dupwa isareme rasi ingyuo roko isa peya. 15 Dokopa baame mena dongena angapu kuli kyaka kenda pingi doko kandapala kingi pyambwapala minyalyuo nyiya. Nyepala dokome wambu taosande mendaki (1,000) pyao kumakaya. 16 Dopa pyuo pyapala Samasone baame kenane pyao rae maiyuo dopa leya. Dongena angapu kuli dokome minyuo akali taosande mendaki dupwa pyao kumakapu. Dongena angapu kuli dokome akali malu konda konda pyuo pyao malu palyapu, leya. 17 Pii lao otapala dokopa Samasone baame mena dongena angapu kuli doko pyao nembeya. Nembeyamo yuu angi pao siyamo doko Angapu Kuli Kyau, leyami.

18 Samasone baa ipwa nano wakasa piyasa baame Kamongo Anatu piso soo leya. Embame namba yulu andake dake jipinyipa wambu malu pyao karapunupape epapu ipwa nano dokome namba kumaro ingilyase? Dee rara wakale Pilisitia wambu Anatu suu pyaa nange dupwame nyuo puu maiyuo nyeramisi? leya. 19 Dokopa Anatumi yuu ipwa epa nange dokona kapa ipwa epena leyamopa yuu Liya dokona ipwa guu lao epeya. Dokopa Samasone baa ipwa doko neya. Neyamo dokopa banya porainya renge dee epo paleya. Dokona lao ipwa kingi doko Akali Kyakale Leyamo Dokona Ipwa Guu Lenge, leyami. Ipwa doko dakepa yuu Liya dokona epo karamo.

20 Samasone baa ee kana akalisa lama dusipana Isaraele wambunya lita akali ingyuo kareya. Kareyamopa Pilisitia wambu dupwame Isaraele yuu dokona iso kareyami.

Copyright information for `KYC