Judges 16

Samasone Baa Yuu Gasa Dokona Kareya

Samasone baa dokona karo yuu Gasa dokona pao enda pamuku mende kando nyepala enda dokopa role pyao paleyambi. Dokopa yuu Gasa range wambu dupwame Samasone baa epo kareyamo doko kandeyami. Kandapala nakama yuu dokona pao karo awali lapala baa paramo lao kukwa dokopa yuu taone andake kame kambu dokona iso kareyami. Doko yuu gii kukwa dokopa nakama elya kalo karo yuu yangaramo dokopa baa neta eparamo pyamanale lao suu pyao kareyami. Samasone baa palyuo soo pao andasukulya ingiya. Dokopa sipurapala taone andake dokona kame kambu dowa doko minyuo romo pyuo lalyepala pote isa dusipape dee kambu kii paleta nyuo banya lange dokona reteya. Retapala yuu kyau mende Eperone kandanyi peyo karenge dokona pulyuo soo papala kando kareya.

Samasone Delaelapa

Enakana dokopa Samasoneme enda Delaela lenge yuu Soreke pau lama lama dokona palenge doko kando ama mona wakasa reteya. Dokopa Pilisitia akali kamongo kingi paki nakama enda doko kareyamo dokona papala lamaiyami. Embame akali doko kando kyatepa pyuo baa ama wakasa porailyamo doko renge akipi lao sepe leyami. Namwame apa pyuo banya porailyamo renge doko nyuo anamo pirama lao sepe. Baa namwa pyaa nana lao puu maipi, leyami. Dopa pirinyi dokopa namwame mendaki mendaki lao kana kulingi taosande mendaki ipisu andete mendaki (1,100) dupwa jerama, leyami.

Doko sepala Delaela baame Samasone piso soo, Emba ama wakasa porailini renge doko langipi. Wambu lapome emba puu maiyuo emba poraiya nalase lao pirami doko apa pyuo piramisi? lao pisiya. Samasone baame isingi lamaiyuo leya. Nakamame namba yanda imbu kyaka yanda ipingi dusipame puu mairami ramo dokopa namba poraiya naro. Ama pyuku lasi akali menge dopale ingyaro, lamaiya.

Dokopa Pilisitia akali kamongo lapome yanda imbu kyaka yanda ipingi nyepa minyuo epo enda Delaela doko maiyaminyipa dusipame enda baame Samasone puu maiya. Enda baame akali dupwana lapo iso anda luu palenge donge mendena yalu pyuo petena leyamo dupwa simili lao enda baame pii poraiyuo leya. Samasone, Pilisitia dupwa epelyaminyi, lamaiya. Dokopa yanda imbu puu maiyamo doko isareme rao rokonge dopale ingyuo waiya lao rokoya. Dokopa nakamame baa yalu pyuo nyisapyamopa porailyamo renge doko aki lao soo gisa nayami.

10 Delaelame Samasone kambako lamaiyuo, See, embame namba kando mee male lao kyambo langilini. Doko kaepala wambu lapome emba apa pyuo puu mairamisi dokona lao namba angi rolae langipi, leya. 11 Dokopa Samasoneme enda doko dee lamaiyuo, Nakamame puu enenge wambo mende pii nangendeme namba puu mairami ramo doko namba kapa poraiya nao ama pyuku lasi wambu menge dopale ingyaro, lamaiya.

12 Doko sepala Delaela baame puu ama enenge lapo nyepala dokome Samasone baa puu maiya. Maipala enda baame pii poraiyuo lao, Samasone, Pilisitia wambu dupwa epelyaminyi, leya. Doko akali lapo anda donge pakirena iso yalu pyuo kareyami dupwa simili lao leyamo dokopa Samasoneme puu banya kingi dokona piyamo doko minyuo rokoyamopa mee isa peya. Puu enenge doko rokoyamo dokopa puu doko nyuu puu kuki dopale ingyuo rokoya.

13 Delaelame Samasone kando leya. Embame yuu peparae male lao namba kyambo langyuo karene. Doko kaepala namba langyuo, Wambu lapome emba apa pyuo puu mairami lao langipi, leya.

Dokopa Samasone baame enda doko lamaiyuo, Masini dokome komau waso puu isa palyuo ketae palyuo pingi kandale. Masini dokona nambana kyawasi wanyama yanda ipingi nyepo dusipame isa palyuo ketae palyuo pipala pyao gii lao piri ramo dokopa namba ama poraiya nao pyuku lasi akali menge dopale ingyaro, lamaiya.

14 Delaela baame elya kalo pii isa isa lao anjiki pyuo pisipala Samasone nyuo luu palyiya. Palyapala baa luu paleyamo dokopa banya kyawasi wanyama yanda ipingi nyepo dusipame masini dokona isa palyuo ketae palyuo pipala pyao gii lao piya. Pipala dee pii poraiyuo lao, Samasone, Pilisitia wambu dupwa epelyaminyi, leya. Leyamo dokopa Samasone lenge rao roya pisipala banya kyawasi dusipa range mee ipyuo nyiya.

15 Dokopa enda dokome baa lamaiyuo, Akipamo embame namba mona retelyo letese? Angi kinyi mona reta nalene. Embame yuu gii rema namba kando mee male male lao kyambo langyuo minyoko pipi. Dee emba ama porailini renge doko namba langi nalene, leya. 16 Lapala enda baame yuu peparae poraiyuo kaeyo piso siyamosa akali baame pii doko soo makapala kumarolyamo lao suu piya. 17 Suu pyapala dokopa Samasone baame angi renge rolae enda baa polo lamaiya. Namba porailyu doko nambana kyawasi doko pyakepa nange dokome pilyu. Dee yuu gii mandeyamo dokopa namba Anatu lao rombo palyuo Nasaraite akali ingyuo karara, aŋalame leya. Dokona nambana kyawasi doko pyake pyara ramo dokopa nambana porai doko pao otapala namba kapa poraiya naro. Namba dokopa ama pyuku lasi akali menge karaminyi dopale ingyaro, lamaiya.

