Leviticus 19

Poo Pyasi Ingyuo Rolae Pyuo Kararami Lao Lowa Pii Dasipa Minyarami

Kamongome Mosese Isaraele wambu dupwa lamainya lao lamaiyuo, Namba nakamana Kamongo Anatu poo pyasi karo dokona lao nakama poo pyasi karalapape, leya. Nakama mendaki mendaki lao suu pingi dokona embena endangi rakangepa dolapo angingyuo karambinyi lao rape rape lao suu pyaro karalapape. Karapala nambame leyonoli pyuo koro petenge gii doko minyaro karalapape. Namba Kamongo doko nakamana Anatuŋu karo. Namba kame soo yaki nyuo kingimi wasisi dupwa anatuŋu lao mona nyii nalapape. Mee kapa pyakepasi dupwame kiso wambu ingyuo wasapala anatuŋu lao lakanda nalapape. Namba Kamongo doko nakamana Anatu doko namba karo kande.

Nakama mona mendare palyuo yalya kando karo mena pyao kisaraminyi dokopa mawa pii lapo langyuo kandapi dupwa minyuo suu pyao kisarami ramo dokopa mona yuu lao nyero. Minju angi dupwa pyao kisaraminyi yuu gii dokopape panda dokona yangamape dolapona iki napala yuu gii repo pyuo siya kande dupwa naa nao mee kisinyi nembarami. Mena yuu repona seramo doko poo pyasi ingya naramosa mendeme napala banya kiso jipyamo doko nyakami nao kaeyaro. Daaŋa lapala enda akalipi mendeme yuu repo pyuo seramo doko nao lara ramo dokopa bange nambapa lao kiso jisi doko pao mee inginyi pyambuo pirasa pira. Dokona lao baa mee nambana wambuko ingyuo kara nana lao raka lanyi nembaro.

Nakamana ee dokona witi jingi wambu piyamopa pyakepo manjo kande dokopa kame nemba nembasa petamo dupwa petena kaeyalapape. Dee lapo suku dupwana kalyinyi palyiyami kande dupwa dee pao pyakepo manjo nyii nalapape. 10 Nakamana isa girapo ee dokona jingi lyiyami kande dokopa kana pope dee lapo isapasipi dupwa dee nyela paa nalapape. Pendewa wambu dee wambu wakale lapo nakamana yuunya epo petenge dupwana ingyuo sakaminya kaeyalapape. Namba Kamongo doko nakamana Anatu ingyuo karapunu pilyamo.

11 Nakama mendena waa naa nao mendena bange doko pii panga soo nyakami nao dee kyambo pii laa nao pipwape. 12 Wambu mendali kando kinyi lapunu pilyamo lao sinya lapala nambana kingi lapala lamaiyami kande doko dee alowa pii nalapape. Lapala kaeyarami ramo doko seramo dokome nambana kingi doko uki minyuo lara ingyasara. Namba Kamongo doko nakamana Anatuŋu karo.

13 Nakamame mendalinya bange dupwa waa nyakamyuo pyao koo keta palya nalapape. Akali mendeme embena yulu pyakanya lao nyii kande dokopa yuu gii rolae dokopa banya yole maiyakamipi. Rakya jimwa lao reto yuu mendeko yanga napipi. 14 Wambu lenge koo dupwa lukumao simili lao bange lapo pao wambo reto kalepoe dupwa kando pii langa lao pii nalapape. Namba Kamongo doko nakamana Anatuŋu karo dokome nakama namba mupwa lao suu pyao pako karalapape.

15 Nakamame kote mende siyami kande dokopa kinyi lao rolae pyuo lakamipape. Nakamame wambu koo dupwa nyisaramisa kote pii doko mee wini lasarami doko kaeyalapape. Dopako pyuo wambu lapo kingi lengepe dee namba petengepe mupwa ingyuowale kandale lao pako mona manjipala mee nyisaramisa kote doko mee wini lasarami doko ama daa. 16 Wambu mendena lao wakale dupwa kyambo lamaiya nalapape. Wambu mende moŋo andake nyeramopa kote lakamiraminyipa embena piimi nyisare kata siya kande dokona nyisape. Namba nakamana Kamongo karapunu pilyamo.

17 Embena andare mendeme emba keta kopetame pyuo pisiya kande doko baapa lao imbu singi doko suu pyanyi pyano kara napipi. Dopa pyuo koo doko emba keta manjo kara narowale lao suu pyao baapa isa piso lao rolapala dokopa banya lao koo mende pii naresa pira. 18 Embame koo dokona isingi yano nyelana suu pyaa nao dee koo embapa piramo wambu dokopa imbu paleta kara nao pipi. Emba rangena yongo mona nyuo karene doko suu pyao parali maki palenge wambu dupwa mona reto karape. Namba Kamongo doko karo.

