Judges 5

Depora Berekepana Kenane Piyambi Doko

Yuu gii dokopa enda Deporapa akali Bereke Apinomena ikinyingi dokopame kenane dake piyambi.

Isaraele wambu dupwana lita dupwame angingyuo yanda pelana suu piyami.
Wambu dupwa rae maiyuo mee yanda pela peyami.
Dokona lao Kamongo doko lakandalapape.
Kiŋi dupwa selapape.
Nakama kamongo dupwa warombo soo karalapape.
Isaraele wambunya Anatu Kamongo doko kando
namba kenane pyao kurulu rambyalupi lao piru.
Kamongo, emba yuu Siya dokona yuu kyau singi dupwa
dee yuu Itome yaki nyepala epene dokopa
yuusili minyapala yake dokona piso apu epeya.
Kinyi, kopa dokona piso ipwa kulimbwanyi peyo epeya.

Isaraele wambunya Kamongo Anatunya lenge kambu dokonape
dee yuu kyau Sainai dokona Kamongona lenge kambu dokonape piso yuu kyau dupwa yuusili minyili lao pyuku pyuku leya.

Dokopa akali lapo mena kamele maki maki pyuo lanyuo mata dupwana bange keyange reto kana nyuo bisinase pyuo papingi dupwa
akali Samika Anatinya ikinyingi ando kareyamo yuu gii dokopape dee enda Jaele ando kareyamo yuu gii dokopape yuu dokona kata sukusa dopa pyuo paa nayami.
Dee wambu lapo kata londe panya peyami dupwa nemba nemba kata kuki dupwana iki peyami.
Isaraele wambu dupwame nakamana taone dupwa kame soo yaki nyiyami.
Depora,
emba ene epapa naenepa mende pii nao mee kareyami.
Emba Isaraele wambunya endangi dopale ingyuo epee.
Enakana Isaraele wambu dupwa mee bange anatuŋu lenge enenge dupwa rombo palyuo nyiyami dokopa
yuu dokona yanda sipureya.
Dokopa Isaraele yanda singi akali taosande akalisa kisima (40,000) dupwana mendalipi
konambe kakupi minya nayami.
Nambana mona doko Isaraele wambunya yanda singi dupwana akali iso karenge dupwa keta silyamo.
Dee wambu lapo mee rae maiyuo yanda pela peyaminyi dupwana keta silyamoko.
Kamongo doko lakandalapape.
10 Wambu mena donge kewa lengena mata dokona
isa petenge bange retapala petaminyi dupwape
dee nakama mee kata papingipi pii dake polo lamailapape.
11 Selapa. Wambu pii malu lao ipwa kamuo nyingi yuwale repeta karaminyi dupwame
Kamongome anamasi minyiyamo dupwanape
dee Isaraele wambu dupwame wini piyaminyi dupwana lao lao karaminyi.

Dokopa Kamongona wambu dupwa nakamana yuu taone andake karenge dupwa yaki nyepala nakama lano epeyami.
12 Dokopa lao, Depora emba wambo puu.
Kenane mende pyao wambo pupi.
Akali Bereke Apinomena ikinyingi wambo pao
embena karapusi wambu dupwa lanyuo puu, leyami.
13 Dokopa enakana akali yaki nyii nange dupwa nakamana lita dupwa keta epeyami.
Dokopa Kamongona wambu dupwa baa keta epo rapa rapa pipala yanda pela epeyami.
14 Yuu Eporaime wambu dupwa nakamana yuu dokona piso
akali Benjamenena rara wambu dupwana matarena epo yuu anda lama lama dokona epo sukusa pyaka siyami dokopa
yanda singi isingi akali dupwa yuu Maki piso epeyami.
Dee akali mupwa dupwa yuu Sepyulane dokona piso epo piyami.
15 Isakana rara dokona akali mupwa dupwa poropeta enda Depora role pyao epeyami.
Kinyi, Isakana rara dee Bereke opetaeko epeya.
Dokopa nakama Bereke moko minyuo yuu pau lama lama dokona peyami.
Dopa piyamopape Urupenena rara dupwa lili pyuo pingisi palipala
nakama parama panda paa narama lao see nayami.
16 Akipamo nakama mena sipisipi dupwa pipya karo kaeyamisi?
Nakama kareyami doko mena sipisipi rapu pingi akali dupwame mena sipisipi kee larami doko selana kareyamisi?
Waa. Urupenena rara dupwa lili pipala pingisi paleya.
Dokona nakama parama panda paa narama lao see nayami.
17 Dokona Gate rara dupwa ipwa Jotane neta pyakalyingi dorena kareyami.
Dokopa Danena rara dupwa sipu dupwana yulu pyuo karo kaeyami.
Dokopa Asana rara dupwa ipwa kota kipwa kipwa wangu dupwana kareyami.
Doko nakama ipwa kee kama dupwana mee kareyami.
18 Dopa piyaminyipape Sepyulane wambupi dee Napatalai wambupi dupwa
nakama kumarami dokona suu pyaa napala nakama range kumuo maiyuo yanda pingi yuu dokona yanda pyuo kareyami.