18 Dokopa Delaelame ama kinyi Samasone baame langilyamo lao soo nyepala baa rae maiyuo Pilisitia kamongo akali dupwa keta pii waili nembeya. Nakama yuu gii mende kamba epena lao lamaiya. Akali baame epapu angi kinyi doko namba langipya, lamaiya. Lamaiyamo dokopa Pilisitia akali dupwame sepala nakamana kana dupwa minyuo epeyami. 19 Enda dokome pii anjiki pyuo isa isa lao Samasone nyuo enda banya pai dokona kyawa pyare lao nyuo luu palyiya. Luu paleyamo dokopa enda baame akali mende epena leya. Akali dokome epapala Samasonena kyawasi wanyama yanda ipingi nyepo dusipa pyake panyi nembeya. Nembeyamopa enda baame makande pyuo Samasone pyalereyamo dokopa baa ama poraiya naya. Banya porainya renge pao oteya. 20 Enda baame pii ama ketae palyuo lao, Samasone, Pilisitia dupwa epelyaminyi, leya. Dokopa Samasone baa roya pisipala namba panju pingi doko suu pyao mee parolyamo lao suu piya. Doko Kamongome baa kyawa yaki nyiyamo doko see naya. 21 Dokopa Pilisitia akali dupwame baa minyarapala nyiyami. Nyepala banya lenge dolapo lukunyi nembeyami. Nembapala nakamame baa lanyuo yuu Gasa dokona lanyuo peyami. Papala puu sane lapome kingi kimbupi dokona puu piyami. Samasone baa yulu pinya lao kana andake lapome nenge witi jingi dupwa lukuo dee pyao inju palawa inginya lao pingi dokona pyuo karapusi anda paleya. 22 Dokopa Samasone banya kyawasi doko kamba dee epanya kanda soo epeya.

Samasone Baa Kumuya

23 Pilisitia kamongo akali dupwa nakama epo malu palyapala nenge keyange dupwa nyuo nakamana anatu lao isa kanape lapome wasapala dokona nenge kuiyuo maiyuo loma soo rae maiyuo lakandeyami. Dokona kingi Dakone lenge doko lakando nakamame kenane pyao nambana anatu dokome nyiso jipyamopa namwana yanda pimwai Samasone baa nyilyamano lao rae maiyami. 24 Dee wambu dupwame rae maiyuo kenane pyao nakamana anatu doko kingi lakando lao, Namwana anatu dokome emboneme jipyamopa namwana yanda pimwai wamba namwana yuu andape pyao kwaeyanyi nembo dee namwana akali malu pyao kumako piya kande doko nyuo anamasi minyilyamano, leyami. Lao nakamana monarename range ama rae maiyuo leyami. Samasone baa kyakale lao epena lapala namwame baa kando ikitokondo male lao baa kando lamanale, leyami. Lapala dee nakamame Samasone karapusi anda paleyamo doko epena lao nyuo lanyuo neta epeyami. Epapala nakamame baa kando male lao giyalya giyana pyuo dokopa anda dokona pote isa londe lama ralipi kareyamo dokona baa kanya karena leyami. 26 Dokopa Samasoneme wane kuki mendeme baa nyiso kii minyuo kata lasaka pyuo papiyamo doko lamaiyuo, Embame nambana kingi doko nyuo pote isa repeta ralipi karamo dokona namba minyuo pao angi dokona minyasakana. Nambame isa dolapo minyaro karapuli, leya. 27 Anda dokona kamongo akali kingi paki dusipa dee enda akalipi taosande rema (3,000) epo anda yangi dupwana ama kete pyao Samasone baa isa karo baa kando ikitokondo giyalya giyana pyuo lao peteyami.
Banya porainya renge dokome anda doko suu leya. (16:30)


28 Dee Samasoneme dokopa ateŋa lao, Kamongo Andake Mupwa Wakasa, embame namba suu pyape. Anatu embame namba yuu gii mendaki iki porainya renge kamba jii. Dopa piri dokopa dokome yuu mendakinde nambana lenge lama dolapona reke lao Pilisitia wambu dapwa pyarowale, leya. 29 Dopa lapala Samasone baame anda kanya dokona isa pote londe wara pyuo piyaminyi dolapo minyaro kareya. Karapala banya kingi dolapome isa dolapo minyuo poraiyuo suu leya. 30 Dokopa baame pii ketae palyuo lao, Namba Pilisitia dupwa pipya role pyao kumarowale, leya. Lapala akali banya porainya renge dokome anda doko suu leyamosa anda doko boo lapala kamongo akalipi dee mee wambu peparae pyao kumakaya. Samasone baame wambo wambu malu pyao kuma siyamopape enakana dokopa wambu ama malu wakasa pyao kuma soo dee baa opetae kumuo piya.

31 Dokopa banya yangongepe dee banya ree palu dupwa epapala banya yanenge doko nyiyami. Nyepala nakamame lanyuo anda papala baa yuu Jorapa dee Esataolepa kanya yanyanda dokona malu piyami. Wamba banya rakange Manoa malu piyaminyi dokona baa malu piyami. Samasone baa Isaraele wambu dupwa rapu pyuo kareyamopa ee kana akalisa lama epo peya.
17:1—21:25Isaraele dokona kiŋi akali ene karapa nayamopa Isaraele wambunya arome pii pyasi palamo.


Copyright information for `KYC