Numbers 14

Wambu Dupwa Mumu Leyami

Kukwa dokopa wambu dupwa ee andake lao pii porakai leyami. Wambu dupwa Mosese Eronepa kando mumu lao lao, Yuu Isipi dokonape panda yuu muiyane karamano dakenape kumuyamali doko kapa ingyapyali. Akipamo Kamongo dokome namwa yuu dokona lanyuo pelyase? Yanda pyuo karo dokopa nakamame namwa pyao kumakarami. Pyao kumakapala nakamame namwana enda wanepe dupwa puu maiyuo nyerami. Yuu Isipi dokona kamba kapu kyuo parama ramo doko kapa ingyara, leyami. Dokona lao nakama range mendeme mendali kando lao, Namwa range akali mupwa mende rombo palyapala yuu Isipi dokona dee kamba monale, leyami.

Leyaminyi dokopa Mosese Eronepa wambu kareyaminyi lenge kambu dokona pangu siyambi. Nanena ikinyingi Josua lengepe Kelepe Jepuna ikinyingipi yuu dokona waa kando kandala peyambinyi dolapome kondome kumapala nakambana komau minyuo kanguyambi. Kangupala dokopa wambu dupwa kando lamaiyuo, Namwa yuu kandala peyama kande doko ama keyange wakasa. Dokona Kamongome namwa kando rae maira ramo doko baame namwa nyuo yuu dokona lanyuo papala yuu amenge pingi nenge malu andenge doko namwa jera. Dokona Kamongo kando kamba lao apiyanda pii napala yuu range wambu dupwa kando paka nalapape. Paka nao namwame nakama kapa mee manda rasi pyao anamasi minyarama. Kamongo doko namwa keta karapyamo dokome nakamana mee bange anatu lao lakandenge dupwa nyuo anamasi minyiyamo dokona lao namwa paka nao karamana, leyambi. 10 Wambu yuu dokona palenge dupwa peparae kapa pyuo kaname pyao kumakamwalinya suu piyami. Dopa piyaminyipape aopa Kamongona komau anda ketae dorena Kamongona yanga paupau lenge renge dokome epo kendale piyamo dokopa kandeyami.

Mosese Wambu Dupwana Lao Ateŋa Lakamyuo Kareya

11 Kamongome Mosese lamaiyuo, Yuu gii akipare nembo wambu dupwame namba mata joo yaki nyuo kaeyaramisi? Wambu dupwa keta nambame yulu kanda nange dupwa pipunupape yuu gii akipare wambu dupwame mona kana poko namba kapa ingingi lao suu pyaa naramisi? 12 Nambame yanyi renge peyapala wambu dupwa pyaro. Dopa pirunupape nambame emba rakange kyawa inginyi pyambwaronopa rara enenge andake ingyuo dee porainya renge doko palyuo simbwaramopa rara wamba paleyami dupwa isa palyuo kararami, leya.

13 Dopa leyamo dokopa Mosese baame Kamongo lamaiyuo, Embame embena porai renge dokome yuu Isipi dokona karo wambu dupwa nyuo lanyuo epee. Embena wambu dupwa kando embame yulu piinyi doko Isipi range dupwame seraminyi dokopa 14 nakamame wambu yuu dakena palenge dupwa lamairami. Kamongo emba namwa keta epo karenge doko wambu dapwame soo otelyaminyi. Embena kopa doko namwa kareyama dokona epo siyamo dokopa emba epo panee. Dee korakama namwa penge dokopa emba wambo pao kopa rau londe ingyuo dee kukwa dokopa emba isare ingyuo pao pingi doko silyaminyi. 15 Epapu embame embena wambu dupwa pyao kumakare ramo doko wambu rara wakale dupwame emba pilini doko sepala dopa lao, 16 Kamongo dokome yuu mairu lalu lao leyamo dokona kapa pyuo wambu dupwa lanyuo epa nara ingyapyasa yuu muiyane dokona nakama pyao kumapya, larami. 17 Dokona lao epapu Kamongo ateŋa leto. Embena porai doko namwa lasaka pyuo emba piruŋu lalu lao leeneli pyuo piri. Emba dopa lao, 18 Namba Kamongo, doko waiya lao imbwa nao wambu dupwa ama mona reto yaki nyii nao koo pyuo mata jilyaminyipape kame sakamingi. Nakamana endangi rakangepe koo pingi dokona nambame ikinyipi wanengepe apusingi kauwangepe dupwa koo keta palyuo pyao randa mairu. Randa maiyuo nakamame para pyao wane manjo manjo paraminyi dupwa randa maiyuo piru, lee. 19 Embena mona retenge doko kamame wakasa alowa pii nange leene dokome embame wambu dapwa yuu Isipi yaki nyuo epeyaminyi dokona piso pao dakepa nakamana koo dupwa nyuo kame sakaminyili pyuo kame sakamipi, leya.

20 Kamongome isingi lao, Embame namba piso silinyili pyuo nambame wambu dupwana koo nyuo kame sakamiru, leya. 21 Dopa pirunupape namba lete karo nambana yanga paupau lenge renge doko yuu dakena pano silyamo dokona kinyi lengenyili pyuo lalu lao lao, 22 Wambu dapwana mendemepe yuu dokona sukusa pao pali nara. Nakama nambana yanga paupau lenge renge dokome epo kendale piyasa kandeyaminyi dokope dee yuu Isipi dokonape yuu muiyane dokonape yulu mendeme pii nange dupwa piyunu kandeyami. Kandeyaminyipape nakamame nambana maka nange renge doko makande pipa pyuo nambana pii warombo see napala kamba leyami. 23 Nambame nakamana rora ambasu dupwa yuu doko mairu lao lalu lao leyo dokona nakama paa narami. Nakamame namba mata jilyaminyi dupwana mendemepe yuu dokona kapa pao kara nara. 24 Dopa piramopape nambana kendemande akali Kelepe banya mona wakale palyuo karo namba yaki nyii nange dokona baa yuu waa kando kandala peyamo dokona nambame baa lanyuo paro. Dokopa yuu dokona yuu angi lama lama dupwana Amaleke wambupi Kenane wambupi dupwa epapu palaminyi banya para pyaramo dupwana ingyara. 25 Dokona rakya nakama dee kapu kyuo yuu muiyane dokona ipwa kota pete Kone lenge doko kanda kanda parami.