19 Dokopa yuu Tanake dokona ipwa Meketo repeta dokona
kiŋi dupwa epapala yanda piyami.
Yuu Kenane kiŋi dupwame yanda piyaminyipape
nakama kana kulingi mendepe nyuo lanyuo paa nayami.
20 Bui dupwa yake dokona pyakando pyuo
oko soo peyami.
Dopa pyuo peyaminyi dokopa nakama Sisirapa yanda pimwai ingyuo piyami.
21 Ipwa Kisone lenge doko palipala nakama peparae soo peya.
Dokona namba porai ingyuo karo kimbu pyao piso paro.
22 Dokopa mena ose dupwa poraiyuo makando
nakamana kimbu dupwame yuu pyao inju epeyami.

23 Kamongona aŋala dokome lao, Yuu Metose keta randa maipwape.
Dee yuu dokona palaminyi dupwa keta randa maipwape.
Nakama yanda singi dopale ingyuo epo
Kamongo nyiso banya lao yanda pela epa nayami.

24 Dokona enda Jaele lenge
Kene rara akali Ipua lenge dokona etenge baa embone piso petenge.
Enda wakale komau anda dupwana petenge dupwa embone piso pisiminyipape enda Jaele baa kamame wakasa embone petenge.
25 Dokopa akali Sisirame ipwa naro jinya lao piso siyamopape enda dokome susu ipwange maiya.
Pere ama keyange mendena susu ipwange angi retapala minyuo epo maiya.
26 Maipala enda baame komau anda puu anjingi isa pirimi dopale mende kingi pakirena minyiya.
Dee kingi paki dokome yulu pingi akali mendena ama doko nyuo minyiya.
Dopa pipala minyuo pao akali Sisira pyao banya kyawa kuli doko poro leya.
Poro lapala enamba dokona arekyo piya.
27 Dokopa akali doko ruki maki lao
Jaelena kimbu siyamo dokona pao paleya.
Palipala akali baa kumuya.

28 Dokopa Sisirana endangi dokome windowa kata dokona karo
ikinyingi doko anda epelyape lao mee kandaro kareya.
Karo dokopa enda baa range piso soo lao, Akipamo akali dokona mena osena uliuli ipyuo penge doko enakana ingyuo epelyase?
Dee akipamo banya mena ose dupwa mona palyuo kamba kapu kyuo epelyamisi? leya.
29 Dokopa banya soo gisingi enda dupwame isingi lamaiyuo,
30 Nakama bange koto nyuo mokwa soo lili pyuo nyilyaminyi ingilyamo.
Doko wanake mapwae nyuo yanda singi dupwa lama larapu nyilyaminyi.
Dee komau keyange kamonganyi nembenge dupwa akali Sisira dokona lao nyakamilyaminyi.
Dee mola suku pisi ama keyange dupwa enda kuini dokona
mangena sera lao nyakamilyaminyi, leya.
Leyamo doko sepala Sisirana endangi dokome poraiyuo suu pyao peteya.

31 O Kamongo, embena nyisu petenge dupwa dopale ingyuo kumunya.
Dopa piraminyipape embena puu minyingi dupwa neta potemo epo rao karenge doko suu pyao karena.
Dee yuu palu kareyami dokona ee kana akalisa kisima dusipana manda rengepe mona kyuu lao singi rengepe siya.

Copyright information for `KYC