19 Nambana mawa pii letamuli pyuo minyalapape. Nakamana mena bulamakao dupwa mena rara wakale dupwa pipya pyaso kepo pyuo yakane manja kaena dee waingi rara lama minyuo pyaso ee mendakinya wara pii nalapape. Komau eleko rara lamame pyaso wapu nalapape.

20 Akali mendeme banya kendemande wanake doko akali mendena kalya pyuo mairamo doko yapa nara ramo doko akali kalya pyakamira dokopa yuu lapo role pyao palirambi ramo pyao kuma nao mee kote serami. Renge doko wanake baa akali banya mee kendemande pyuo pisirako. 21 Dokona lao nyerambinyi akali baame sipisipi kali mende namba Kamongona komau anda kambu kolandowame dokona banya koo pipu dokona lao pyao kisala epenale. 22 Koo Anatu baapa ingyuo piyamo doko nyuo nembakana lao purisi akalimi mena sipisipi pyao kisaramo dokopa Anatumi nyuo kame sakamira.

23 Nakama yuu Kenane epo kando nyepala dokopa jingi lyingi isa rara dupwa wara piyami kande dokopa koo ingyasaraŋa ee kana remana naa nao wasaka pyuo kararami. 24 Ee kana kisima doko epeya kande dokopa ee isa jingi dupwa peparae lyepala namba keta joo nambana kingi ketae pyambuli lao piramisa pira. 25 Dopa piraminyipape ee kana kingi paki dokopa kanda soo isa jingi lyuo narami. Nakama dopale pirami ramo dokopa isa jingi lyuo kakana pira. Namba nakamana Kamongo Anatuŋu karo.

26 Minju lapo ranjama paleta siya kande doko naa nalapape. Pipu mauli ropaka kemalipi kingi lenge dokona mendepe nakamame minyalyuo pyuo laa narami. 27 Nakamana kyawa wangupi angasi pinjingi dupwape pyakepowape pisarami doko daaŋa leto. 28 Nakama yongo kamu kepaope dee enda akalipi mende kumuyami kande dokopa yanenge kunjowape pii narami. Namba doko Kamongo karapunu pilyamo.

29 Nakamame nakamana wanene dupwa mee bange anatuŋu lenge tembole anda dupwana kepo yulu pingi dokona pyuo petena lao maiya nalapape. Daaŋa lao maiyuo larami ramo dokopa namba yaki nyepala mee bange anatuŋu lao suu pingi doko mana nyeraminyipa nakamana yuu andape dupwa pamuku yulu dokome simbwara ingilyamo. 30 Koro petenge yuu gii doko yaki nyii napala misi lao namba lakandenge panda doko kyawa nyuo minyuo karalapape. Namba Kamongoŋo karo.

31 Nakamame wambu lapome wambu kumasinya imambu pipya ropaka piso singi dupwa keta papala ropaka piso sisaramiŋi doko daa leto. Dopale dupwana pao kale yuku soo pisirami ramo doko nambapa kopeta kapeta kwaeyo sera ingilyamo. Namba nakamana Kamongo Anatuŋu karo.

32 Nakamame endemo alemope dupwa angingyuo karaminyiŋi lao suu pyao rape rape lao karalapape. Namba Kamongo doko mupwaŋa lao suu pyapala pako karalapape.

33 Nakamame yuu wakale wambu karala papingi nakamana yuu palaminyi dupwa kando kopetame pyuo randa mai nalapape. 34 Nakamana rara pipya yulu pyuo nenge rambo lao pilyaminyi doko suu pyaowako doloma pipya pipwape. Nakama range doko mona reto karaminyi suu pingi mendaki dokonako palyuo doloma mona retalapape. Nakama yuu wakale Isipi wambunya yuu dokona karala papingi ingyuo kareyami kande doko apiyakalende ingyuo kareyamape lao dokona suu pyalapape. Namba nakamana Kamongo Anatu dokome leto.

35 Mendeme nakamana bange mende ropo pyao nyelena epeya kande dokopa sikyali pyuo kandapala kuki andake lao nyuo makande pirami dokopa kyambo mendena palyapala uli pili laa nalapape. 36 Kandokondali pyuo angi dokona sikyali pyuo nyuo makande pyuo kapa kapa ingyuowape lao kenda bange peparae rolae dokona sikyali pipwape. Renge dokona namba nakamana Kamongo Anatuŋu karo. Nakama Isipi dokona kareyaminyipa nambame nyuo lanyuo dae epeyo kande dokome karo lapunu pilyamo. 37 Namba Kamongo dokome mawa piipi mana pii dupwape jiyu kande dupwa poraiyuo minyuo karalapape.
20:1–22:33Wambupi purisi dupwape karo pisasaramiŋi lao lowa lapo konda pyuo reteya.


Copyright information for `KYC