Wambu Dupwame Mumu Leyaminyi Dokona Kamongome Randa Maiya

26 Kamongome Mosese Eronepa lamaiyuo lao, 27 Yuu gii akipare nembo wambu koo pingi dapwame namba kando mumu lao kararamisi? Doo mumu letaminyi dasipa yakana namba silyu. 28 Dokona epapu nakambame nakama dopa lao isingi lamaiyuo, Namba Kamongo dopa leto. Nambame kinyi kinyi lalu lao lao, Mende pyakapili lao piso siminyili pyuo nakama keta pyakaro, leto. 29 Nakama kumaraminyi dokopa nakamana yanenge kaoma dupwa yuu muiyane dokona muu raleya lao nembarami. Namba kando mumu lao karaminyi dokona nakama ee kana akalisa lama pasi dupwana mendalimipi yuu dokona paa narami. 30 Nakama yuu dokona pao palirami lao lalu lao leyonopape nakama mendemepe pali naraminyipa akali Kelepe Josuapa iki yuu dokona pao palirambi. 31 Nakamame namwana wane wanake dupwa karapusi pyao nyerami lao leyami. Dopa leyaminyipape nakamame yuu doko rae mai nao paa narama leyaminyi dokona nambame wane wanakepe dupwa lanyuo paronopa nakama rangena yuu ingyara. 32 Nakama yuu muiyane dakena kumarami. 33 Nakamame namba epe kanda nao mata joo kareyaminyi dokona nakamana wane wanakepe dupwa randa nao ee kana akalisa kisima dusipana yuu muiyane dakena ralo papyuo kararami. Dopa pyuo papyuo karo pao nakama peparae kumaraminyipa wane wanakepe dupwa yuu dokona parami. 34 Nakamame koo piyaminyi dokona ee kana akalisa kisima randa nao kararami. Yuu doko yuu gii akalisa kisima nembo kando papyuo kareyaminyi dokona ee kana akalisa kisimako randa nao kararami. Nambame nakama kando rae mai nalene lao soo nyerami. 35 Nakama wambu koo pingi dupwa nyuo pyasapala namba kando mata joo karaminyi dupwa keta nambame lapunuli pyuo piru lao lalu lao leto. Yuu muiyane dakena nakama peparae kumarami lao namba Kamongome lalu lao lapu.

36 Moseseme akali lapo yuu doko apiyakale lao kandala pena leyamopa nakama pao kapu kyuo epapala kyambo leyaminyi dokome wambu dupwa Anatu kando mumu leyami. 37 Dokona Kamongome nakama keta anga pingi renge maiyamosa nakama kumuyami. 38 Dopa pyuo kumuyaminyipape akali akalisa ipisu lama yuu doko apiyakale lao kandala peyaminyi dusipana Josua Kelepepa iki mee lete kareyambi.

Wambu Kanda Soo Yuu Dokona Makande Pyuo Panya Peyami

39 Kamongome leyamuli pyuo Moseseme Isaraele wambu dupwa kando lamaiyamo dokopa nakama soo mona randayami. 40 Dokopa wambu dupwa wamba yangama sipurapala yuu kyau pyalya pyana pingi dokona ketae pulyuo yuu enenge nyela pao karo lao Kamongome yuu jero lao lalu lao leyamo dokona epapu namwa rapa rapa pisi karamano kapa parama. Namwa koo piyama lao silyamano, leyami.

41 Dopa leyaminyipape Moseseme lamaiyuo, Akipamo epapu nakamame Kamongo kando kamba letamisi? Nakama embone pisa nara. 42 Nakama paa nalapape. Nakama pipya Kamongo role kara nalyamo dokona nakamana nyisu petenge dupwame nakama anamasi minyarami. 43 Nakama Amaleke wambu dupwape Kenane wambu dupwape pipya yanda pyalana pao lenge kambusa kararaminyi dokopa nakama yandana kumarami. Nakamame Kamongome langiyamuli pyuo moko minyuo pii nayaminyi dokona Kamongo nakama keta role kara nara, leya.

44 Dopa leyamopa Mosese baape dee Kamongona Kana Minyuo Lalu Lao Lenge Pii Palenge Bokote dokope paleyaminyi yuu doko yaki nyuo paa nayaminyipape nakama yuu kyau pyalya pyana pingi dokona mee langa pulyuo panyako suu piyami. 45 Pulyuo peyaminyi dokopa Amaleke wambupi Kenane wambupi yuu dokona paleyaminyi dupwame nakama pyao isa palyapala pyao peta pao yuu Orima pyambuo kaeyami.
15:1—19:22Bange maingipi mena pyao kiso maingipi dupwana lao lowa lasi palamo. Wambu dupwame purisi akalipi Lipae akalipi dupwa nyiso bange maiyuo kareyami dokona lao pii lapo palamo. Wambu yanenge kakapange doko minyandapala poo pyasi ingyuo kara nao apa pyuo dee wate pisi dopale ingyuo kareyami lao letamo. Dee akali Kora baame Mosesepa Eronepa isa palyapuli lao suu pyao kareyamopape baame kapa pinya saka naya.


Copyright information for `KYC